އިތުރު ފަރުވާއަށް ބޭރަށް ވަޑައިގެންނެވުމަށް ރައީސް ނަޝީދު އޭޑީކޭ ހޮސްޕިޓަލުން ދޫކޮށްލައިފި
އޭޑީކޭ ހޮސްޕިޓަލުގައި 16 ގަޑިއިރުގެ އޮޕަރޭޝަންތަކެއް ކުރެވުނު
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު
އިތުރުފަރުވާއަށް ރާއްޖެއިން ބޭރަށް ވަޑައިގެންނެވުމަށް ކުރީގެ ރައީސް މުހައްމަދު ނަޝީދު އޭޑީކޭ ހޮސްޕިޓަލުން ދޫކޮށްލައިފިއެވެ.
ރާއްޖެ އެމްވީއަށް މަޢުލޫމާތު ލިބިފައިވާގޮތުގައި އޭޑީކޭ ހޮސްޕިޓަލުން ދޫކޮށްލުމުން، ރައީސް ނަޝީދު އިތުރު ފަރުވާއަށް މިއަދުގެ ހެނދުނުގެ ވަގުތެއްގައި ޖަރުމަނުވިލާތަށް ފުރާވަޑައިގަތުމަށް ވަނީ ހަމަޖެހިފައެވެ. މެއި މަހުގެ ހަވަނަ ދުވަހުގެރޭ މާލޭގައި ދިން ޓެރަރިސްޓް ހަމަލާގައި ލިބިވަޑައިގެންނެވި އަނިޔާތަކާ ގުޅިގެން އިތުރު ފަރުވާ ހޯއްދެވުމަށް ރައީސް ނަޝީދު ވަޑައިގަންނަވަނީ ޖަރުމަނުވިލާތަށް ކަމަށް އާއިލާއިން ވެސް ހާމަކޮށްފައިވެއެވެ.
ބޭރަށް ފުރާވަޑައިގަންނަވާއިރު، ރައީސް ނަޝީދުގެ މިހާރުގެ ހާލުކޮޅާއި ބެހޭގޮތުން އާއިލާއިން ބުނީ، ވަރަށް ބޮޑަށް ރަނގަޅު ވަމުން އަންނަ ކަމަށާއި، އަންގާރަ ދުވަހުން ފެށިގެން އެނދުން ފައިބައި ގޮނޑީގައި އިންނެވޭ ކަމުގައެވެ. ދިޔާތަކެތި ބެއްލެވުމަށް ޑޮކްޓަރުންގެ ހުއްދަ މިހާރު ލިބިފައިވާ ކަމަށްވެސް މައުލޫމާތުދެއެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ. މި އޮރޭޝަންތަކަށް ފަހު ރައީސް ނަޝީދު ވެންޓިލޭޓަރުން ނެގީ މި ހަފުތާގެ ކުރީކޮޅުގައެވެ. އެއަށްފަހު އެމަނިކުފާނު މީހުންނާ މުއާމަލާތު ކުރައްވައި ފަރުވާއަށް ރަނގަޅަށް ރެސްޕޮންޑް ކުރައްވާކަމަށް ޑޮކްޓަރުން ބުނެފައިވެއެވެ.
ނަޝީދު އަވަހާރަކޮށްލަން އައިއީޑީ ގޮއްވާލި ހަމަލަޔަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމަށްޗަށް ގެނެވޭނެ ކަމަށް، ރައީސް އިބްރާހީމް މުހައްމަދު ސާލިހް ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް ރައީސް ސާލިހް ވިދާޅުވިއެވެ.
މާލޭގައި ދިން ޓެރަރިސްޓް ހަމަލާގައި ރައީސް ނަޝީދުގެ އިތުރުން، އަރިހުގައި އެވަގުތު ތިބި ސިފައިންނާއި އާންމުންނަށްވެސް އެކި ވަރުގެ އަނިޔާ ލިބިފައިވެއެވެ.
