ޕީއެސްޖީއާއެކު ނޭމާ އިތުރު ތިން އަހަރުގެ އެއްބަސްވުމެއް

އެއްބަސްވުން އާކޮށް، 2025 ވަނަ އަހަރުގެ ހޫނު މޫސުމުގެ ނިޔަލަށް ޕީއެސްޖީގައި މަޑުކުރަން ބްރެޒިލުގެ ތަރި ނޭމާ ނިންމައިފިއެވެ.

ބާސެލޯނާ ދޫކޮށް 2017 ވަނަ އަހަރު އުމުރުން 29 އަހަރުގެ ނޭމާ ޕީއެސްޖީއަށް ބަދަލުވީ ދުނިޔޭގެ ރިކޯޑު އަގެއް ކަމަށްވާ 222 މިލިއަން ޔޫރޯއަށެވެ. މީގެ ކުރިން ނޭމާ ޕީއެސްޖީއާއެކު ހަދާފައި އޮތް އެއްބަސްވުން ހަމަވަން އޮތީ އަންނަ އަހަރުގެ ހޫނު މޫސުމުގެ ނިޔަލަށެވެ.

އެކަމަކު ހޮނިހިރު ދުވަހުގެ ވަގުތެއްގައި ނޭމާ ވަނީ ޕީއެސްޖީގެ އެއްބަސްވުން އިތުރު ތިން އަހަރަށް އާކޮށްފައެވެ. އެހެންކަމުން އޭނާގެ އެއްބަސްވުން ދެން ހަމަވާނީ 2025 ވަަނަ އަހަރުގެ ޖޫން މަސް ނިމުމުންނެވެ. އައު އެއްބަސްވުމުގައިވާ ގޮތުން ނޭމާއަށް އަހަރަކު 30 މިލިއަން ޔޫރޯގެ މުސާރައެއް ލިބޭނެއެވެ. އެކަމަކު ބޯނަހާއެކު އެ އަދަދު އިތުރުވާނެ ކަމަށް ބެލެވެއެވެ.

ޕީއެސްޖީގެ އެއްބަސްވުން ނޭމާ އާކޮށްފައިވަނީ އަލުން އަނބުރާ ބާސާއަށް ދާން އޭނާ އުޅޭ ކަމަށް މީޑިއާގައި ރިޕޯޓުކޮށްފައި ވަނިކޮށެވެ. އެގޮތުން މީގެ ކުރިން ނޭމާ ވަނީ މި އަހަރުގެ ތެރޭގައި ބާސާއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީއާ އެއް ޓީމެއްގައި ކުޅެން ބޭނުންވާ ކަމަށް ބުނެފައެވެ.

ޕީއެސްޖީގައި މަޑުކުރަން ނޭމާ ނިންމިއިރު، އޭނާ ވަނީ މިހާތަނަށް އެ ޓީމަށް ކުޅެދިން 112 މެޗުގައި ވަނީ 85 ލަނޑު ކާމިޔާބުކޮށްފައެވެ. އަދި ވަނީ ޕީއެސްޖީއާއެކު މިހާތަނަށް ފްރެންޗް ލީގު ތިން ފަހަރު ކާމިޔާބުކޮށްފައެވެ.