"އަދީބު ދެއްވި ދަބަހުގައި ހުރީ ދިޔާ އެއްޗެއް، ފައިސާއެއް ނޫން"
އަދީބާ ދެމެދު ދެކެވިފައިވާކަމަށް ބުނާ ވާހަކަތަކެއްގެ ޗެޓްލޮގް ތަކެއްވެސް ވަނީ ލީކުވެފައި
މެދުހެންވޭރު ދާއިރާގެ މެމްބަރު އަލީ އާޒިމް- އާޒިމް ވިދާޅުވީ، އޭނާގެ މައްސަލައެއްގައި ދައުވާކުރާ ހިސާބުން އިސްތިއުފާ ދެއްވާނެ ކަމަށް
އެމްއެމްޕީއާރްސީ ޚިޔާނާތުގެ ލިސްޓުގައި ނަން ހިމެނިފައިވާ މެދުހެންވޭރު ދާއިރާގެ މެމްބަރު އަލީ އާޒިމްއަށް އެއްވެސް އިރެއްގައި ޚިޔާނާތުގެ ފައިސާ ލިބިވަޑައިގެންފައިވާ ނުވާ ކަމަށް އޭނާ ވިދާޅުވެއްޖެއެވެ.
ޚިޔާނާތުގެ ލިސްޓުގައި އާޒިމްގެ ނަން ހިމެނިފައިވާއިރު، އާޒިމްއާއި ކުރީގެ ނާއިބްރައީސް އަހުމަދު އަދީބާ ދެމެދު ދެކެވިފައިވާކަމަށް ބުނާ ވާހަކަތަކެއްގެ ޗެޓްލޮގް ތަކެއްވެސް ދަނީ މީސްމީޑިއާގައި ދައުރުވަމުންނެވެ. އެގޮތުން ކަނބާލިފަރުގެ ކޮންސްޓްރަކްޝަން ލެޓަރ ހޯދުމަށް އަދީބު ގާތުން އެދިފައިވާ މެސެޖުތަކަކާއި، އޭސީސީއަށް މެމްބަރުން އައްޔަން ކުރުމާމެދު ކުރެވިފައިވާ މަޝްވަރާތަކުގެ އިތުރުންވެސް އޭރުގެ ސިޔާސީ މަސްރަޙުގައި ހިނގާފައިވާ މުހިއްމު ކަންކަމާ ގުޅޭގޮތުން ވާހަކަ ދެކެވިފައިވާ ޗެޓްލޮގްތަކެއް ދަނީ ދައުރުވަމުންނެވެ.
އޭގެ އިތުރުން، އަދީބުއާއެކު ބައްދަލުވުންތަކެއް ރާވާފައިވާ މެސެޖުތަކާ ގުޅޭގޮތުން "އަދަދު"އަށް ދެއްވި އިންޓަރވިއުއެއްގައި އާޒިމް ވިދާޅުވީ، އެ ދުވަހު ދަބަހެއް ގެނައުމަށް އަދީބު އޭނާގެ ގާތުގައި ބުނީ އަބްދުﷲ ޖަލީލް (ކޭންސޭޓް)އަށް ދޭން ވެގެން "ދިޔާ އެއްޗެއް" ގެންދިއުމަށް ކަމަށެވެ. ނަމަވެސް އެއީ ކޮން އެއްޗެއްކަން އިންޓަރވިއުގައި ވިދާޅުވެފައެއް ނުވެއެވެ. އާޒިމް ވަނީ ސިޔާސީ ކަންކަން "ސުމޫތުކޮށް" ގެންދަން އިދިކޮޅު މީހުންނާ ވާހަކަ ދައްކަން ޖެހޭކަން ފާހަގަ ކުރައްވައި، އެ މަޤްސަދުގައި އަދީބާވެސް ވާހަކަތައް ދެކެވިފައި ހުންނާނެކަމަށް ވިދާޅުވެފައެވެ.
އާޒިމް ވަނީ ކަނބާލިފަރުގެ ކޮންސްޓްރަކްޝަން ލެޓަރ ހޯދުމަށް އަދީބު ގާތުން އެދިފައިވާ މެސެޖުތަކާ ގުޅޭގޮތުންވެސް މި އިންޓަރވިއުގައި ވާހަކަ ދައްކަވާފައެވެ. އެގޮތުން އާޒިމް ވިދާޅުވީ، އަދީބު ގާތުން އެ ރިސޯޓުގެ ކަމަކު އެދެން ޖެހުނީ ސަރުކާރުގެ ތެރެއިން ލިބެން ޖެހޭ އެހީތެރިކަން ނުލިބިގެން ކަމަށެވެ. ނަމަވެސް ޗެޓްލޮގްތަކާ ގުޅޭގޮތުން މީގެ ކުރިން ރާއްޖެއެމްވީން ސުވާލުކޮށްލުމުން އާޒިމް ވަނީ އެއީ ހައްތާވެސް ފިތުނަކަމަށް ސިފަ ކުރައްވާފައެވެ.
އާޒިމް އިތުރަށް ވިދާޅުވީ، އޭނާގެ މައްސަލައެއް ތަހުގީގުކޮށް ނިމިގެން ކޯޓާ ހިސާބަށް ދާ ހިސާބުން މެމްބަރުކަމުން އިސްތިއުފާ ދެއްވާނެ ކަމަށެވެ.
ކުރިން ތަހުގީގީ އިދާރާތަކުން އާންމުކޮށްފައިވާ ލިސްޓުގައި ނުހިމެނޭ 14 މީހުންގެ ނަމާއެކު، އެމްއެމްޕީއާރްސީގެ ޚިޔާނާތުގައި ހިމެނޭ މެންބަރުންގެ އައު ލިސްޓެއް އާންމުކޮށްފައިވާއިރު، އެސެޓް ރިކަވަރީ ކޮމިޝަނުގެ ރައީސް އަހުމަދު އަސްއަދަށް އެޑްރެސް ކުރައްވައި އާޒިމް މީގެ ކުރިން ވަނީ ލިސްޓުގައި އޭނާގެ ނަން ހިމަނާފައިވަނީ ސިޔާސީ ގޮތުން ދައްކާ ވާހަކަތައް ބަލައި ނުގަނެވޭތީ ނަން ކިލަނބުކޮށްލުމުގެ ބޭނުމުގައި ކަމަށް ތުހުމަތު ކުރައްވައި، ނަން އަނބުރާ ނެންގެވުމަށް އެދިވަޑައިގެންފައެވެ.
