މަކަރާއި ހީލަތުން ފައިސާ ހޯދުމުގެ ވާހަކައަކީ މިހާރު އާ ވާހަކައެއް ނޫނެވެ. ހީނުކުރާ ކަހަލަ ޗާލާކީ ގޮތްގޮތަށް ފައިސާ ދަވާލުމުގެ މަސައްކަތް, އެ މަސައްކަތްކުރާ މީހުން އެބަ ކުރެއެވެ. ތަފާތު ސްކީމްތަކުގެ ނަމުގައެވެ. ތަފާތު އެތައް ޕްރޮމޯޝަނެއްގެ ނަމުގައެވެ. މީސްމީޑިއާއާއި އެހެން ވަސީލަތްތައް ބޭނުންކޮށްގެން އޮޅުވާލައިގެން ފައިސާ ހޯދުމުގެ ކަންކަން ކުރާއިރު، މިހާރު އެކަން ކޮށްފައި ނުކުރާނެ ގޮތެއްވެސް ބުނެދޭން ދައްޗެެވެ. ހީވެސް ނުކުރާހާ އެފަދަ މީހުންގެ ހީލަތްތެރިކަން ބޮޑެވެ.
މި އިހަކަށް ދުވަހު ފޭސްބުކުން ފެނުނު ޕޯސްޓެކެވެ. އެ ޕޯސްޓުން ފެނުނީ ނިކަމެތިންނަށް ވަޅެއް ހަދިޔާ ކުރަން ބޭނުންނަމަ އެ ފުރުސަތު އޮތް ވާހަކަ ބުނުމުން, އެކަމަށް އިޖާބަ ދިން މީހެއްގެ ވާހަކައެވެ. ﷲ އަށްޓަކައި ނަމަވެސް އެފަދަ ފުރުސަތެއް ދޫކޮށްނުލާންވެެގެން އަވަހަށް އިޖާބަދިނީ ރާއްޖެއިން ބޭރުގައި ހާލުގައި އުޅުނު ބަޔަކަށް އެހީވުމުގެ މާތް މަގްސަދުގައެވެ. އެ ޕޯސްޓުގައި ބުނެފައި އޮތީ ވަޅު ބިނާކުރުމަށްފަހު އެ ވަޅުގެ ފޮޓޯވެސް ފޮނުވާނެކަމުގެ ވާހަކައެވެ. އެ ޕޯސްޓް ބަލާބެލުމަށް ޝައްކުކުރެވޭ ކަމެއް ނެތުމުން ވަރަށް އުފަލުން އެހީގެ އަތެއް ދިއްކޮށްލިއެވެ. އެހެންނަމަވެސް މި ޖެހުނީ ކެހިވެރި ދަންތުރައެއްގައިކަން އެނގުނީ މާ ފަހުންނެވެ.
ހެޔޮ ކަމެއް ކޮށްދިނުމުގެ ނިޔަތުގައި ފައިސާ ދެވުނީ އޮޅުވާލައިގެން ފައިސާ އޮޅުވާލާ ބަޔަކަށްކަން އެނގުނީ ވަޅުގެ މައުލޫމާތު ސާފުނުވެ، އެތައް މަހެއް ފާއިތުވުމުންނެވެ. އަދި އެއީ މިސްކީނުންނަށް އެހީވުމުގެ ނަމުގައި ހިންގާ ބޮޑު އޮޅުވާލުމެއްކަން އެނގުނީ އެހިސާބުންނެވެ. އެކަން އެހެން މީހުންގެ ސަމާލުކަމަށް އޭނާ ކުރި ޕޯސްޓުން އެނގުނީ މިއީ އޮޅުވާލައިގެން ފައިސާ ހޯދާ މީހުން ބޭނުންކުރާ އާ އުކުޅެއްކަމެވެ. އެފަދަ ހާދިސާތައް ދިމާވި މީހުން ވަނީ އެކަން ހިއްސާކޮށްފައެވެ. ހިތާމައަކީ މި އަމަލުތައް ހިންގާ މީހުން ދުވަހަކަށްވުރެ ދުވަހެއް ކުރިއަރައި ފަރިތަވަމުން ދާއިރު، އެކަން ހުއްޓުވޭނެ ގޮތެއް ނެތި އާއްމުން މާޔޫސްވާކަމެވެ.
މިހާރު މިފަދަ މީހުންގެ އަމަލުތައް ހީނުކުރާހާ ވިސްނުން ތޫނުކޮށެވެ. އޮންލައިން އެކި ކަހަލަ ހަރަކާތްތަކާއި، ލަކީޑްރޯގެ ނަމުގައި މިހާތަނަށްވެސް އޮޅުވާލައިގެން އެތައް ބަޔަކަށް އޮޅުވާލައިފިއެވެ. މިހާރު ﷲގެ ނަމުގައި ސަދަގާތަކަށް މީހަކަށް އެއްޗެއް ދިނުމުގެ ކުރިން، އެއީ ހަގީގަތުގައިވެސް ސަދަގާތެއްގެ ގޮތުގައި ކުރާ ހޭދައެއްކަން ކަަށަވަރުކުރަން އެބަޖެހެއެވެ. މިފަދަ ކަންކަމަށް ހުޝިޔާރު ނުވެއްޖެނަމަ އޮޅުވާލައިގެން ފައިސާ ހޯދާ މިފަދަ މީހުންގެ ޝިކާރައަކަށް ވުން އޮތީ ވަރަށް ގާތުގައެވެ.
