ކެނދިކުޅުދޫ މުދާ އުފުލާ ދޯންޏެއްގައި ތިބި 5 މީހަކު ކޮވިޑަށް ޕޮޒިޓިވްވެއްޖެ
5 މީހުން މިވަގުތު ތިބީ ށ ފުނަދޫގައި ކަރަންޓީނުކުރެވިފައި
ނ ކެނދިކުޅުދޫ
ނ. ކެނދިކުޅުދޫ އަށް މުދާއުފުލުމަށް މާލެ ދަތުރުކުރާ ދޯންޏެއްކަމުގައިވާ ފުރަމާ ދޯނިން 5 މީހަކު ކޮވިޑް-19ށް ޕޮޒިޓިވްވެއްޖެއެވެ.
އެކަމާއި ގުޅިގެން ކެނދުކުޅުދޫ ޓާސްކު ފޯހުން ނެރެފައިވާ ބަޔާނެއްގައި ބުނެފައިވަނީ އެ 5 މީހުން މިވަގުތު ތިބީ ށ ފުނަދޫގައި ކަރަންޓީނުކުރެވިފައި ކަމަށެވެ. އެދޯނިން ދަތުރުކުރި އިތުރު 3 މީހަކު މިހާރު ކެނދިކުޅުދޫގައި ކަރަންޓީނުކުރެވިފައިވާ ކަމަށްވެސް ޓާސްކު ފޯހުން ބުނެއެވެ. ރައްކާތެރިކަމުގެ ފިޔަވަޅެއްގެ ގޮތުން އެ ތިން ނީހުން މިހާރު ވަނީ ކަރަންޓީނު ކުރެވިފައިވާކަމަށާއި ރައްކާތެރިކަމުގެ ފިޔަވަޅުތަކަށް ސަމާލުވުމަށް ވަނީ އިލްތިމާސްކޮށްފައެވެ.
އެދޯނިން ދަތުރުކުރި އެއްވެސް މީހަކާއި ކޮންޓެކްޓް ވެފައިވާ މީހަކު ހުރިނަމަ އެކަން ޓާސްކު ފޯހަށް އެންގުމަށް ވަނީ އިލްތިމާސްކޮށްފައެވެ. ގެއިން ބޭރުގައި އުޅޭއިރު އަބަދުވެސް މާސްކު އެޅުމަށާއި ގައިދުރުކަން ބެހެއްޓުމަށް ވަނީ އިލްތިމާސްކޮށްފައެވެ. ގިނަ މީހުން އެއްވެ އުޅޭ ތަންތަނަށް ނުދިޔުމަށާއި އަދި އަލާމާތެއް ފެންނަނަމަ ލަސްނުކޮށް ސިއްހީ މަރުކަޒަށް މައުލޫމާތުދީ އެކަހެރިވުމަށްވެސް ވަނީ އެދިފައެވެ.
ރާއްޖޭގައި ކޮވިޑް-19 ހަލުވިކަމާއެކު ފެތުރެމުންދާއިރު އަތޮޅުތެރޭގައިވެސް އަންނަނީ ހަލުވިކަމާއެކު މިބަލި ފެތުރެމުންނެވެ. ބަލިފެތުރެމުންދާތީ ޖުމްލަ 29 ރަށެއް މިހާރު ވެސް އޮތީ އަރާފޭބުން މަނާކޮށް މޮނީޓަރިންގެ ހާލަތުގައެވެ. މާލެ އާއި ފަސް ރަށެއްގައި ކާފިއު ވެސް ދަނީ ހިންގަމުންނެވެ.
