ކެފޭ ރެސްޓޯރެންޓުތަކުގައި ފިޔަވަޅުތައް ތަންފީޒު ނުކުރެވޭ އަދި ނުބެލޭ - ޑރ.ނަޒްލާ
5 މެއި 2021 | ބުދަ 06:46އެންމެ ރަނގަޅީ ކެފޭ ރެސްޓޯރެންޓުތަކުގެ އިންޑައިނިންގެ ޚިދުމަތް ހުއްޓާލުން
ފުޑް ކޯޓަކީ ވަރަށް ގިނަ އަދަދެއްގެ އާންމުން ޚިދުމަތް ހޯދާ ތަނެއް
ރައްކާތެރިކަމުގެ ގޮތުން އަޅާފައިވާ ފިޔަވަޅުތައް ކެފޭ ރެސްޓޯރެންޓުތަކުގައި ތަންފީޒު ނުކުރެވޭ ކަމަށާއި އަދި ފިޔަވަޅުތަކަށް އަމަލުކުރޭތޯ ނުބެލޭ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ ވިދާޅުވެއްޖެއެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ އެންމެ ރަނގަޅީ ކެފޭ ރެސްޓޯރެންޓުތަކުގެ އިންޑައިނިންގެ ހިދުމަތް ހުއްޓާލުން ކަމަށެވެ. މާސްކް ނާޅާ މީހުން ކައިރި ކައިރީގައި ތިބޭއިރު އެއީ ވައިރަސް ފެތުރުމަށް ލިބޭ އިތުރު ބާރެއް ކަމަށް ޑރ ނަޒްލާ ވިދާޅުވިއެވެ. އިންޑައިނިންގެ ޚިދުމަތް ދޭ ކަމުގައިވާނަމަ ބެލޭނެ ވަކި އިންތިޒާމެއް ހަމަޖެހިފައި އޮންނަން ޖެހޭ ކަމަށް ވެސް ވިދާޅުވިއެވެ.
ތަންތަނަށް ރޯދަވީއްލަ ދިއުމުގެ ބަދަލުގައި އެމީހެއްގެ ގޭގައި ރޯދަވީއްލުމުގެ ކަންތައްތައް ކުރިއަށް ގެންދިއުމަށް އިލްތިމާސް ކުރައްވަމުން ޑރ. ނަޒްލާ ވިދާޅުވީ ވައިރަސް ފެތުރިފައިވާ މިންވަރަށް ބަލާއިރު ރެސްޓޯރެންޓުތަކަށް ރޯދަވީއްލުމަށް ދިޔުމަކީ އެއްވެސް ހާލެއްގައި ހިތްވަރުދޭ ކަމެއް ނޫން ކަމަށެވެ.
ގޭގައި ރޯދަ ވީއްލުމުގެ އިންތިޒާމު ހަމަޖެހިފައިނުވާ މީހުންނަށް ޓޭކްއަވޭގެ ހިދުމަތް ބޭނުން ކުރެވޭ ކަމަށާއި ނަންބަރުތައް ދަށް ކުރުމަށް މާސްކް ނާޅާ އެއްވުންތައް މަދުކުރަން ޖެހޭ ކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ މިހެން ވިދާޅުވެފައިވާއިރު މިހާރު ގިނަ ރެސްޓޯރެންޓުތަކުން ހެލްތް ޕްރޮޓެކްޝަން އެޖެންސީން ކަނޑައަޅާފައިވާ ގައިޑްލައިނާ އެއްގޮތަށް އަމަލު ނުކުރާކަން ފާހަގަކުރެއެވެ. އަދި ބައެއް ކެފޭ ރެސްޓޯރެންޓުތަކުގައި ގިނަ އަދަދެއްގެ މީހުންނަށް އެއްފަހަރާ ވަދެވޭއިރު ހުން ބަލައި، ހޭންޑް ސެނެޓައިޒް ނުކުރާކަން ވެސް ފާހަގަކޮށްލެއެވެ.
ކޮވިޑް-19 އާ ގުޅިގެން ކާބޯތަކެތީގެ ޚިދުމަތް ފޯރުކޮށްދިނުމުގައި ބަލި ފެތުރުން މަދުކުރުމަށްޓަކާ ރައްކާތެރިކަމަުގެ ގޮތުން އަޅަންޖެހޭ ފިޔަވަޅުތައް އެޅުމަށް އަމަލުކުރަންވީ ގޮތުގެ އުސޫލުގައި އެޗްޕީއޭ އިން ބުނެފައިވަނީ ކާބޯތަކެތީގެ މަސައްކަތްކުރާ ތަންތަނުގައި ތަނަށް ޒިޔާރަތްކުރާ ފަރާތްތަކާއި ކަސްޓަމަރުން އަމަލުކުރަންވީ ގޮތުގެ މައުލޫމާތު ފެންނަ ގޮތަށް ބަހައްޓަން ޖެހޭ ކަމަށެވެ. އަދި ކާބޯތަކެތީގެ ޚިދުމަތްދޭ ތަންތަނުގައި އާންމު ސާފުތާހިރުކަން ދެމެހެއްޓުމަށްޓަކައި ރަނގަޅަށް އަތް ދޮވެވޭނެ އިންތިޒާމު ހަމަޖައްސަން ޖެހޭ ކަމަށާއި އަތްދޮވުމަށް ސައިބޯނި ފަދަ ތަކެތި މެދުނުކެޑި ލިބެން ހުންނަން ޖެހޭނެ ކަމަށް ވެސް އުސޫލުގައިވެއެވެ.
