ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ އަދި ޖުޑީޝިއަރީ ކޮމިޓީގެ ޖޮއިންޓް ކޮމިޓީއަކުން ބޭއްވި ބައްދަލުވުމުގައި، ކޮމެޓީގެ މެންބަރުންނަށް މަޖިލީހުގެ ރައީސް މުހައްމަދު ނަޝީދު ވީޑިއޯ ކޯލް ކުރައްވައިފިއެވެ.
ރައީސް ނަޝީދު ވީޑިއޯ ކޯލް ކުރައްވާފައި ވާއިރު، އެމަނިކުފާނު އަދިވެސް ގެންދަވަނީ މެއި މަހުގެ ހަވަނަ ދުވަހުގެ ރޭ މާލޭގައި ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް އޭޑީކޭ ހޮސްޕިޓަލްގައި ފަރުވާ ހޯއްދަވަމުންނެވެ.
ބުދަދުވަހު ޖޮއިންޓް ކޮމެޓީން ބޭއްވި ބައްދަލުވުމަކީ، އެމްއެމްޕީއާރްސީ މައްސަލަ ދިރާސާކޮށް ނިންމިގޮތުގެ ރިޕޯޓު ހުށަހެޅުމަށް ބޭއްވުނު ބައްދަލުވުމެކެވެ. މި ބައްދަލުވުމުގައި ރައީސް ނަޝީދު ވީޑިއޯ ކޯލް ކުރައްވާ، ކޮމެޓީގެ މަސައްކަތާއި ބެހޭ މައުލޫމަތު ސާފުކުރެއްވި ކަމަށް ރައްޔިތުންގެ މަޖިލީހުން ވެސް ހާމަކޮށްފައިވެއެވެ.
ޓެރަރިސްޓް ހަމަލާގައި ލިބުނު އަނިޔާތަކަށް ފަރުވާ ހޯއްދަވަމުން ގެންދަވާ ރައީސް ނަޝީދާއި ވީޑިއޯ ކޯލް މެދުވެރިކޮށް ބައްދަލުވެވުމުން، ހުރިހާ މެންބަރުންގެ މޫނުމަތިން ވެސް ވަނީ އުފާވެރިކަން ފެނިފައެވެ.
މާލޭގައި ދިން ނިރުބަވެރި ހަމަލާގައި ލިބުނު އަނިޔާތަކަށްފަހު ހޭނައްތައިގެން ރައީސް ނަޝީދުގެ ހަށިކޮޅުގައި ގިނަ ސާޖަރީތަކެއް ހެދިފައިވެއެވެ. މި ސާޖަރީތަކަށް ފަހު ރައީސް ނަޝީދު ވެންޓިލޭޓަރުން ނެގީ މި ހަފުތާގައެވެ. މިހާރު އެމަނިކުފާނު މީހުންނާ މުއާމަލާތު ކުރައްވައި ޑޮކްޓަރުންގެ ފަރުވާއަށް ރަނގަޅަށް ރެސްޕޮންޑް ކުރައްވާކަމަށް ޑޮކްޓަރުން ބުނެފައިވެއެވެ.
