ޕްރޮސެކިއުޓާ ޖެނެރަލް (ޕީޖީ)ކަމުގެ މަގާމަށް އައްޔަންކުރަން ރައީސް ޑރ.މުހައްމަދު މުއިއްޒު ހުށަހަޅުއްވާފައިވާ، ރައީސް އޮފީހުގެ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެފެއާޒް އައްބާސް ޝަރީފް، އެ މަގާމަށް އައްޔަނުކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން ފާސްކޮށްފިއެވެ.

11 ސެޕްޓެންބަރ 2024 ވީ ބުދަ ދުވަހުގެ ރޭ ދައުރުން ބޭރުން ބޭއްވި މަޖިލިސް ޖަލްސާއަށް ރައީސް ހުށަހެޅުއްވާފައިވަނީ އައްބާސްގެ ނަންފުޅު އެކަންޏެވެ.

ރައީސް މުއިއްޒު ފޮނުއްވި ސިޓީ ފުޅުގައިވަނީ ޕްރޮސެކިއުޓަރ ޖެނެރަލްގެ މަގާމް ހުސްވެފައިވާތީ އެ މަޤާމަށް ބޭފުޅަކު އައްޔަނު ކުރުމަށްޓަކައި ޤާނުނު ނަންބަރު 9/2008، ޕްރޮސެކިއުޓަރ ޖެނެރަލްގެ ޤާނޫނުގެ 3 ވަނަ މާއްދާގައި ވާ ގޮތުގެ މަތީން އާއްމުކޮށް އިއުލާން ކުރުމުން އެކަމަށް އިޖާބަދެއްވި ބޭފުޅުންގެ ތެރެއިން ހ.ޔެލޯ ރޯޒް އަލްއުސްތާޒް އައްބާސް ޝަރީފް އައްޔަނުކުރުމަށްޓަކައި އެމަނިކުފާނުގެ ނަންފުޅު ރައްޔިތުންގެ މަޖިލީހަށް ހުށަހަޅައިދެއްވާ، މަޖިލީހުން ނިންމެވި ގޮތް އަންގަވައިދެއްވުމަށެވެ. އެއާއެކު މަޖިލީހުގެ ތަޅުމަށް ރައީސްގެ ސިޓީފުޅު އިއްވެވުމަށްފަހު މަޖިލީހުގެ ރައީސް އަބްދުއްރަހީމް ވަނީ ރައްޔިތުންގެ މަޖިލީގެ ޤަވާއިދުގެ 129 ވަނަ މާއްދާގެ ކ ގެ ދަށުން އަލްއުސްތާޛު އައްބާސްގެ ނަންފުޅު ޖުޑީޝަރީ ކޮމިޓީން ގޮތެއް ނިންމެވުމަށް ވަނީ އެ ކޮމެޓީއަށް ފޮނުއްވާފައެވެ.

ހޯމަ ދުވަހު ބޭއްވި ޖުޑިޝަރީ ކޮމިޓީއަށް އައްބާސް ހާޒިރުކޮށް މެންބަރުން ވަނީ އިންޓަވިއުކޮށްފައެވެ. އިންޓަވިއުއަށްފަހު، ކޮމިޓީ މެންބަރުންގެ އިއްތިފާގުން، އައްބާސް އެ މަގާމަށް އައްޔަނުކުރުމަށް ވަނީ ފާސްކޮށްފައެވެ.

އިންޓަވިއުގައި އައްބާސް ވިދާޅުވީ މަގާމަށް އައްޔަން ކުރެވޭ ހިސާބުން ފެށިގެން ޕީޖީ އޮފީހުގެ މަސައްކަތްތައް ހަރުދަނާ ކުރުމަށް މަސައްކަތް ކުރާނެ ކަމަށާއި، ވަގުތަށް ވަރަށް ބޮޑަށް އިސްކަން ދޭނެ ކަމަށެވެ. އަދި ޕްރޮޑަކްޓިވިޓީ ރޭޓަށް ވަރަށް ބޮޑަށް ބަލާނެ ކަމަށް އޭނާ ވިދާޅުވިއެވެ.

ބައެއް މައްސަލަތަކަށް އިޝާރާތް ކުރައްވައި އައްބާސް ވިދާޅުވީ ދައުވާތައް އަވަސް ކުރުމަށް ކުރަންޖެހޭ މަސައްކަތްތައް ކުރާނެ ކަމަށެވެ.

އަންގާރަ ދުވަހު ވެސް ދައުރުން ބޭރުން ވަނީ މަޖިލިސް ޖަލްސާއެއް ބޭއްވުމަށް ވަނީ ނިންމާފައެވެ. ބެލެވޭގޮތުގައި އަންގާރަ ދުވަހުގެ ޖަލްސާއަށް އައްބާސް ޕީޖީގެ މަގާމަށް އައްޔަނުކުރަން ރުހުން ދިނުން އޮންނާނެއެވެ.