އެމްއެމްޕީއާރްސީ ޚިޔާނާތުގެ ތުހުމަތު ކުރެވޭ މީހުން މަގާމުތަކުން ވަކިކުރަން ހުށަހަޅައިފި
އެސެޓް ރިކަވަރީ ކޮމިޝަނުން މަޖިލީހަށް ފޮނުވި ލިސްޓުގައި 281 މީހަކު ހިމެނޭ
ޖޮއިންޓް ސަބް ކޮމިޓީން ބޭއްވި ބައްދަލުވުން
އެމްއެމްޕީއާރްސީގެ ޚިޔާނާތުގެ މައްސަލައިގައި ޝާމިލްވާކަމަށް ތުހުމަތު ކުރެވޭ މީހުންގެ ތެރެއިން ދައުލަތުގެ މަގާމުތަކުގައި މިހާރު ތިބި މީހުން އެ މަގާމުތަކުން ވަކިކުރަން ރައްޔިތުންގެ މަޖިލީހުގެ ނާއިބުރައީސާ އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހަޅުއްވައިފިއެވެ.
އެމްއެމްޕީއާރްސީގެ ވައްކަމާއި ޚިޔާނާތުގެ މައްސަލައިގައި ހިމެނޭ ފަރާތްތަކުގެ މައްޗަށް ތުހުމަތު ކުރެވޭ މައްސަލަތަކާއި، އެ މައްސަލަތައް ގޮސްފައިވާ ހިސާބާއި، އަދި އެ މައްސަލަތައް ކުރިއަށް ނުގޮސް ލަސްވާ ސަބަބު ސާފުކުރުމަށް މަޖިލީހުން ވަނީ ތަހުގީގީ އިދާރާތަކުގައި އެދިފައެވެ.
މަޖިލީހުގެ އެދުމަށް އެސެޓް ރިކަވަރީ ކޮމިޝަނުން ވަނީ އެމްއެމްޕީއާރްސީގެ ޚިޔާނާތުގައި ހިމެނޭ 281 މީހުންގެ ލިސްޓެއް ފޮނުވާފައެވެ.
މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ އާއި ޖުޑިޝަރީ ކޮމިޓީގެ މައްޗަށް އެކުލެވޭ ސަބް ކޮމިޓީއަކުން ހޯމަދުވަހުގެ ރޭ ބޭއްވި ބައްދަލުވުމުގައި އީވާ ވިދާޅުވީ، ކޮމެޓީގެ ރިޕޯޓުގައި ފޯކަސް ބަހައްޓަން ޖެހެނީ ދައުލަތަށް ކުރިން ޚިދުމަތްކޮށްފައިވާ، އަދި މިހާރުވެސް ކުރަމުންދާ މީހުންނަށް ކަމަށެވެ. އެއީ އެކަމުގައި ރައްޔިތުންގެ މަސްލަހަތު އޮތުމުން ކަމަށް އީވާ ވިދާޅުވިއެވެ.
އެހެންކަމުން ތަހުގީގު ކުރިއަށް ދާއިރު ނުވަތަ ޝަރީއަތުގެ މަރުހަލާގައި ވެސް ދައުލަތުގެ މަގާމުތަކުގައި މިހާރު ތިބި ޚިޔާނާތުގެ ބައިވެރިން ކަމަށް ތުހުމަތު ކުރެވޭ މީހުން އެ މަގާމުތަކުން ދުރުކުރަން އީވާ ހުށަހެޅުއްވިއެވެ.
އީވާގެ މި ހުށަހެޅުއްވުމަށް ތުޅާދޫ ދާއިރާގެ މެމްބަރު ހިސާން ހުސެއިން ވަނީ ތާއީދު ކުރައްވާފައެވެ.
ފަހުގެ ތާރީޚެއްގައި ހިނގި އެންމެ ބޮޑު ޚިޔާނާތުގެ މައްސަލައިގައި ތަހުގީގީ އިދާރާތަކުން ކުރިން އާންމުކުރި ލިސްޓުގައި 267 ބޭފުޅުން ހިމެނޭއިރު އެ ލިސްޓުގައި، 18 ވަނަ ރައްޔިތުންގެ މަޖިލީހުގެ މެންބަރުންނާއި, ކުރިއަށްމިދާ 19 ވަނަ މަޖިލީހުގެ މެންބަރުންނާއި މިނިވަން މުއައްސަސާތަކުގެ އިސްކޮށް ތިއްބެވި ބައެއް ބޭފުޅުން ހިމެނިވަޑައިގަންނަވައެވެ. ހަމައެއާއެކު ސަރުކާރުގެ މަގާމުތަކުގައި ތިއްބެވި ބޭފުޅުންނާއި, ކުރީ ސަރުކާރުގެ އިސް ބޭފުޅުންނާއި، ފަނޑިޔާރުންނާއި، ސަލާމަތީ ބާރުތަކުގައި ތިއްބެވި އޮފިސަރުންނަށް ވެސް ޚިޔާނާތުގެ ފައިސާ ލިބިވަޑައިގެންނެވި ކަމަށް ބުނެވެއެވެ.
