މަޖިލިސް މެންބަރުންނާއި ސަރުކާރާއި ގުޅުން އޮންނަ ފަރާތްތަކުގެ ކުންފުނިތަކަށް ޕްރޮޖެކްޓް ބަހާލި މައްސަލަ ހޯމަ ދުވަހު އެމްޑީޕީ އިން އޭސީސީ އަށް ހުށަހަޅަނީ
މާލިއްޔަތު ގަވާއިދަށް ހުށަހެޅި އިސްލާހުގައި ވަޒީރު ބޭނުންފުޅު ފަރާތަކަށް އިވެލުއޭޝަނެއް ނެތި ޕްރޮޖެކްޓް ދެވިދާނެ ކަމަށް ބުނެފައިވުމަކީ މާލިއްޔަތު ޤާނޫނާއި ޚިލާފު ކަމެއް
206 ޕްރޮޖެކްޓް ބިޑަކާއި ނުލާ ހަވާލުކުރި ރަސްމިއްޔާތުގައި އެންމެ ގިނަ ފައިސާ ލިބުނު ކުންފުންޏަކާއި ގުޅުން އޮންނަ މަޖިލީހުގެ ރައީސް އަބްދުއްރަހީމު އާއި ރައީސް މުއިއްޒު ސަލާމް ކުރައްވަނީ
މަޖިލިސް މެންބަރުންނާއި ސަރުކާރާއި ގުޅުން އޮންނަ ފަރާތްތަކުގެ ކުންފުނިތަކަށް ޕްރޮޖެކްޓް ބަހާލި މައްސަލަ، އެމްޑީޕީގެ ގައުމީ މަޖިލީހުން ފާސްކުރި ގޮތަށް ހޯމަ ދުވަހު އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅަން އެ ޕާޓީ އިން ނިންމައިފި އެވެ.
އެމްޑީޕީގެ ގައުމީ މަޖިލީހުން ފާސްކުރި ގޮތަށް "ދައުލަތުގެ މުއައްސަސާތަކުން މި ޖަރީމާ ތަހުގީގުކޮށް، އަވަހަށް ޤާނޫނީ ފިޔަވަޅު އެޅުމަށް ގޮވައިލުމާއިއެކު އެ މައްސަލަ ކަމާ ބެހޭ ފަރާތްތަކަށް ހުށަހެޅުން" މި ނުކުތާގެ ދަށުން ހޯމަ ދުވަހުގެ 11 ޖަހާ އިރު އޭސީސީ އަށް ހުށަހެޅުމަށް ވަނީ ނިންމާފަ އެވެ.
މައުލޫމާތު ލިބިފައިވާ ގޮތުގައި އެމްޑީޕީގެ ލީގަލް ޓީމުން މިހާރު މަސައްކަތް ކުރަމުން ދަނީ ހޯމަ ދުވަހު މި މައްސަލަ ހުށަހެޅުމަށް ވާންޖެހޭ ތައްޔާރީތަކުގެ މަސައްކަތެވެ.
ގައުމީ މަޖިލީހަށް ގަރާރު ހުށަހެޅުއްވީ ހޯރަފުށީ ދާއިރާގެ ކުރީގެ މެންބަރު އަދި އެ ދާއިރާގެ ރައީސް އަހުމަދު ސަލީމު އެވެ.
ސަލީމް ވިދާޅުވީ ބިޑަކާއި ނުލާ ވާދަވެރި ފަރާތްތަކަށް ފުރުސަތު ނުލިބޭ ގޮތަށް ސަރުކާރުގެ މަޝްރޫޢުތައް ބަހާލުމަކީ ވަރަށް ބޮޑު ކަންބޮޑުވުމެއް ކަމަށެވެ. ކެބިނެޓުން ބޭނުންވާ ބަޔަކަށް ބޭނުން އަގެއްގައި މަޝްރޫޢުތައް ބަހާލީ މާލިއްޔަތު ޤަވައިދަށް އިސްލާހު ގެނައުމަށް ފަހުގައިކަން އޭނާ ވަނީ ފާހަގަކުރައްވާފައެވެ. އަދި އެ ބަދަލު ގެނެސްފައި ވަނީ މާލިއްޔަތު ޤާނޫނާއި ޚިލާފަށް ކަމަށް ސަލީމް ވަނީ ފާހަގަކުރައްވާފައެވެ.
މާލިއްޔަތު ޤަވައިދަށް މި ފަހުން ގެނެސްފައިވާ އިސްލާހުގައި ބުނެފައި ވަނީ ވަޒީރު ބޭނުން މީހަކަށް ބޭނުން ޕްރޮޖެކްޓެއް ދެވިދާނެ ކަމަށެވެ. އަދި އެވޯޑު ކުރުމުގައި އެއްވެސް އިވެލުއޭޝަނެއް، ގާބިލް ކަމަކަށް ބަލަން ނުޖެހޭނެ ކަމަށް އެ އިސްލާހުގައި ބުނެފައިވެ އެވެ. ހަމައެހެންމެ ވަޒީރު ބޭނުންފުޅު ޕޮރޮޖެކުޓަކަށް އެޑުވާންސް ޕޭމަންޓް ގެރެންޓީ، ޕާފޯމެންސް ގެރެންޓީ ނެތި 15% އާއި ހަމައަށް ފައިސާ ދެވިދާނެ ކަމަށް އެ އިސްލާހުގައި ބުނެފައިވެ އެވެ.
މީގެ އިތުރުން ސަރުކާރުން ހަވާލު ކުރި މަޝްރޫޢުތައް އިއުލާންކޮށްފައި ނުވުމާއި ސަރުކާރާއި ގުޅުން ހުރި ފަރާތްތަކަށް ނިސްބަތްވާ ކުންފުނިތަކަށް ނޫން ބަޔަކަށް ބީލަމުގައި ބައިވެރި ނުވެވުމާއި ކޮންޓްރެކްޓަރުންގެ ދަފްތަރުގައި ނެތް ކުންފުނިތަކަށް މަޝްރޫޢުތައް ހަވާލުކޮށްފައި ވާތީ އެކަމުގެ ކަންބޮޑުވުން އެ ގަރާރުގައި ވަނީ ފާޅުކޮށްފަ އެވެ. އުވާލުމުގެ މަރުހަލާގައި ވާ ކުންފުނިތަކަށް މަސައްކަތް ހަވާލުކޮށްފައިވާ އިރު އެ ކުންފުނިތަކުގެ ފަންނީ، މާލީ އަދި މަސައްކަތުގެ ތަޖުރިބާ އަށް ބަލާފައި ނުވާ ކަމަށް އެ ގަރާރުގައި ބުނެފައިވެ އެވެ.
ހަމައެހެންމެ އެއް ބާވަތެއްގެ ޕްރޮޖެކްޓްތައް އެކި އަގުގައި ދީފައިވާ ކަން ވެސް ސަލީމް ހުށަހެޅުއްވި ގަރާރުގައި ފާހަގަކޮށްފައިވެ އެވެ. އެހެންކަމަށް ވާއިރު މާލިއްޔަތު ޤަވައިދާއި ޚިލާފަށް ޤަވައިދެއް ހަދައިގެން ވަކި ބަޔަކަށް ބޮޑެތި އަގުގައި މަޝްރޫޢުތައް ދިނުމަކީ ޤާނޫނުއަސާސީ އާއި ޚިލާފު ކަމެއް ކަމަށް ސަލީމް ވިދާޅުވިއެވެ. އެ ޕްރޮޖެކްޓްތައް ދިނުމަށް އެކުލަވާލި އެއްބަސްވުންތައް ވެސް ސައްހަ ނުވާނެކަން ސަލީމް ވަނީ ފާހަގަކުރައްވާފަ އެވެ.
އޭސީސީ ހިމެނޭހެން ކަމާ ބެހޭ މުވައްސަސާތަކަށް މައްސަލަ ހުށަހެޅުމުގެ އިތުރުން ޕްރޮޖެކްޓްތައް ދީފައި ވަނީ ޤާނޫނާއި ޚިލާފަށް ކަމަށް ވާތީ އެ އެއްބަސްވުންތައް ބާތިލް ކުރުމަށް ސަރުކާރާއި އެކަމުގައި ބައިވެރިވާ ކުންފުނިތަކަށް ގޮވާލުމުގެ އިތުރުން މާލިއްޔަތު ގަވާއިދަށް ހުށަހެޅު ބަދަލު ބާތިލު ކުރުމަށް ކޯޓަށް ހުށަހެޅުމާއި، މަޝްރޫޢުތަކަށް ފައިސާ ދޫކުރުން ހުއްޓުވުމަށް ކޯޓުގައި އަމުރަކަށް އެދުމާއި، ދެން އޮންނަ އެމްޑީޕީ ސަރުކާރެއްގައި މި މައްސަލަތައް ބަލާ ފިޔަވަޅު އެޅުން އަދި މި މައްސަލަތައް ބެލުމަށް އިންކާރު ކުރާ މީހުން ދެން އުފެދޭ އެމްޑީޕީގެ ސަރުކާރެއްގައި މަޤާމުތަކުން ވަކިކޮށް، ރަސްމީ ވާޖިބް އަދާ ނުކުރި މައްސަލަ އާއި ކޮރަޕްޝަން އަށް މަގުފަހިވާ ގޮތަށް އަމަލު ކުރި މައްސަލަ ބަލާ ފިޔަވަޅު އެޅުން ފާސްކުރި ގަރާރު ގައި ހިމެނެ އެވެ.
ބޭނުންގޮތަކަށް ސަރުކާރުން ބަހާލި މި މަޝްރޫއުތައް ހިންގަނީ ސަރުކާރުން ދޭ ޔަޤީންކަމާއި އެކު ބީއެމްއެލްއިން ކުންފުނިތަކަށް ލޯނު ދީގެންނެވެ. އެ ލޯނުތައް ދޫކުރަނީ 9 ޕަސެންޓު އިންޓަރެސްޓު ރޭޓުގަ އެވެ. އެހެންކަމުން ބީއެމްއެލްގެ ވެރިންނަށް ފިޔަވަޅު އެޅުމަށް ވެސް ސަލީމްގެ ގަރާރުގައި ވަނީ ގޮވާލާފަ އެވެ.
އެ ގަރާރު ފާސްކޮށްފައި ވަނީ ގައުމީ މަޖިލީހުގެ ހޮނިހިރު ދުވަހުގެ ޖަލްސާގައި ބައިވެރިވި މެމްބަރުންގެ އިއްތިފާގުންނެވެ.
