ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށް ދީފައިވާ ނިރުބަވެރި ޙަމަލާގެ ތަހުޤީޤު ކުރިއަށްދާގޮތް ރަނގަޅުކަމަށް ހޯމް މިނިސްޓަރ ޝެއިޙް އިމްރާން އަބްދުﷲ ވިދާޅުވެއްޖެއެވެ.
އާދިއްތަ ދުވަހު މިނިސްޓަރ ކުރެއްވި ޓްވީޓެއްގައި ވިދާޅުވީ، ރައީސް ނަޝީދަށް އަމާޒުކޮށް ދީފައިވާ ޙަމަލާގެ ތަހުޤީޤު ކުރިއަށްދާ ގޮތާއި، ތަހުޤީޤުގައި މިހާތަނަށް ހޯދިފައިވާ ކުރިއެރުންތައް ރަނގަޅު ކަމަށެވެ. އަދި މިހާތަނަށް ލިބިފައިވާ ކުރިއެރުންތަކުގައި ފުލުހުންގެ ހުނަރާއި ޤާބިލުކަމުގެ އިތުރުން، އާންމު ރައްޔިތުންގެ ފަރާތުން ލިބެމުންދާ މައުލޫމާތުތަކާއި އެހީތެރިކަން މުހިއްމު ދައުރެއް އަދާކުރާކަމަށް މިނިސްޓަރ ފާހަގަ ކުރެއްވިއެވެ.
ބުރާސްފަތި ދުވަހުގެ ރޭ އިރާކޮޅު ރައީސް ނަޝީދަށް އަމާޒުކޮށް ދީފައި މިވާ ޓެރަރިސްޓް ހަމަލާ ތަހުގީގުކޮށް އިންސާފު ގާއިމުކުރުމަށް ކުރަން ޖެހުނު ކޮންމެ ކަމެއް ކުރައްވާނެ ކަމަށް ވެސް މިނިސްޓަރ ވަނީ ވިދާޅުވެފައެވެ.
ރައީސް ނަޝީދަށް އަމާޒުކޮށް ދިން ހަމަލާއަކީ ސީދާ އެމަނިކުފާނުގެ ފުރާނަފުޅަށް އަމާޒުކޮށް ދިން ހަމަލާއެއްކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވެސް ވަނީ ވިދާޅުވެފައެވެ.
