ޖޭޕީއާއި ނަޝީދު ފެކްޝަނުގެ ޖޮއިންޓް ޕާލިމެންޓަރީ ގުރޫޕެއް އެކުލަވާލުމަކީ ގާނޫނު ދަންނަ ކަމެއް ނޫން، ޕާޓީގެ ގަވާއިދާ ޚިލާފުވާނަމަ ފިޔަވަޅު އަޅާނެ: އަސްލަމް
ޖޭޕީއާއެކު މަސައްކަތް ކުރެވޭނެ ކަމަށް ނަޝީދު ފެކްޝަނުން ބުނޭ
ހިތަދޫ އުތުރު ދާއިރާގެ މެންބަރު، މުހައްމަދު އަސްލަމް
މޯލްޑިވިއަން ޑިމޮކްރެޓިކް ޕާޓީގެ, "ފިކުރެއްގެ ދިރުން" ފެކްޝަނާއި ޖުމްހޫރީ ޕާޓީން ޖޮއިންޓް ޕާލިމަންޓަރީ ގުރޫޕެއް އެކުލަވާލުމަކީ ގާނޫނާއި ގަވާއިދު ދަންނަ ކަމެއް ނޫންކަމަށް، އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެއެވެ.
އެމްޑީޕީ ރިޔާސީ ޕްރައިމަރީން ކުރިމަތިވި ނާކާމިޔާބީއަށްފަހު، ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދާއި އެމަނިކުފާނަށް ތާއީދުކުރައްވާ މެންބަރުން މަސައްކަތް ކުރައްވަމުން އަންނަނީ ވަކިންނެވެ. އަދި މާޗް 14 ވީ އަންގާރަ ދުވަހުގެ ރޭ، ފިކުރެއްގެ ދިރުމުގެ ފުރަތަމަ ޕީޖީ ބައްދަލުވުން ވަނީ ކުރިއަށް ގެންގޮސްފައެވެ.
މި ބައްދަލުވުމަށްފަހު ބައެއް މީޑިއާތަކަށް މެދުހެންވޭރު ދާއިރާގެ މެންބަރު އަލީ އާޒިމް ވިދާޅުވީ، ޖޭޕީއާއެކު އެ ފެކްޝަނުން އައީ މަޝްވަރާ ކުރަމުން ކަމަށާއި، އެކުގައި މަސައްކަތް ކުރެވޭނެ ކަމަށް ގަބޫލުކުރައްވާ ކަމަށެވެ. އަދި ފިކުރެއްގެ ދިރުން ފެކްޝަނާއި ޖޭޕީގެ މަޖިލިސް މެމްބަރުން ގުޅިގެން ޖޮއިންޓް ޕާލަމެންޓްރީ ގްރޫޕެއް ހެދުމަށް މަޝްވަރާ ކުރަމުންދާކަމަށެވެ.
މިކަމާ ގުޅިގެން ރާއްޖެއެމްވީއަށް އަސްލަމް ވިދާޅުވީ، އިތުރު ޖޮއިންޓް ޕާލިމެންޓަރީ ގުރޫޕެއް އެކުލަވާލުމަކީ ގާނޫނާއި ގަވާއިދު ދަންނަ ކަމެއްނޫން ކަމަށެވެ. ޕާޓީގެ ގަވާއިދާ ޚިލާފުވާނަމަ، އޮންނަ އުސޫލުގެ ތެރެއިން ފިޔަވަޅު އަޅާނެ ކަމަށާއި، އެމްޑީޕީގައި ފިޔަވަޅު އަޅާ ކޮމެޓީއެއް އޮންނަ ކަމަށެވެ. އަދި ޕީޖީ ގުރޫޕުންވެސް އަމަލުކުރާނީ ގަވާއިދާއި އުސޫލާ އެއްގޮތަށް ކަމަށް އަސްލަމް ވިދާޅުވިއެވެ.
ފިކުރެއްގެ ދިރުން ފެކްޝަނާއި ޖޭޕީން މަޝްވަރާތައް ގެންދާއިރު، އިސްވެ އޮވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރައްވަން އެޕާޓީގެ ލީޑަރު ގާސިމް އިބްރާހީމް ވަނީ ނިންމަވާފައެވެ.
