ރައީސް ނަޝީދަށް އަމާޒުކޮށް ދީފައިވާ ހަމަލާ ހިނގި ސަރަހައްދުން ޝައްކު ކުރެވޭ 4 މީހަކު ފެނިފައިވާ ކަމަށް ފުލުހުން ބުނެފިއެވެ.
މިކަމާ ގުޅިގެން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، އެ ހާދިސާ ހިނގި ސަރަހައްދުން ޝައްކުކުރެވޭ ހަރަކާތްތައް ހުރި ބަޔަކު ފާހަގަކުރެވިފައިވާ ކަމަށެވެ. އެގޮތުން ޝައްކުކުރެވޭ 4 މީހަކު ފުލުހުންގެ ސަމާލުކަމަށް އައިސްފައިވެއެވެ. މި 4 މީހުންނާ ދޭތެރޭ ޝައްކު އުފެދިފައިވާ ސަބަބުތައް މީޑިއާތަކަށް ހާމަކުރެވެން ނެތްކަމަށް ވެސް ސީޕީ ޙަމީދު ވިދާޅުވިއެވެ.
މި މައްސަލައިގެ ތަހުޤީޤާ ގުޅޭ މައުލޫމާތު ޕީޖީއާ ވަނީ ހިއްސާ ކުރެވިފައި ކަމަށް ސީޕީ ވިދާޅުވިއެވެ. އަދި މި މައްސަލައިގެ ޖިނާއީ ތަހުގީގެއް ހިންގުމަށްޓަކައި، ޕީޖީ އާއެކު މަަޝްވަރާ ކުރެވިގެން މައްސަލައިގެ ތަހުގީގު ހިނގަމުން އަންނަ ކަމަށް ވިދާޅުވިއެވެ. މިހާރު މި ހަމަލާ ތަހުގީގު ކުރަމުން އަންނަނީ ޓެރަރީޒަމްގެ އަމަލެއްގެ ގޮތުގައިކަން ފުލުހުން ވަނީ ހާމަކޮށްފައެވެ.
މައްސަލަ ތަހުގީގު ކުރުމަށް ބޭރުގެ ފަރާތްތަކުގެ އެހީތެރިކަން ހޯދަމުން އަންނަ ކަމަށްވެސް ސީޕީ ވިދާޅުވިއެވެ. އެގޮތުން ހޮނިހިރު ދުވަހު އޮސްޓްރޭލިއަން ފެޑެރަލް ޕޮލިސްގެ ޓީމް މާދަމާ މާލެ އަންނަ ގޮތަށް ވަނީ ހަމަޖެހިފައެވެ.
ރައީސް ނަޝީދަށް އަމާޒުކޮށް ދީފައިވާ މި ހަމަލާގައި އެއްޗެއް ގޮއްވާލުމުގެ ސަބަބުން ލިބުނު ޒަޚަމްތަކަށް ރައީސް ނަޝީދު އަދިވެސް ގެންދަވަނީ އޭޑީކޭގައި ފަރުވާ ހޯއްދަވަމުންނެވެ. އޭޑީކޭއިން ބުނެފައިވަނީ އެމަނިކުފާނުގެ ސާޖަރީތަކެއް ކުރިއަށް ގެންދިޔަ ކަމަށާއި، އެ ސާރޖަރީތައް ކާމިޔާބު ކަމަށެވެ. އަދި އިތުރު ޕްރޮސީޖަރ ތަކެއް ކުރިއަށް ގެންދަން ޖެހޭ ކަމަށް ބުނެފައިވެއެވެ.
