ރައީސް ނަޝީދުގެ ހާލުކޮޅު ރަނގަޅުވަމުން އައި ނަމަވެސް ނުރައްކާ ބޮޑު

ރައީސް ނަޝީދުގެ ހާލުކޮޅު ރަނގަޅުވަމުން އައިނަމަވެސް، އެމަނިކުފާނުގެ ފުރާނަފުޅަށް އޮތް ނުރައްކާ ފިލައިގެން ނުދާކަމަށް ރައްޔިތުންގެ މަޖިލީހުން ބުނެފިއެވެ.

ރައީސް ނަޝީދަށް ލިބިވަޑައިގެންފައިވާ އަނިޔާތައް ފެންނަ ފޮޓޯތައް އެމަނިކުފާނުގެ އިޒުނަޔާއެކު އާންމުކުރިތާ ކުޑަ އިރުކޮޅެއްގެ ތެރޭގައި މަޖިލީހުން ނެރުނު ބަޔާނުގައި ބުނެފައިވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް 06 މޭ 2021 ބުރާސްފަތި ދުވަހުގެ ރޭ ދިން ޓެރަރިސްޓް ހަމަލާގައި އެމަނިކުފާނުގެ ފުރާނަފުޅަށް ނުރައްކާވި ޒަޚަމްތަކަށް އޭޑީކޭގެ ޚާއްސަ ޑޮކްޓަރުންގެ ޓީމަކުން ފަރުވާދެއްވުމަށްފަހު، މިހާރު ގެންދަވަނީ ޖަރުމަނުވިލާތުގައި އިތުރު ފަރުވާ ހޯއްދަވަމުން ކަމަށެވެ.

ރައީސް މުހައްމަދު ނަޝީދުގެ ފުރާނަފުޅަށް އަމާޒުކޮށްގެން ދީފައިވާ މި ހަމަލާއިން އެމަނިކުފާނުގެ ހާލުކޮޅު ރަނގަޅުވަމުން އައި ކަމުގައި ވީނަމަވެސް، އެމަނިކުފާނުގެ ފުރާނަފުޅަށާއި ދިވެހި ރައްޔިތުންނަށް އޮތް ނުރައްކާ ފިލައިގެން ނުދާކަމަށް މަޖިލީހުން ނެރުނު ބަޔާނުގައި ވެއެވެ. ހަރުކަށި ފިކުރަށް ނިސްބަތްވާ ބަޔަކު ހިންގަމުންދާ މިފަދަ އަމަލުތައް ހަރުކަށި އިބާރާތުން ކުށްވެރިކުރުމާއެކު މިފަދަ އަމަލުތަކުން ރާއްޖޭގެ ރައްޔިތުން ނުރައްކަލަށް ހުށަހެޅިފައިވާކަމީ ނުހަނު ކަންބޮޑުވާ ކަމެއްކަމުގައިވެސް ބަޔާނުގައިވެއެވެ.

ރައީސް ނަޝީދު ދިރިއުޅުއްވާ ކެނެރީގެ ކައިރީގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް ވަދެ މުހިއްމު ގުނަވަންތައް ފޫއަޅުވާލި ރޭޒާފުއްތައް ނަގަން 16 ގަޑިއިރުގެ އޮޕަރޭޝަންތަކެއް ކުރިއެވެ.

ރައީސް ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރެއްވި މައުލޫމާތުތަކަށް ބަލާއިރު، ރައީސް ނަޝީދުގެ ފުރާނަފުޅު ސަލާމަތްކުރެވުނީ ހަމަ ކިރިޔާއެވެ.

މާލޭގައި ދިން ޓެރަރިސްޓް ހަމަލާގައި ރައީސް ނަޝީދަށް ލިބިވަޑައިގެންނެވި ޒަޚަމްތަކަށް އޭޑީކޭގައި ފަރުވާ ހޯއްދެވުމަށް ފަހު ބޭރަށް ފުރާ ވަޑައިގެންނެވީ ބުރާސްފަތި ދުވަހުގެ ހެނދުނެވެ.

ރައީސް ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް ބަންދުގެ މުއްދަތު ޖަހައިފައެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނުނަމަވެސް ބޮޑަށް ގުޅެނީ ހަރުކަށި ފިކުރާ ކަމަށް ފުުލުހުން މިހާތަނަށް އާއްމުކުރި މައުލޫމާތުތަކުން އެނގެއެވެ.