ރައީސް ޔާމީން މަގާމުން ދުރުކުރަން ރައްޔިތުން ދިން އޯޑަރަށް ތަބާވުމަށް ގޮވާލަން: މަޚުލޫފް
10 މެއި 2017 | ބުދަ 12:41ތަރައްގީ ބޭނުންނަމަވެސް، އަދުލު އިންސާފާ ހަމަހަމަކަން މާމުހިންމު
10 މަހާއި 24 ދުވަހުގެ ޖަލު ހުކުމެއް ތަންފީޒް ކުރައްވަމުން ގެންދަވާ މަޚުލޫފް
ރައްޔިތުންގެ މަޖިލީހުގައި ތަމްސީލުކުރާ 85 ދާއިރާގެ ތެރެއިން 69 ދާއިރާއިން ކައުންސިލް އިންތިޚާބުގައި އިދިކޮޅު އިއްތިހާދުގެ ކެނޑިޑޭޓުން އިންތިޚާބު ކޮށް، ރައީސް އަބްދުﷲ ޔާމީން މަގާމުން ދުރުކުރަން ރައްޔިތުން ދިން އޯޑަރަށް ތަބާވުމަށް ގޮވާލަައްވާ ކަމަށް ޖަލު ހުކުމެއް ތަންފީޒް ކުރައްވަމުން ގެންދަވާ ގަލޮޅު ދެކުނު ދާއިރާގެ މެންބަރު އަހުމަދު މަޚުލޫފް ވިދާޅުވެއްޖެ އެވެ.
ލޯކަލް ކައުންސިލް އިންތިޚާބުގައި އިދިކޮޅު ފަރާތްތަކަށް ލިބުނު ކާމިޔާބީއަށް މަރުހަބާ ދަންނަވައި މަޚުލޫފް ނެރުއްވި ބަޔާނެއްގައި ވިދާޅުވީ ތަރައްގީ ބޭނުންނަމަވެސް، އެއަށްވުރެ އަދުލު އިންސާފާ ހަމަހަމަކަން މާމުހިންމު ކަމާއި އަނިޔާވެރިކަމާއި ކޮރަޕްޝަނާ ދެކޮޅުކަން ސާފުކޮށް ރައްޔިތުން ސާބިތުކޮށްދީފި ކަމަށެވެ.
މަޚުލޫފް ވިދާޅުވީ ދުރުގައި އެކި ރަށްރަށުގައި ތިއްބަސް، އެންމެ ދިވެހި ދަރިއަކުވެސް ޖަލަށްލައިގެން އަނިޔާދޭން ދެކޮޅުކަން ރައްޔިތުން ހާމަކޮށްފައިވާ ކަމަށާއި ދިވެހިންނަކީ އެކުވެރި އެއްބަނޑު އެއްބަފާ ބައެއްކަން ދައްކުވައިދީފި ކަމަށެވެ.
މަޚުލޫފް ވިދާޅުވީ ރައީސް ޔާމީނަށް ލިބިވަޑައިގަތީ ވަރަށް ބޮޑު ކާމިޔާބީއެއްކަމަށް "ދަރުބާރު ފެކްޝަނުން" ބުނާ ވާހަކައަށް އެއްބަސްވެލައްވާ ކަމަށެވެ. އިދިކޮޅު ލީޑަރުން ޖަލަށްލާ، ބިރުދައްކާ، ފުރައްސާރަކޮށް، ކެނޑިޑަސީ ބާތިލްކޮށް އަދި ކެމްޕޭނު ކުރުމަށް އިންތިހާއަށް ހުރަސް އެޅުމުގައި ރައީސް ޔާމިން ހޯދެއްވި ކާމިޔާބީ ވަރަށްވެސް ފުރިހަމަ ކަމަށް އޭނާ ވިދާޅުވި އެވެ.
މަޚުލޫފް ވިދާޅުވީ މިނިވަން އިންސާފުވެރި އިންތިޚާބެއް ބޭއްވިނަމަ ރައީސް ޔާމީނަށް 50 ގޮނޑިވެސް ނުލިބުނީސްކަން ކަށަވަރު ކަމަށެވެ. އޭނާ ވިދާޅުވީ ކައުންސިލް އިންތިޚާބުގެ ނަތީޖާއިން %70 ރައްޔިތުން ރައީސް ޔާމީންއަށް އެވަނީ ނޫނެކޭ ބުނެފައި ކަމަށާއި އެހެންކަމުން ވަގުތުން އިސްތިއުފާ ދެއްވުމަށް ގޮވާލާ ކަމަށެވެ. ރައްޔިތުންގެ މަޖިލީހުގައި ތަމްސީލުކުރާ 85 ދާއިރާގެ ތެރެއިން 69 ދާއިރާއިންވެސް އިންތިޚާބު ކޮށްފައި ވަނީ އިދިކޮޅު އިއްތިހާދުގެ ކެނޑީޑޭޓުންކަން ފާހަގަކުރައްވާ މަޚުލޫފް ވިދާޅުވީ، މަޖިލިސް މެންބަރުން ރައްޔިތުންގެ ފަޅިއަށް އަރުއްވައި، ރައީސް ޔާމީން މަގާމުން ދުރުކުރަން ރައްޔިތުން ދިން އޯޑަރަށް ތަބާވުމަށް ގޮވާލައްވާ ކަމަށެވެ.
މަޚުލޫފްގެ ބަޔާނުގައި ވަނީ ކާމިޔާބު ކުރެއްވި ކެނޑިޑޭޓުންނަށް މަރުހަބާ ދަންނަވާފަ އެވެ. އަދި ކާމިޔާބުނުވި ކެނޑިޑޭޓުން ކުރެއްވި މަސައްކަތާ ދެއްކެވި ހިއްވަރަށް ސާބަސް ދަންނެވި އެވެ. ވަކިން ޚާއްސަކޮށް ގަލޮޅު ދެކުނު ދާއިރާއިން ކާމިޔާބު ހޯއްދެވި ޝާހީން މަހުމޫދަށް މަޚުލޫފް ވަނީ މަރުހަބާ ދަންނަވާފަ އެވެ.
