އަނެއްކާވެސް އައު ރިކޯޑެއް، މިއަދު 601 ކޭސް!
ޕޮޒިޓިވްވި މީހުންގެ ޖުމްލަ އަދަދު ވަނީ 31،931ށް އަރާފައި
ކޮވިޑަށް ރެންޑަމް ސާމްޕަލް ނެގުމުގެ މަސައްކަތް ކުރަމުން ދަނިކޮށް
ރާއްޖެއިން އެއްދުވަހާ 600ށް ވުރެ ގިނަ މީހުން ކޮވިޑަށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީން އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން އަންގާރަ ދުވަހު 601 މީހުން ވަނީ ކޮވިޑަށް ޕޮޒިޓިވްވެފައެވެ. އެއީ މާލެ ސަރަހައްދުން ޕޮޒިޓިވްވި 440 މީހުންނާއި އަތޮޅުތެރޭގެ އެކި ރަށްރަށުން ޕޮޒިޓިވްވި 141 މީހުންގެ އިތުރުން ރިސޯޓްތަކުން ޕޮޒިޓިވްވި 19 މީހުން އަދި ސިނާއީ ރަށްތަކުން ޕޮޒިޓިވްވި 11 މީހުންނެވެ.
އަންގާރަ ދުވަހު ޕޮޒިޓިވްވި 601 މީހުންނާއި އެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 31،931ށް އަރާފައެވެ. އަދި ހޮސްޕިޓަލްގައި އެޑްމިޓްކޮށްގެން ފަރުވާދޭ މީހުންގެ އަދަދު ވަނީ 181ށް އަރާފައެވެ.
ބަލިޖެހުނު މީހުންގެ ތެރެއިން 25،340 މީހުން ބަލިން ރަނގަޅުވެފައިވާ އިރު، 6،508 މީހުން ދަނީ މިވަގުތު ކޮވިޑަށް ފަރުވާހޯދަމުންނެވެ.
ރާއްޖޭގައި ކޮވިޑްގެ ހާލަތު ގޯސްވަމުން ދިޔުމާއެކު ސަރުކާރުން ވަނީ ލުއިދީފައިވާ ފިޔަވަޅުތައް ހަރުކަށިކޮށްފައެވެ. އެގޮތުން އަތޮޅުތެރޭގައި ކޭސްތައް ރިޕޯޓްކުރާ މިންވަރު އިތުރުވަމުންދާތީ މާލެ ސަރަހައްދު ފިޔަވައި މީހުން ދިރިއުޅޭ ރަށްރަށުގައި އެއް ހަފުތާގެ މުއްދަތަކަށް ޚާއްސަ ފިޔަވަޅުތަކެއް އެޅުމަށް އެޗްޕީއޭއިން ވަނީ އަންގާފައެވެ.
މީގެކުރިން މާލެ ސަރަހައްދުގައި އެކަނި ކޮވިޑްގެ ކޭސްތައް އިތުރުވަމުން ދިޔަނަމަވެސް މިފަހަކުން އަތޮޅުތެރޭގައިވެސް ކޮވިޑްގެ ހާލަތު ވަނީ ގޯސްވެފައެވެ. މިހާރު އަތޮޅުތަކުން ފެންނަ ކޭސްތަކުގެ އަދަދު ދެހާހާއި ކައިރިކުރާއިރު މޮނިޓަރިންއަށް ލާފައިވާ ރަށްރަށުގެ އަދަދު ވިއްސަށްވުރެ ވަނީ މަތިވެފައެވެ.
