ރާއްޖޭގައި މިވަގުތު އުޅެނީ ކޮވިޑް19 އާ ސްޓްރެއިން އެއް ކަމަށް އައިޖީއެމްއެޗުގެ ނޭޝަނަލް ސެންޓަރ ފޯ ރެސްޕިރޭޓަރީ މެޑިސިންގެ ޑޮކްޓަރު މުހައްމަދު އަލީ ވިދާޅުވެއްޖެއެވެ.

ރާއްޖޭގައި ކޮވިޑް-19ގެ ހާލަތު މިއިން ދުވަހަކު ގޯސް ނުވާ މިންވަރަށް ގޯސްވެފައިވާއިރު ޑރ މުހައްމަދު އަލީ ކުރެއްވި ޓްވީޓެއްގައި ވިދާޅުވީ ރާއްޖޭގައި މިހާރު އައު ސްޓްރެއިނެއް އުޅޭ ކަމަށް ވަރަށް ބޮޑަށް ޔަގީން ކަމަށެވެ. އަދި އައު ސްޓްރެއިންގެ ނުރައްކާ މާ ބޮޑުކަމަށާއި ފުއްޕާމެއަށްވެސް ވަރަށް ބޮޑަށް މި ސްޓްރެއިންގައި ގެއްލުން ދޭ ކަމަށް ޑރ ވިދާޅުވިއެވެ. އަދި ހާލަތު ވަރަށް އަވަހަށް ގޯސްކޮށްލާކަމަށް ޑރ ވިދާޅުވިއެވެ.

ޑރ ވަނީ ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ރައްޔިތުން ސަމާލުވުމަށް އިލްތިމާސް ކުރައްވާފައެވެ. އެގޮތުން މާސްކު އެޅުމަށާއި ކޮންޓެކްޓް ބަބްލު ކުޑަކުރުމަށް އަދި އަތްދޮވުމަށް ވަނީ އެދިވަޑައިގެންފައެވެ. އަދި މިހުރިހާ ކަމަކާއެކުވެސް މިކަމުން ސަލާމަތްވުމަށް ދުއާކުރުމަށް ވަނީ އެދިވަޑައިގެންފައެވެ.

ރާއްޖޭގައި ކޮވިޑް-19 އަށް ޕޮޒިޓިވްވާ މީހުން އިތުރުވަމުންދާނަމަ ކޮވިޑްގެ އައު ވޭރިއަންޓެއް ރާއްޖޭގައި އުފެދުމަކީ އެކަށީގެންވާ ކަމެއްކަމަށް ހެލްތު އެމަރޖެންސީ އޮޕަރޭޝަން ސެންޓަރުން ވަނީ މީގެކުރިން ބުނެފައެވެ. ދުނިޔެއިން މިހާރު ފެނިފައިވާ ކޮވިޑްގެ އައު ވޭރިއަންޓްތަކުގެ ތެރެއިން ރާއްޖޭގައި ވޭރިއަންޓެއް އުޅޭތޯ އާއި ވޭރިއަންޓެއް ރާއްޖޭގައި އުފެދިފައިވޭތޯ ބެލުމަށް ޓެސްޓްތައް ހެދުމަށް ރާއްޖެއިން ބޭރަށް ފޮނުވާފައިވާކަމަށްވެސް އެޗްއީއޯސީން ބުނެއެވެ. ނަމަވެސް އަދިވެސް އެޓެސްޓްތަކުގެ ނަތީޖާ ނުލިބޭކަމަށް ވަނީ ބުނެފައެވެ.

ރާއްޖޭގައި ދުވާލެއްގެ މައްޗަށް ރިކޯޑް މިންވަރަކަށް މީހުންނަށް ކޮވިޑް ޖެހެމުންދާއިރު ރިކޯޑް މިންވަރަކަށް މީހުން އަންނަނީ މިބަލީގައި މަރުވަމުންނެވެ.

އެގޮތުން އެޗްޕީއޭއިން ހާމޮށްފައިވާ ގޮތުގައި ބުދަ ދުވަހާއި ބުރާސްފަތި ދުވަހު އެކަނިވެސް ރާއްޖޭގައި މިބަލީގައި 8 މީހަކު ވަނީ ނިޔާވެފައެވެ. މިއީ 48 ގަޑިއިރުތެރޭގައި ރާއްޖޭގައި މިހާ ގިނަ އަދަދެއްގެ ބަޔެއްގެ މިބަލީގައި މަރުވެގެން ރިޕޯޓްކުރި ފުރަތަމަ ފަހަރެވެ. އަދި ހުކުރު ދުވަހު އެކަނިވެސް 4 މީހަކު ވަނީ ނިޔާވެފައެވެ. ބަލީގައި ނިޔާވި މީހުންގެ އަދަދު ވަނީ 83ށް އަރާފައެވެ.

ބަލިޖެހެމުންދާ ގޮތަށް ބަލާއިރު މެއި މަހުގެ 1 ވަނަ ދުވަހު 402 މީހުން ބައްޔަށް ޕޮޒިޓިވްވިއިރު މެއި މަހުގެ 2 ވަނަ ދުވަހު އެއަދަދު ހުރީ 508 ގައެވެ. މެއި މަހުގެ 3 ވަނަ ދުވަހު 585 މީހުންނަށް ކޮވިޑް ޖެހުނުއިރު މެއި މަހުގެ 4 ވަނަ ދުވަހު އެއަދަދު ވަނީ 601ށް އަރާފައެވެ.

މެއި މަހުގެ 5 ވަނަ ދުވަހު 734 މީހުންނަށް ކޮވިޑް ޖެހިގެން ރިޕޯޓްކުރިއިރު މެއި މަހުގެ 6 ވަނަ ދުވަހު 703 މީހުންނަށް ވަނީ ކޮވިޑް ޖެހިފައެވެ. މެއި މަހުގެ 7 ވަނަ ދުވަހު 766 މީހުންނަށް ވަނީ ކޮވިޑް ޖެހިގެން ރިޕޯޓްކޮށްފައެވެ.

އެކްޓިވް ކޭހުގެ އަދަދު މިހާރު ހުރީ 8261 ގައެވެ. ހޮސްޕިޓަލްގައި އެޑްމިޓްކޮށްގެން 205 މީހަކަށް އަންނަނީ ފަރުވާދެމުންނެވެ.

މިބަލިން ދިފާއުވުމަށް ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިން ދިނުމުގެ ޕްރޮގްރާމް ފަށާފައިވާއިރު މިހާތަނަށް ފުރަތަމަ ޑޯޒް ޖެހި މީހުންގެ އަދަދު ވަނީ ތިންލައްކައަށް އަރާފައެވެ. އަދި ދެވަނަ ޑޯޒް ޖެހި މީހުންގެ އަދަދު ވަނީ 126،790ށް އަރާފައެވެ.