ސާބިތު ނުހިފޭ ވާހަކަ ފަތުރާ، ކުދިން ބިރުވެރި ކަމެއްގެ ތެރެއަށް ވައްޓާލުމުން ދުރުވާންޖެހޭ – އިހްސާން
7 މެއި 2021 | ހުކުރު 14:35އެއްވެސް ދަރިވަރަކަށް އަދި އިންވިޖިލޭޓަރަކަށް ވެސް ދިވެހި ކަރުދާސް 1 ގެ ސުވާލުތައް ފެނިފައި ނުވާކަން ކަށަވަރުކުރެވޭތީ އިމްތިހާން ކުރިއަށް ގެންދިޔުމަށް އެޑިއުކޭޝަނުން ވަނީ ނިންމާފަ
އެޑިއުކޭޝަން މިނިސްޓްރީގެ ޑެޕިއުޓީ، އިހްސާން
ކުދިންގެ އިމްތިހާނާ ގުޅުން ހުރި ސާބިތު ނުހިފޭ ކަހަލަ ވާހަކަތައް ފަތުރާ ކުދިން ބިރުވެރި ކަމެއްގެ ތެރެއަށް ވައްޓާލުމާ ދުރުވާންޖެހޭ ކަމަށް ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެވަޑައިގެން ހުންނެވި އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވެއްޖެއެވެ.
8 މެއި 2021 (ހޮނިހިރު) ދުވަހަށް ތާވަލުކުރެވިފައިވާ އެސްއެސްސީ ދިވެހި ކަރުދާސް 1، ޣާޒީ ސްކޫލުގެ ބައެއް ދަރިވަރުންނަށް ފެނުނުކަމަށްބުނެ ސޯޝަލް މީޑީއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
މިކަމާ ގުޅިގެން "ރާއްޖެ އެމްވީ" އަށް ދެއްވި ޚާއްސަ ބަސްދީގަތުމެއްގައި އިހްސާން ވިދާޅުވީ ސުވާލު ކަރުދާހުން އެއްވެސް ސުވާލެއް އެއްވެސް ކުއްޖަކަށް ފެނި އެކަހަލަ އެއްވެސް ކަމެއް ހިނގާފައި ނުވާކަމަށެވެ.
ޣާޒީ ސުކޫލްގެ ޕްރިންސިޕަލް މަރިޔަމް މުހައްމަދު ވެސް ވަނީ އިމްތިހާން ޕޭޕަރު އެއްވެސް ކުއްޖަކަށް ފެނިފައި ނުވާނެ ކަމުގެ ޔަގީންކަށް އަރުވާފައެވެ.
ކަންހިނގައިދިޔަގޮތް ބެލި ބެލުމުން އެއްވެސް ދަރިވަރަކަށް އަދި އިންވިޖިލޭޓަރަކަށް ވެސް ދިވެހި ކަރުދާސް 1 ގެ ސުވާލުތައް ފެނިފައި ނުވާކަން ކަށަވަރުކުރެވޭތީ މިހާރުވެސް ތާވަލްކުރެވިފައިވާ ގޮތަށް ދިވެހި ކަރުދާސް ހޮނިހިރު ދުވަހު ކުރިއަށް ގެންދިޔުމަށް އެޑިއުކޭޝަނުން ވަނީ ނިންމާފައެވެ.
