ނޭކުރެންދޫ ޖަލަށް ލިބުނު ބަޖެޓުން ނިމޭނީ ޖަލުގެ ވަށާފާރާއި ކޮންސެޕްޓު އަދި ތަފްސީލީ ކުރެހުމުގެ މަސައްކަތް – އިމްރާން

ބަޖެޓް ލިބިފައިވާގޮތުން 2023 ވަނަ އަހަރުގެ ނިޔަލަށް، ނޭކުރެންދޫ އިންޑަސްޓްރިއަލް ޖަލުގެ ނިންމާލެވޭނީ ވަށާފާރާއި ކޮންސެޕްޓު އަދި ތަފްސީލީ ކުރެހުމުގެ މަސައްކަތް ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ޖަލުގެ މަސައްކަތާއި ގުޅޭގޮތުން މިނިސްޓަރު މިހެން ވިދާޅުވެފައިވަނީ މަކުނުދޫ ދާއިރާގެ މެންބަރު މުހައްމަދު ރާއީ ކުރެއްވި ސުވާލުގެ ޖަވާބުގައެވެ. ލިޔުމުން މިނިސްޓަރު މަޖިލީހަށް ފޮނުއްވި ޖަވާބުގައި ވިދާޅުވެފައިވަނީ މި ޕްރޮޖެކްޓުގެ މަސައްކަތް ލަސްވެ، ދިގުލައިގެން ދިއުމަށް މައިގަނޑު ގޮތެއްގައި މެދުވެރިވީ ކޮވިޑާއި ގުޅިގެން ކުރިމަތިވި މާލީ ގޮންޖެހުންތަކާއެކު، ޕްރޮޖެކްޓްތަކުގެ ބަޖެޓު ކުޑަކުރުމުން ކަމަށެވެ. މިގޮތުން، މި ޕްރޮޖެކްޓަށް މިއަހަރަށް ލިބިފައިވަނީ 10 މިލިއަން ރުފިޔާ ކަމަށާއި، އަދި އަންނަ އަހަރަށް ވެސް ހަމަޖައްސައިދެއްވާފައި ވަނީ ވެސް 10 މިލިއަން ރުފިޔާ ކަމަށް މިނިސްޓަރުގެ ޖަވާބުގައި ވިދާޅުވެފައިވެއެވެ.

Advertisement

މިނިސްޓަރު ވިދާޅުވީ މި މަޝްރޫއު މި ދައުރުގެ ތެރޭގައި ކުރިއަށް ގެންގޮސް ނިންމުމަށް އުއްމީދުކޮށް އެޓާގެޓު ހާސިލު ކުރުމަށް ގިނަ މަސައްކަތްތަކެއް ކުރެވުނު ނަމަވެސް، މި ފައިސާއިން 2023 ވަނަ އހަރުގެ ނިޔަލަށް، ނިންމާލެވޭނެ ކަމަށް އެސްޓިމޭޓްކުރެވެނީ ޖަލުގެ ވަށާ ފާރާއި އަދި ޖަލުގެ ކޮންސެޕްޓާއި، ތަފްސީލީ ކުރެހުމުގެ މަސައްކަތް ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މި މަޝްރޫއަކީ ޖަލުގެ ހާލަތު ރަނގަޅުކޮށް، ގައިދީން ޖަލުގައި ހޭދަކުރާ މުއްދަތުގައި އެފަރާތްތަކަށް ބޭނުންވާ އެކިކަހަލަ ހުނަރުތައް ދަސްކޮށްދީ، ރިހިބިލިޓޭޓްކޮށް ރަނގަޅު ބައެއްގެ ގޮތުގައި އެފަރާތްތައް މުޖްތަމައުއަށް ނެރުމަށްޓަކައި ކޮންމެހެން ކުރިއަށް ގެންދަންޖެހޭ މަޝްރޫއެއްކަމުގައިވާތީ، މިދައުރުގެ ތެރޭގައި މި މަސައްކަތް ނިންމާނުލެވުނު ކަމުގައިވީނަމަވެސް، ކުރިއަށް އޮތް ދައުރުގައިވެސް މި މަޝްރޫއު ހުއްޓާނުލާ ކުރިއަށް ގެންގޮސް ނިންމާނެކަމުގައި ގަބޫލުކުރައްވާ ކަމަށެވެ.

އަދި އެނގިހުރެ މި މަޝްރޫއާ ގުޅޭގޮތުން އެއްވެސް ދޮގެއް ހަދާފައިނުވާނެކަމުގެ ޔަގީންކަން ރައްޔިތުންގެ މަޖިލީހުގެ މެންބަރުންނަށާއި، އަދި މަކުނުދޫ ދާއިރާގެ ރައްޔިތުންނަށް އަރުވާ ކަމުގައި މިނިސްޓަރު ވިދާޅުވިއެވެ.

މިނިސްޓަރުގެ ޖަވާބުގައި ވިދާޅުވެފައިވަނީ ހދ. ނޭކުރެންދޫގައި އިންޑަސްޓްރިއަލް ޖަލެއް އެޅުމުގެ މަސައްކަތަކީ މި ސަރުކާރުން އެންމެ އިސްކަންދޭ ސިޔާސަތު ކަމުގައިވާ ޖަލުގެ ހާލަތު ރަނގަޅުކޮށް ތޮއްޖެހުން ކުޑަކުރުމުގެ ސިޔާސަތުގެ ދަށުން ކުރިއަށް ގެންދެވޭ މަޝްރޫއެކެވެ.

މިނިސްޓަރު ވިދާޅުވީ ނޭކުރެންދޫ ޖަލު އެޅުމަށް 2020 ގައި ލިބުނު ބަޖެޓަކީ 17 މިލިއަން 4 ލައްކަ ރުފިޔާ ކަމަށެވެ. ކޮވިޑާއެކު އިގްތިސާދަށް ކުރިމަތިވި ހީނަރުކަމާއެކު، މިނިސްޓްރީ އޮފް ފިނޭންސްނުން މި ބަޖެޓުގެ ބޮޑުބައެއް ކަނޑާލުން ބާކީ ލިބުނީ އެންމެ ދޮޅުކައްލަ ރުފިޔާ ކަމަށެވެ. މިނިސްޓަރު ވިދާޅުވީ މި ފައިސާއިން ޖަލު ސަރަހައްދުގެ ރުއްގަހަށް ބަދަލު ދިނުމަށް މަސައްކަތް ކުރެވުނު ނަމަވެސް ޖަލު ސަރަހައްދުގެ ބަދަލު ދިނުމަށް ތިންލައްކަ އެކާވީސް ހާސް ހަސަތޭކަ ސާޅީން ތިން ރުފިޔާ އަށްޑިހަ ތިންލާރި ހަރަދުވާތީ މި ފައިސާއިން މިކަންވެސް ނުކުރެވި 2021 ވަނަ އަހަރުގެ ބަޖެޓުން މިކަން ކުރާ ގޮތަށް ނިންމި ކަމަށެވެ.  މިގޮތުން ރުއްގަހަށް ބަދަލުދިނީ 2021 ވަނަ އަހަރުގެ ބަޖެޓުން ކަމަށާއި، ނޭކުރެންދޫ ޖަލު އެޅުމަށް 2021 ގައި ވެސް ލިބުނީ 17 މިލިއަން 4 ލައްކަ ރުފިޔާ ކަމަށެވެ.