އެމްޕީއެލްގައި ހާދިސާއެއް ހިނގި ކަމަށް ބުނެ ފަތުރަނީ ދޮގު ޚަބަރެއް
13 މެއި 2021 | ބުރާސްފަތި 15:36ހޮސްޕިޓަލަށް ގެންދިޔަ މުވައްޒަފު ވަނީ ބޭސް ދިނުމަށްފަހު ދޫކޮށްލާފައި
އެމްޕީއެލްގެ ސްޓާފަކު ބަލިވެގެން އެމްބިއުލާންސްގައި ހޮސްޕިޓަލަށް ގެންދަނިކޮށް
މޯލްޑިވްސް ޕޯޓްސް ލިމިޓެޑް (އެމްޕީއެލް)ގައި ނުރައްކާތެރި އައު ހާދިސާއެއް ހިނގި ކަމަށް ބުނެ ދައުރުވަމުންދާ ވީޑިއޯއަކީ އުނަގަނޑަށް ތަދެއް އެރި މުވައްޒަފަކު އިތުރު ފަރުވާއަށް ހޮސްޕިޓަލަށް ގެންދާ މަންޒަރުގެ ވީޑިއޯއެއް ކަމަށް އެ ކުންފުނިން ބުނެފިއެވެ.
ބުރާސްފަތި ދުވަހު މެންދުރު ފަހު ސޯޝަލް މީޑިއާގައި ވަނީ އެމްޕީއެލްގެ ބަނދަރުގައި އޮތް ބާޖަކުން މީހަކު އެމްބިއުލާންސަށް އަރުވައިގެން ގެންދާ މަންޒަރު ދައްކުވައިދޭ ވީޑިއޯއެއް އާންމުވެފައެވެ. މިކަމާއި ގުޅިގެން އާންމުން ދަނީ އެމްޕީއެލްގައި ނުރައްކާތެރި ހާދިސާއެއް ހިނގާފައިވޭތޯ އަހައި ސުވާލު ކުރަމުންނެވެ.
އެމްޕީއެލްގެ ސްޕޯކްސްޕާސަން ދާނިޝް ނިޒާމް ކުރެއްވި ޓްވީޓެއްގައި ވިދާޅުވީ އެމްޕީއެލްގެ ތެރޭގައި ނުރައްކާތެރި ހާދިސާއެއް ނުހިނގާ ކަމަށާއި، މަސައްކަތުގައި އުޅެނިކޮށް އުނަގަނޑަށް ތަދެއް އަރައިގެން މުވައްޒަފަކު ހޮސްޕިޓަލަށް ގެންދިޔަ ކަމަށެވެ.
ރާއްޖެ.އެމްވީއަށް ދާނިޝް ވިދާޅުވީ ހޮސްޕިޓަލަށް ގެންދެވުނު މުވައްޒަފުގެ ހާލު މިހާރު ރަނގަޅު ކަމަށާއި އޮބްޒަވޭޝަނުގައި އިރުކޮޅަކަށް ބާއްވާފައި މިހާރު ބޭސް ދިނުމަށްފަހު ހޮސްޕިޓަލުން ދޫކޮށްލާފައިވާ ކަމަށެވެ.
އެމްޕީއެލްގެ ވިޔަފާރި ބަނދަރުގައި މީގެ ކުރިން ނުރައްކާތެރި ބައެއް ހާދިސާތަކެއް ހިނގައި މުވައްޒަފުންނަށް ބޮޑެތި އަނިޔާތަކެއް ވެފައިވާތީ އެކުންފުނިން ބުނެފައިވަނީ ވިޔަފާރި ބަނދަރުގައި މަސައްކަތް ކުރާ މީހުންގެ ސަލާމަތާއި ރައްކާތެރިކަމަށް ޚާއްސަ އިސްކަމެއް ދީގެން މިހާރު މަސައްކަތް ކުރަމުން އަންނަ ކަމަށެވެ.
