ރައީސް ނަޝީދުގެ ސަލާމް ހުރިހާ ރައްޔިތުންނަށް
ރައީސް ނަޝީދުގެ ހާލުކޮޅު ރަނގަޅު
ރަށްވެހި ފަތިސް- ކެނޑިޑޭޓުންނާއި ކެމްޕެއިން ޓީމުތަކާއި ބައްދަލުކުރެއްވުން
އެމްޑީޕީގެ ހުރިހާ މެމްބަރުންނަށް ރައީސް ނަޝީދު ސަލާން ރައްދު ކުރައްވައިފިއެވެ.
އެމްޑީޕީގެ ނައިބު ރައީސް، މުހައްމަދު ޝިފާޒު ވިދާޅުވިީ، ރައީސް ނަޝީދުގެ ހާލުކޮޅު ރަނގަޅު ކަމަށާއި، އެމަނިކުފާނު އެންމެންނަށް ސަލާން ރައްދު ކުރެއްވި ކަމަށާއި، ޚާއްސަކޮށް އެމްޑީޕީގެ ހުރިހާ ރައްޔިތުންނަށް ސަލާން ރައްދުކޮށްދެއްވުމަށް އެދިވަޑައިގެންނެވި ކަމަށެވެ.
ނަޝީދު ދިރިއުޅުއްވާ ކެނެރީގެ ކައިރީގައި ސައިކަލެއްގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒަރ ފުއް ވަދެފައިވެއެވެ. ހަށިގަނޑުގެ މުހިއްމު ގުނަވަންތައް ފޫއަޅުވާލި ރޭޒަރ ފުއްތައް ނަގަން 16 ގަޑިއިރުގެ އޮޕަރޭޝަންތަކެއް ކުރިއެވެ.
ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރި މައުލޫމާތުން ރައީސް ނަޝީދުގެ ފުރާނަ ސަލާމަތްވީ ހަމަ ކިރިޔާކަން އެނގެއެވެ.
ހޭނައްތައިގެން ކުރި ސާޖަރީތަކަށް ފަހު ރައީސް ނަޝީދު ވެންޓިލޭޓަރުން ނެގީ މި ހަފުތާގައެވެ. އެހެންވިޔަސް ވަރަށް ރަނގަޅަށް މޮނިޓަކުރަން ޖެހޭ ކަަމަށާއި ރައީސް ނަޝީދު ހޮސްޕިޓަލުން ދޫކޮށްލުމާ ގުޅޭ ޕްލޭނެއް އަދި ނެތް ކަމަށް ޑޮކްޓަރުން ވަނީ ވިދާޅުވެފައެވެ.
ރައީސް ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް ބަންދުގެ މުއްދަތު ޖަހައިފައެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނުނަމަވެސް ބޮޑަށް ގުޅެނީ ހަރުކަށި ފިކުރާ ކަމަށް ފުުލުހުން މިހާތަނަށް އާއްމުކުރި މައުލޫމާތުތަކުން އެނގެއެވެ.
