ރަށު ކައުންސިލްތަކާ ގުޅިގެން ހޯމް މިނިސްޓްރީން އީދު ފާހަގަކޮށްފި

މިނިސްޓްރީ އޮފް ހޯމް އެފެއާޒް އާއި ރަށު ކައުންސިލްތައް ގުޅިގެން ކުލަގަދަ ގޮތެއްގައި އީދު ފާހަގަ ކޮށްފިއެވެ.

ހޯމް މިނިސްޓްރީން ބުނީ ބުރާސްފަތި ދުވަހު ރަށު ކައުންސިލްތަކާއި ގުޅިގެން ފިތުރު އީދު ފާހަގަ ކުރުމުގެ ގޮތުން އީދު ނަމާދަށްފަހު 'އީދު ސައި'ގެ ނަމުގައި ރަށްރަށުގައި އީދު ސައި ބޭއްވުނު ކަމަށެވެ. މިހަރަކާތް ކުރިޔަށް ގެންދެވުނީ ކޮވިޑް-19 އާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)ން ކަނޑައަޅާފައިވާ އުސޫލާއި އެއްގޮތަށް ކަމަށް ވެސް މިނިސްޓްރީން ބުނެއެވެ.

މި ހަރަކާތް 8 ރަށެއްގައި ކުރިޔަށް ގެންގޮސްފައިވާއިރު މިނިސްޓްރީ އޮފް ހޯމް އެފެއާޒްގެ ޑެޕިއުޓީ ޑިރެކްޓަރ އައްބާސް މުހައްމަދު ވިދާޅުވީ ކުރިން މި ހަރަކާތް ދިހަ ރަށެއްގައި ކުރިޔަށް ގެންދަން ނިންމި ކަމަށާއި، އެކަމަކު ކޮވިޑްގެ ހާލަތު ގޯސްވުމުން ދެ ރަށެއް ބައިވެރި ނުވާ ކަމަށެވެ. އީދު ދުވަހު މި ހަރަކާތް ކުރިޔަށް ގެންގޮސްފައިވަނީ ބ. މާޅޮސް، ރ. ކިނޮޅަސް، ހއ. ތުރާކުނު، ހދ. ނެއްލައިދޫ، ނ. ކުޑަފަރި، އއ، މާޅޮސް އަދި ފ. ދަރަނބޫދޫގައެވެ.

މިނިސްޓްރީން ބުނީ މިއީ ރަށުގެ ރައްޔިތުންގެ މެދުގައި އެކުވެރިކަން އާލާކުރުމާއި، އީދުގެ ތަހުނިޔާ ބަދަލުކުރުމާއި އަދި އީދުގެ އުފަލުގައި ރައްޔިތުން ބައިވެރިވުމަށް މަގުފަހި ކޮށްދިނުމަށްޓަކައި މިނިސްޓްރީ އާއި ރަށްރަށުގެ ކައުންސިލްތަކާއި ގުޅިގެން ކުރިޔަށް ގެންދިޔަ ހަރަކާތެއް ކަމަށެވެ.