ސޮނޭވާ ޖާނީގައި ރޮނާލްޑީނިއޯގެ ޚާއްސަ ކޭމްޕެއް

ރާއްޖޭގެ އެންމެ ފެންވަރު ރަނގަޅު ރިޒޯޓުތަކުގެ ތެރޭގައި ހިމެނޭ ސޮނޭވާ ޖާނީގައި ބްރެޒިލުގެ މަޝްހޫރު ފުޓްބޯޅަ ލެޖެންޑް ރޮނާލްޑީނިއޯ ކޭމްޕެއް ކުރިއަށްގެންދަން ނިންމައިފިއެވެ.

"ސޮނޭވާ ސްޓާސް" ގެ ނަމުގައި ކުރިއަށްގެންދާ އިވެންޓްތަކުގެ ތެރެއިން ރޮނާލްޑީނިއޯގެ ކޭމްޕް ރާވާފައިވަނީ މި މަހު 18 ވަނަ ދުވަހުއެވެ. ނ. މެދުފަރުގައި ތަރައްގީކޮށްފައިވާ ސޮނޭވާ ޖާނީގައި މި ކޭމްޕް ކުރިއަށްދާއިރު، ކޭމްޕުގައި ބައިވެރިވާން ބޭނުންވާ މީހުންނަށް އެ ފުރުސަތު މި ހާރު ވަނީސޮނޭވާގެ ވެބްސައިޓް މެދުވެރިކޮށް ހުޅުވާލާފައެވެ. ސޮނެވާއިން މައުލޫމާތުދޭ ގޮތުން މި ފުރުސަތު ހުޅުވާލާފައި ވަނީ އެ ރިޒޯޓުގައި ތިބި ޒުވާން ފުޓްބޯޅަ ސަޕޯޓަރުންނަށެވެ.

ސޮނެވާއިން ހާމަކޮށްފައިވާ ގޮތުން މި ކޭމްޕް ކުރިއަށްގެންދާނީ 90 މިނެޓަށެވެ. އަދި ކޭމްޕުގައި ބައިވެރިވުމުގެ ފީއެއްގެ ގޮތުގައި 1،500 ޑޮލަރު ހަމަޖައްސާފައިވާއިރު، ކޭމްޕުން ލިބޭ ހުރިހާ ފައިސާއެއް ދިނުމަށް ހަމަޖެހިފައިވަނީ ޗެރިޓީއަށެވެ. މި ކޭމްޕުގެ ތެރެއިން ރޮނާލްޑީނިއޯގެ ހުނަރު ދައްކާލައި، ޒުވާން ފުޓްބޯޅަ ކުޅުންތެރިން އެކުގައި ކުރިއަށްދާނެ ގޮތްތަކުގެ މައުލޫމާތުތައް ކިޔައިދޭނެއެވެ. އަދި ރޮނާލްޑީނިއޯއާއެކު ފޮޓޯ ނެގުމާއި، ޖާޒީގައި ސޮއިކުރުމުގެ ފުރުސަތުވެސް ލިބިގެންދާނެއެވެ.

ރާއްޖޭގައި ރޮނާލްޑީނިއޯގެ ކޭމްޕެއް ބާއްވާއިރު، 2018 ވަނަ އަހަރު ރަސްމީކޮށް ފުޓްބޯޅަ ކުޅުން ހުއްޓާލި ރޮނާލްޑީނިއޯ އަންނަނީ ދުނިޔޭގެ އެކި ކަންކޮޅުތަކުގައި ފުޓުބޯޅައާ ގުޅުންހުރި ގިނަ ހަރަކާތްތަކެއް ބާއްވަމުންނެވެ. އެގޮތުން މީގެ ކުރިން އިންޑިއާގައިވެސް ރޮނާލްޑީނިއޯ ވަނީ ހަރަކާތްތަކެއްް ހިންގާފައެވެ.

ރޮނާލްޑީނިއޯއަކީ ބްރެޒިލުން 2002 ވަނަ އަހަރު ފީފާ ވޯލްޑް ކަޕް ތަށި އުފުލާލިއިރު މުހިންމު ދައުރެއް އަދާކުރި ކުޅުންތެރިޔެކެވެ. އަދި ބާސެލޯނާގައި ވިދާލި ރޮނާލްޑީނިއޯ ވަނީ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު 2005 އަދި 2006 ވަނަ އަހަރު ހޯދާފައެވެ.