ކޮމިޓީ ރިޕޯޓާއެކު ޚިޔާނާތުގެ ލިސްޓު އާންމުކުރާނީ އުނިއިތުރު ނުގެނެސް

އެމްއެމްޕީއާރުސީގެ ހިޔާނާތުގެ ފައިސާގެ މައްސަލަ ބަލަމުން އަންނަ ޖުޑިޝަރީ ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީގެ ރިޕޯޓް އާންމުކުރާއިރު އެމްއެމްޕީއާރުސީގެ ޚިޔާނާތުގެ މައްސަލައިގައި ޝާމިލްވާ މީހުންގެ ލިސްޓު އެސެޓް ރިކަވަރީ ކޮމިޝަނުން ފޮނުވާފައިވާ ގޮތަށް އާންމުކުރުމަށް ނިންމައިފިއެވެ.

މިހާރު ކުރިޔަށްދާ ޖޮއިންޓް ކޮމިޓީގެ ބައްދަލުވުމުގައި ވަނީ މިމައްސަލަ ދިރާސާކުރި ސަބް ކޮމިޓީގެ ރިޕޯޓް އިއްވަވާފައެވެ. ރިޕޯޓް އިއްވަވަމުން ސަބް ކޮމިޓީގެ މުގައްރިރު މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ ވިދާޅުވީ ކޮމިޓީން މަސައްކަތް ކުރަމުންދަނީ އެކި މަރުހަލާތަކަށް ބަހާލައިގެންކަމަށެވެ. އަދި އެކި މަރުހަލާތަކުގައި ކުރަމުންދާ މަސައްކަތުގެ މައްޗަށް އެކުލެވޭ ރިޕޯޓް އާންމުކުރަމުންދާނެ ކަމަށް އިންތި ވިދާޅުވިއެވެ.

Advertisement

މިކަން ދިރާސާކުރި ސަބް ކޮމިޓީން ބަލާފައިވަނީ އެސެޓް ރިކަވަރީ ކޮމިޝަނާއި، އެންޓި ކޮރަޕްޝަން ކޮމިޝަން (އޭސީސީ) އަދި ފުލުހުން ހިންގަމުންދާ ތަހުގީގުތަކެވެ. އެއަށްފަހު ސަބް ކޮމިޓީން އެކުލަވާލި ރިޕޯޓް ހުށަހަޅާފައިވާއިރު އާންމުކުރަން ނިންމާފައިވަނީ މުޅި ލިސްޓާއި ދައުލަތުގެ މަގާމުތަކުގައި ތިބި މީހުންގެ ނަންތައް ހިމެނޭ ލިސްޓް ވަކިންނެވެ.

ކޮމިޓީން މިހާރު ބަލަމުން އަންނަނީ ދައުލަތުގެ ވަޒީފާތަކުގައި ތިބި މީހުންގެ މައްސަލަތަކެވެ. އިންތި ވިދާޅުވީ މިމީހުންގެ ތެރޭގައި ސަލާމަތީ ޚިދުމަތްތަކާއި، ފުލުހުންނާއި، މިނިވަން މުއައްސަސާތަކާއި، ޖުޑީޝަރީ އާއި މަޖިލީހާއި ކެބިނެޓުގައި ކުރީގަޔާއި މިހާރު ހިމެނިވަޑައިގަންނަވާ ބޭފުޅުން ހިމެނޭކަމަށެވެ. އެގޮތަށް އެކަން ކުރަނީ މިމަގާމުތަކުގައި ތިބި މީހުންނަކީ ނުފޫޒުގެ ބޭނުންކުރެވޭ ހިސާބުތަކުގައި ތިބި މީހުން ކަމަށްވާތީ މިމައްސަލަތައް އަވަސްކުރުމަށް ތަހުގީގީ އިދާރާތަކަށް ބާރު އެޅުމަށެވެ. މިލިސްޓުގައި 119 މީހެއްގެ ނަން އެބައޮތެވެ.

ކޮމިޓީގައި ހިމެނިވަޑައިގަންނަވާ މެމްބަރުން ވަނީ ތަކުރާރުކޮށް މިލިސްޓު ކޮމިޓީ ރިޕޯޓްގައި ހިމަނާފައިވަނީ އުނި އިތުރެއް ގެނެސްފައިތޯ އައްސަވާފައެވެ. އެސުވާލަށް ޖަވާބު ދެއްވަމުން އިންތި ވިދާޅުވީ އެއްވެސް ނަމެއް ބަދަލުކޮށް އުނިއިތުރެއް ގެނެސްފައިނުވާނެކަމަށެވެ.