ރައީސް ނަޝީދުގެ ކާރުކޮޅު ކައިރީގައި އެއްޗެއް ގޮއްވާލުން

އެމްއެންޑީއެފުން ބުނީ މިހާދިސާގައި އަނިޔާވި ސިފައިންގެ ތިން ބޭކަލުންގެ ތެރެއިން އައިޖީއެމްއެޗްއަށް ގެންދެވުނު ސިފައިންގެ މީހާ ވަނީ ދޫކޮށްލާފައިވާ ކަމަށެވެ. އޭނާ އައިޖީއެމްއެޗްއަށް ގެންދެވުނީ ކަންފަތަށް ތަދުވާތީއެވެ. މީގެ އިތުރުން އޭޑީކޭ ހޮސްޕިޓަލަށް ގެންދެވުނު ދެ ސިފައިނުންނަށް ދަނީ ފަރުވާ ދެމުން ކަމަށާއި، ހާލު ރަނގަޅު ކަމަށް އެމްއެންޑީއެފުން މައުލޫމާތުދެއެވެ. އަދި އެމްއެންޑީއެފުން ބުނީ މިދެބޭކަލުންނަށް ލިބިފައިވަނީ ހަށިގަނޑުގެ ބައެއް ތަންތަނަށް ކުދި އަނިޔާތަކެއް ކަމަށެވެ.

ރައްޔިތުންގެ މަޖިލީހުން މިރޭ ބާއްވަން ތާވަްލުރި ހާއްސަ ޖަލްސާ، ރައީސް ނަޝީދަށް ލިބުނު ހަމަލާއާ ގުޅިގެން މެދުކަނޑާލައިފި

ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ މި ހާލަތުގައި ބަހުސްތަކެއް ކުރިއަށްގެންދަން ގަސްދު ނުކުރައްވާ ކަމަށެވެ. އެކަމަކު ޖަލްސާ ނިންމަވާ ނުލައްވާނެ ކަމަށާއި، އިތުރު ޓެކްނިކަލް މައުލޫމާތުތައް ލިބުމުން ޖަލްސާ އަލުން ކުރިއަށް ގެންދަވާނެ ކަމަށެވެ.

އީވާ ވަނީ އެކަމަނާގެ ނަމުގައާއި، މަޖިލީހުގެ ހުރިހާ މެމްބަރުންގެ ނަމުގައި އެ ހަމަލާ ކުށްވެރިކުރައްވާފައެވެ.

-ގަސްތު ކުރަނީ ޖަލްސާގައި ތިއްބަވަން.. މެދުކަނޑާލިޔަސް ޖަލްސާ ނުނިންމަން. މިވަގުތަށް މެދުކަނޑާލަން

ރައީސް ނަޝީދަށް ހަމަލާ ދިނުމާއި ގުޅިގެން މިރޭ މިރޭ ރައްޔިތިުންގެ މަޖިލީހުގެ ކުއްލި ޖަލްސާ އެއް ބާއްވަން ނިންމައިފިއެވެ.

ރާއްޖެޓީވީއަށް ހޯމް މިނިސްޓަރ އިމްރާން އަބްދުﷲ ދެއްވި ޚާއްސަ އިންޓަވިޔުއެއްގައި ވިދާޅުވީ ރައީސް ނަޝީދަށް އަމާޒުކޮށް މިދިން ހަމަލާގެ ތަހުގީގު ކުރިއަށްދާ ކަމަށެވެ. މި މިތަހުގީގުގައި ސިފައިނުންނާއި ފުލުހުން އަދި ބޭރުގެ ބޭފުޅުން ހަރަކާތްތެރިވަމުންދާ ކަމަށެވެ. މީގެ އިތުރުން ވިދާޅުވީ އެމަނިކުފާނުގެ ފުރާނަފުޅަށް ގެއްލުންވާފަދަ އަނިޔާއެއް ލިބިފައިނުވާ ކަމަށެވެ.

ރައްޔިތުންގެ މަޖިލީހުގެ ކުއްލި ޖަލްސާއެއް މިރޭ 10:30ގައި ބޭއްވުމަށް ތާވަލްކޮށްފައިވާ ކަމުގެ މައުލޫމާތު "ރާއްޖެއެމްވީ"އަށް ވަނީ ލިބިފައި

މިހަމަލާ އަކީ ސީދާ ރައީސް ނަޝީދަށް އަމާޒުކޮށް އެމަނިކުފާނަށް ގެއްލުން ދިނުމުގެ މަގްސަދުގައި ދިން ހަމަލާއެއް ކަމަށް އެމްޑީޕީގެ ޗެއަރ ޕާސަން ހަސަން ލަތީފް ވިދާޅުވެއްޖެއެވެ. "ރާއްޖެޓީވީ"ން މިހާރު ގެނެސްދެމުންދާ ލައިވް ކަވަރޭޖަށް މައުލޫމާތު ދެއްވަމުން ހަސަން ލަތީފް ވަނީ މިކަން ވީއެންމެ އަވަހަކަށް ތަހުގީގުކުރުމަށް ގޮވާލައްވާފައެވެ.

ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން އެމްއެންޑީއެފުން އަންނަނީ ހަރަކާތްތެރިވަމުން. އަދި މިކަމާއި ގުޅިގެން އެމްއެންޑީއެފްގެ ސެކިޔުރިޓީ ވަރުގަދަކޮށް އެލާޓް ސްޓޭޓަސް ވަނީ މަތިކޮށްފައި ކަމަށް އެމްއެންޑީއެފުން ބުނޭ

ކެބިނެޓްގައި ހިމެނިވަޑައިގަންނަވާ ބައެއް ވަޒީރުންގެ އިތުރުންގެ އެމްޑީޕީގެ މެމްބަރުން އަންނަނީ އޭޑީކޭ ހުންނަ ސަރަހައްދުގައި ހަރަކާތްތެރިވަމުންނެވެ. އަދި އެސަރަހައްދުގައި އަންނަނީ އަޑުގަދަކުރަމުންނެވެ.

ރައީސް ނަޝީދަށް އަމާޒުކޮށް ދިން ހަމަލާގައި ލިބިވަޑައިގެންނެވި އަނިޔާތަކަށް އޭޑީކޭގައި ފަރުވާ ހޯއްދަވަމުން އެމަނިކުފާނު ގެންދަވާއިރު އެހޮސްޕިޓަލަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަޑައިގަންނަވައިފިއެވެ.

އެއްޗެއް ގޮވި ސަރަހައްދުގައި ފުލުހުން ހަރަކާތްތެރިވަމުން އަންނަ ކަމަށް ފުލުހުން ބުނޭ. އަދި އެސަރަހައްދަށް އާންމުން ނުދިޔުމަށާއި އިތުރު ތަފްސީލު ދެމުން ގެންދާނެކަމަށް ފުލުހުން ބުނެއެވެ.

ހަމަލާދިން ސަރަހައްދުގައި ސިފައިން އަންނަނީ ހަތިޔާރާއެކު ހަރަކާތްތެރިވަމުން. އަދި އާންމުން ދުރަށް ޖައްސަމުން

ހަމަލާގައި ނަޝީދަށް ލިބިވަޑައިގެންނެވި ޒަހަމްތަކުގެ ތަފްސީލެއް އަދި ނޭނގެ. ނަމަވެސް ބައެއް މީހުން ބުނީ ނަޝީދުގެ މޫނުފުޅަށް ޒަހަމްތަކެއް ލިބިފައިވާ ކަމަށް. އޭޑީކޭގައި ފަރުވާ ހޯއްދަވަމުންދާ ކަމަށް މައުލޫމާތު ލިބޭ

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކާރުކޮޅަށް އަރުއްވަނިކޮށް އެއްޗެއް ގޮއްވާލުމާ ގުޅިގެން އެމަނިކުފާނަށް އަނިޔާވެއްޖެ.