ބިލް ހުށަހަޅަނީ ވެސް ސަރުކާރުންނެވެ! ބޭރުކޮށްލަނީވެސް ސަރުކާރުންނެވެ. މި ދައްކަނީ މި ސަރުކާރުން މަޖިލީހަށް ހުށަހެޅި ފުރަތަމަ ބިލުގެ ވާހަކައެވެ. މި ސަރުކާރުގެ ފުރަތަމަ ބިލްގެ ގޮތުގައި ރައްޔިތުންގެ މަޖިލީހަަށް ހުށަހަޅާފައިވަނީ ސޮވްރިން ޑިވެލޮޕްމަންޓް ފަންޑުގެ ބިލެވެ. އެ ބިލް ރައްޔިތުންގެ މަޖިލީހަށް ހުށަހަޅާފައި ވަނީ ތުލުސްދޫ ދާއިރާގެ މެންބަރު އިބްރާހިމް ނަސީމެވެ.
ބިލު ހުށަހަޅަމުން ސަރުކާރުން ބުނީ ބިލު ހުށަހެޅުމުން ޔަގީންވަނީ މާލީ ގޮތުން ހަރުދަނާ ފިޔަވަޅުތަކެއް ރައީސް ޑރ. މުހައްމަދު މުއިއްޒު އަޅުއްވާނެކަން ކަމަށެވެ. އެތައް ތައުރީފެއް އެ ބިލާއި ގުޅޭގޮތުން ސަރުކާރަށް ކުރިއެވެ. ސަރުކާރުގެ ދުރުފެންނަ ސިޔާސަތުގެ ވާހަކައެވެ. މިހެން ގޮސް ކިތަންމެ ކިތަންމެ ވާހަކައެކެވެ.
ރައްޔިތުންގެ މަޖިލީހުގެ މަސައްކަތްތައް މި އަހަރަށް ފެށުމަށް ބޭއްވި ޖަލްސާގައި ރައީސް ޑރ. މުއިއްޒު އިއްވެވި ރިޔާސީ ބަޔާނުގައި އެމަނިކުފާނު ވަނީ، ސޮވްރިން ޑިވެލޮޕްމަންޓް ފަންޑުގައި ހުރި ޑޮލަރު، ކުރީ ސަރުކާރުން ބޭނުންކޮށް، ދިވެހި ރުފިޔާއަށް ބަދަލުކޮށްފައިވާކަމަށް ތުހުމަތުކުރައްވާފައެވެ. އަދި އެކަމުގެ ކަންބޮޑުވުން އެމަނިކުފާނު ފާޅުކުރެއްވިއެވެ. އެހެންކަމުން އޭރު އެ ބިލު ހުށަހެޅީ ރައީސް މަނިކުފާނުގެ ވާހަކަ އަކީ ހަގީގަތެއް ކަަމަށް އާއްމުންނަށް ދައްކަންތޯ ސުވާލު އުފެދެއެވެ.
އެހެނީ ބިލަށް ވޯޓުދޭން ވީ ވަގުތު އައިއިރު ސަރުކާރުން ދެއްކީ މުޅިން އެހެން މަންޒަރެކެވެ. މި ސަރުކާރުން މަޖިލީހަށް ހުށަހެޅި ސޮވްރިން ޑިވެލޮޕްމަންޓް ފަންޑުގެ ބިލަށް މަޖިލީހުގެ މިއަދުގެ ޖަލްސާގައި ވޯޓަށް އެހުމުން އެންމެ 2 މެންބަރުން ވޯޓު ދިނުމުން އެ ބިލު މަޖިލީހަށް ބަލައިނުގަނެ ވަނީ ބޭރުކޮށްލާފައެވެ.
މި ބިލަށް ވޯޓަށް އެހިއިރު 28 މެންބަރުން ތަޅުމުގައި ތިއްބެވި ނަމަވެސް ވޯޓުގައި ބައިވެރިވެވަޑައިގަތީ އެންމެ 2 މެންބަރުންނެވެ. އޭގެތެރެއިން އެއް މެމްބަރު ވޯޓު ދިނީ ބިލު ބަލައިގަތުމަށް ނުފެންނަ ކަމަށެވެ. މި ވޯޓު އެއްވަރުވުމުން ބިލު ބަލައި ނުގަތުމަށް ފާސްކުރެއްވީ ރިޔާސަތުގައި އިންނެވި މަޖިލީހުގެ ނައިބުރައީސް އަހުމަދު ސަލީމް އެގޮތަށް ވޯޓު ދެއްވުމުންނެވެ. ބިލް ބޭރުކޮށްލީ ސަރުކާރުންނޭ މިބުނީ މަޖިލީހުގެ މެޖޯރިޓީ އޮތް ގޮތުން ސުވާލެއް ނެތް މިންވަރަށް މެމްބަރުން ހާޒިރު ނުވާނަމަ ބިލް މަޖިލީހުން ބޭރު ވާނެކަން އެނގޭތީއެވެ.
އެ ބިލަށް ވޯޓަށް އަހާނެކަން ތަކުރާރުކޮށް އިއުލާންކުރި ނަމަވެސް ސަރުކާރު ޕާޓީއަށް ނިސްބަތްވާ އެއްވެސް މެމްބަރަކު ވޯޓު ގަޑީގައި ހާޒިރުވެވަޑައިގަންނަވާފައެއް ނުވެއެވެ. އެ ބިލުގައި ގަވަނިންގ ކައުންސިލުގެ ބެލުމުގެ ދަށުން ސޮވްރިން ފަންޑުގެ އިންވެސްޓްމަންޓް ކޮމިޓީއެއް އެކުލަވާލުމަށް ހިމަނާފައި އޮތެވެ.
ބިލާއި މެދު އަމަލުކުރި ގޮތުން ފެނުނީ ސަރުކާރުގެ މިސްރާބެއް ނެތްކަމެވެ. އަދި މަޖިލީހުގައި ތިބި ސަރުކާރުގެ މެންބަރުންގެ ޢައިރުޒިންމާދާރުކަމެވެ. ބިލަށް ވޯޓު ދިނުން ކީއްކުރަންހެއްޔެވެ. ވޯޓު ނަގަން ވަޑައިވެސް ނުގަތީއެވެ. އެހާވެސް ހަރުދަނާކަމެއް ނެތެވެ.
