ނަޝީދަށް ދިން ހަމަލާއަކީ މުޅި އިންސާނިއްޔަތަށް ދިން ހަމަލާއެއް – ޖީހާން
7 މެއި 2021 | ހުކުރު 05:39ޖިހާން ވިދާޅުވީ މި ހަމަލާގެ ސަބަބުން ރާއްޖޭގައި، ދިރިހުރުމުގެ ހައްގު ކަށަވަރުވެފައިވާ މިންވަރުގެ ނާޒުކުކަން އެނގިގެން ދާކަމަށް
ހިންނަވަރު ދާއިރާގެ މެމްބަރު ޖީހާން މަހްމޫދު
ކުރީގެ ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށް ދިން ހަމަލާއަކީ މުޅި އިންސާނިއްޔަތަށް ދިން ހަމަލާއެއް ކަމަށް ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު އަދި މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީގެ މުގައްރިރު ޖީހާން މަހްމޫދް ވިދާޅުވެއްޖެއެވެ.
ޖިހާން ވިދާޅުވީ މި ހަމަލާގެ ސަބަބުން ރާއްޖޭގައި، ދިރިހުރުމުގެ ހައްގު ނުވަތަ ފުރާނައިގެ ހައްގު ކަށަވަރުވެފައިވާ މިންވަރުގެ ނާޒުކުކަން އެނގިގެން ދާކަމަށެވެ. ހަމައެއާއެކު މި ހަމަލާއަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް ޖީހާން ވިދާޅުވިއެވެ.
ރައީސް ނަޝީދުއަށް ދިން ހަމަލާއާ ގުޅިގެން ޖީހާން ވަނީ ވަރަށް ބޮޑަށް ކަންބޮޑުވުން ފާޅުކުރައްވާފައެވެ.
ބުރާސްފަތި ދުވަހުގެ ރޭ 8 ޖަހާކަންހާއިރު، ރައީސް ނަޝީދުގެ ގެކޮޅު ކައިރީގައި ބާރުގަދަ އެއްޗެއް ގޮއްވާލައިގެން ދިން ހަމަލާގައި ލިބިވަޑައިގެންނެވި ޒަޚަމްތަކަށް އެމަނިކުފާނު ގެންދަވަނީ އޭޑީކޭ ހޮސްޕިޓަލުގައި ފަރުވާ ހޯއްދަވަމުންނެވެ. އެ ހަމަލާގައި، އިތުރު ތިން މީހަކަށް އެކި ވަރުގެ އަނިޔާވެފައި ވާއިރު އޭގެ ތެރޭގައި ފަތުރުވެރިއަކު ވެސް ހިމެނެއެވެ.
ރައީސް ނަޝީދަށް ދިން ހަމަލާއާ މެދު ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ. އެގޮތުން އިދިކޮޅުން ވެސް މި ހަމަލާ ކުށްވެރިކޮށްފައިވާއިރު ސަރުކާރުގެ އިސް ބޭފުޅުންނާއި، ބޭރު ދުނިޔޭގެ ގިނަ ބަޔަކު އަންނަނީ މިކަން ކުށްވެރި ކުރަމުންނެވެ.
މި ހަމަލާއާ ގުޅިގެން ފުލުހުންގެ އެލާޓް ލެވެލް ވަނީ ތިނަކަށް މަތިކޮށްފައެވެ. އަދި ހަމަލާ ދިން ސަރަހައްދު ވަނީ އާންމުންނަށް ނުވަދެވޭނޭހެން ބަންދުކޮށްފައެވެ.
