ކޮވިޑް ބަލީގައި ރާއްޖޭން ނިޔާވި މީހުންގެ އަދަދު 80 އިން މައްޗަށް!
އޭގެފަހުން އިރުއޮއްސުނީއްސުރެ މިހާތަނަށް ހަތަރު މީހަކު ނިޔާވެފައި ވާކަމަށް އެޗްޕީއޭއިން މައުލޫމާތުދޭ
ފުވައްމުލަކު ސިޓީގައި ކުއްލިއަކަށް ނިޔާވި ބަންގްލަދޭޝް މީހަކު، ކޮވިޑް-19 ޖެހޭ މީހުން ވަޅުލާ އުސޫލުން ވަޅުލުން
ކޮވިޑް ބަލީގައި ރާއްޖެއިން ނިޔާވި މީހުންގެ ޖުމްލަ 81 ށް އަރައިފިއެވެ.
ކޮވިޑްގައި ރާއްޖެއިން ނިޔާވި 77 ވަނަ މީހާ ނިޔާވެފައި ވަނީ ބުރާސްފަތި ދުވަހުގެ މެންދުރުފަހު 3:45 ހާއިރުއެވެ. އޭގެފަހުން ބުރާސްފަތި ދުވަހުގެ އިރުއޮއްސުނީއްސުރެ މިހާތަނަށް ހަތަރު މީހަކު ނިޔާވެފައި ވާކަމަށް އެޗްޕީއޭއިން މައުލޫމާތުދެއެވެ.
ބުރާސްފަތި ދުވަހު ކޮވިޑްގެ 78 ވަނަ މަރު ރިޕޯޓު ކޮށްފައިވާއިރު، އޭނާ ނިޔާވެފައިވަނީ އެދުވަހުގެ އިރާކޮޅު 7:50 ހާއިރު ކަމަށް އެޗްޕީއޭއިން މައުލޫމާތުދެއެވެ. އެއީ ނައިފަރު ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ އުމުރުން 97 އަހަރުގެ ދިވެހި އަންހެނެއް ކަމަށް އެޗްޕީއޭއިން ބުނެއެވެ. އޭނާ ބައްޔަށް ޕޮޒިޓިވްކަން އެނގުނީ މެއިމަހުގެ 6 ވަނަ ދުވަހުއެވެ.
ކޮވިޑް ބަލީގައި ބުރާސްފަތި ދުވަހުގެ ރޭ 21:35 ހާއިރު ވެސް މީހަކު ނިޔާވެފައިވެއެވެ. އެއީ ހުޅުމާލެ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ އުމުރުން 88 އަހަރުގެ ދިވެހި ފިރިހެނެކެވެ. އޭނާ ބައްޔަށް ޕޮޒިޓިވް ވެފައި ވަނީ އޭޕްރީލް މަހުގެ 29 ވަނަ ދުވަހު ކަމަށް އެޗްޕީއޭއިން ބުނެއެވެ.
ހުކުރުދުވަހު ބަލީގައި ދެ މީހަކު ނިޔާވެފައި ވާކަމަށް އެޗްޕީއޭއިން ބުނެއެވެ. މީގެ ތެރެއިން ފުރަތަމަ މީހާ ނިޔާވެފައިވަނީ ހުކުރު ދުވަހުގެ ރޭ ދަންވަރު 03:47 ހާއިރުއެވެ. އެއީ އުމުރުން 60 އަހަރުގެ އިންޑިއާއަށް ނިސްބަތްވާ ފިރިހެނެކެވެ. އޭނާއަކީ ދަރުމަވަންތަ ހޮސްޕިޓަލުގައި އެޑްމިޓްކޮށްގެން ފަރުވާދެމުން ދިޔަ މީހެކެވެ. އޭނާ ބައްޔަށް ޕޮޒިޓިވްވީ އޭޕްރީލް މަހުގެ 28 ވަނަ ދުވަހުއެވެ.
މި ބަލީގައި ހުކުރު ދުވަހު ހެނދުނު ވެސް މީހަކު ނިޔާވެފައި ވެއެވެ. އެއީ އުމުރުން 37 އަހަރުގެ ބަންގްލަދޭޝް ފިރިހެނެއް ކަމަށް އެޗްޕީއޭއިން މައުލޫމާތުދެއެވެ. އޭނާ ނިޔާވީ މާފުށީގައި ކަރަންޓީނުގައި ހުއްޓާ ކަމަށް އެޗްޕީއޭއިން ބުނެއެވެ. އެއީ އޭޕްރީލް މަހުގެ 26 ވަނަ ދުވަހު ބައްޔަށް ޕޮޒިޓިވް ވެފައިވާ މީހެކެވެ.
ކޮވިޑްގެ ހާލަތު ރާއްޖޭގައި ގޯސްވެފައިވާއިރު، ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. އަދި ކޮވިޑްގައި މަރުވާ މީހުންގެ އަދަދު ބޮޑުތަނުން އިތުރުވަމުން ދާކަން ފަހަގަކުރެވެއެވެ.
