އަލްމަރްޙޫމާ ނާއިލާ އިބްރާހީމް ކަލޭފާނު ލިޔުއްވި އައު ފޮތެއް ރައީސްގެ އަނބިކަނބަލުން ނެރެދެއްވައިފި

އަލްމަރްޙޫމާ ނާއިލާ އިބްރާހީމް ކަލޭފާނު ލިޔުއްވި އައު ފޮތެއް ރައީސްގެ އަނބިކަނބަލުން ނެރެދެއްވައިފިއެވެ.

ވަރޗުއަލްކޮށް މިފޮތް ނެރެދެއްވާ ދެއްވި ޚާއްސަ މެސެޖުގައި ރައިސްގެ އަނބިކަނބަލުން ފަޒްނާ އަޙްމަދު ވިދާޅުވީ މިފޮތް ރޯދަމަހާ ދިމާކޮށް ނެރުމަށްޓަކާ ތައްޔާރުވީނަމަވެސް ނާއިލާ އަވަހާރަވުމާއި ގުޅިގެން ފޮތް ނެރުން މަޑުޖައްސާލަން ޖެހިވަޑައިގަތީކަމަށެވެ. ފަޒްނާ ވިދާޅުވީ އަލްމަރުޙޫމާ ނާއިލާ އިބްރާހިމް ކަލޭފާނު ލިޔުއްވާފައިވާ މިފޮތަށް އެކަމަނާގެ ދަރިކަނބަލުން ލީނާ އަޙްމަދު ޒާހިރު އިތުރު ކައްކާ ރެސިޕީތަކެއް އިތުރުކުރައްވާފައިވާކަމަށެވެ. ޒީނާރު ފޮތުގެ ފެށުމުގައި ނާއިލާ އިބްރާހިމް ކަލޭފާނު ވަނީ މިފޮތް އެކަމަނާގެ ދެ އަންހެން ދަރިކަނބަލުންނަށާއި މުދައްރިސެއްގެ ޙައިސިއްޔަތުން ކިޔަވާދެއްވާފައިވާ އަދި ކިޔަވައިދެއްވަމުން ގެންދެވި ހުރިހާ ދަރިވަރުންނަށް ޚާއްސަ ކުރައްވާފައެވެ.

ހެންވޭރު ނީލްވިލާ އަލްމަރްޙޫމާ ނާއިލާ އިބްރާހީމް ކަލޭފާނަކީ ރާއްޖޭގެ މިހާރުގެ ޤައުމީ މަންހަޖުގެ ތަސައްވަރު، 'ކުދިން ދިރިއުޅުމަށް ތައްޔާރުކުރުން'، އޭގެ އެންމެ ފުރިހަމަ މާނައިގައި އޭރުވެސް ތަންފީޒުކުރެއްވި ބޭކަނބަލެއްކަމުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވިއެވެ. ރައިސްގެ އަނބިކަނބަލުން ވިދާޅުވީ މިހާރުވެސް ނާއިލާ ޒީނާރުގައި ލިޔުއްވާފައިވާ 'ފޯވަރޑް' ވިދާޅުވި ދުވަހުގައި ކުރެއްވުނު އުފާވެރި އިޙްސާސް ހަނދުމަފުޅު ހުންނަ ކަމަށެވެ.

ނާއިލާ ލިޔުއްވާފައިވާ ޒީނާރު މި ފޮތް ނާއިލާ ޚާއްޞަކުރައްވާފައިވަނީ ނާއިލާގެ ދެ ދަރިކަނބަލުންގެ އިތުރުން، ނާއިލާ ކިޔަވާދެއްވައިފައިވާ ހުރިހާ އަންހެން ދަރިވަރުންނަށެވެ. ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ އެކަމަނާއަކީ ނާއިލާގެ ދަރިވަރަކަށް ވާތީ ފޮތް ޚާއްޞަކުރެއްވި ފަރާތްތަކުގެ ތެރޭގައި އެކަމަނާވެސް ހިމެނިވަޑައިގެންފައިވުމުން އުފާފުޅު ކުރައްވާ ކަމަށެވެ. މީގެ އިތުރުން އެކަމަނާ ވަނީ އަލްމަރްޙޫމާ ނާއިލާ އިބްރާހީމް ކަލޭފާނު ތައްޔާރުކުރައްވާފައިވާ ފޮތުން، މިންތީގެ ހަމަހަމަކަން އޮތް މި ޒަމާނުގައި އަންހެން ފިރިހެން ހުރިހާ ފަރާތެއް ނިސްބަތްވާގޮތަށް އެންމެނަށްވެސް ޒީނާރު ފޮތުގެ ފައިދާ ލިބިގެން ދިއުމަށް އުންމީދުކުރައްވާކަމުގައި ވިދާޅުވެފައެވެ.

އެކަމަނާ ވަނީ ނާއިލާ ޓީޗަރަކަށް ހުންނެވި ދުވަސްވަރު ނާއިލާގެ މަސައްކަތްތައް ހުންނަގޮތް ސިފަކޮށްދެއްވާފައެވެ. އެގޮތުން ނާއިލާ ޓީޗަރުކަން ކުރައްވަމުން ގެންދެވީ ދަރިވަރުންގެ މެދުގައި ތަފާތުކުރުމެއް ނުގެންގުޅުއްވާ ހަމަހަމަ ކަމަށް އިސްކަން ދެއްވައިގެން ކަމަށް ވިދާޅުވިއެވެ. އަދި ނާއިލާ އަކީ ހުރިހާ ދަރިވަރުންނަށްވެސް ހެޔޮފުޅު ޓީޗަރެއް ކަމަށާ، ދަރިވަރުން ހަމަމަގަށް އަޅުއްވަން ޖެހިވަޑައިގެންފިނަމަ ވަކި ދަރިވަރަކަށް ނުބައްލަވާ އެކަން ކުރައްވާ ކަމަށް ވެސް ރައީސުލްޖުމްހޫރިއްޔާގެ އަނބިކަބަލުން ވަނީ ވިދާޅުވެފައެވެ.

ޒީނާރު ފޮތަކީ އިހުޒަމާނުގެ ވަރަށް ގިނަ ދިވެހި ކެއުންތަކުގެ ރެސިޕީތަކާއި ދުނިޔޭގެ އެހެން ޤައުމުތަކުގެ ބައެއް ރެސިޕީތައް ހިމެނޭ ފޮތެކެވެ. މިއަދު ރައީސުލްޖުމްހޫރިއްޔާގެ އަނބިކަނބަލުން ނެރެދެއްވި ޒީނާރުގެ އާ އެޑިޝަންގައި ކުރީގެ ރެސިޕީތަކުގެ އިތުރުން، މިހާރުގެ ކެއުންތަކުގެ ވަރަށް ގިނަ އާ ރެސިޕީތައް ނާއިލާގެ ދަރިކަނބަލުން ލީނާ ހިމަނުއްވާފައިވެއެވެ.