ހެލްތް ގިނަ ޕްރޮފެޝަނަލުން ދަނީ ޕޮޒިޓިވްވަމުން، ލަފާ ދޭނީ ތަންކޮޅެއް ބޮޑަށް ފިޔަވަޅުތައް ވަރުގަދަ ކުރަން: ޑރ.ނަޒްލާ
އެހެނިހެން ބަލިތަކުގެ މީހުންނަށް ވެސް ފަރުދާ ދިނުމަށް އުނދަގޫތަކާއި ދަތިތައް ކުރިމަތިވަމުންދޭ
ފަލަސުރުޚީ ޕްރޮގްރާމްގައި ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ ވާހަކަދައްކަވަނީ
ހެލްތް ގިނަ ޕްރޮފެޝަނަލުން ކޮވިޑް-19ށް ފޮޒިޓިވްވަމުންދާ ކަމަށާއި، ލަފާ ދޭނީ ތަންކޮޅެއް ބޮޑަށް ފިޔަވަޅުތައް ވަރުގަދަ ކުރުމަށް ކަމަށް ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ޑރ.ނަޒްލާ ވިދާޅުވީ ކޮވިޑް-19ގެ ހާލަތު ގޯސްވެ ރާއްޖެއިން ގިނަ ބަޔަކު ޕޮޒިޓިވްވަމުންދާ ކަމަށެވެ. އޭގެ ތެރޭގައި ސިއްހީ ގިނަ ޚިދުމަތްތެރިން ޕޮޒިޓިވް ވަމުންދާކަން ޑރ.ނަޒްލާ ފާހަގަ ކުރެއްވިއެވެ. ޑރ.ނަޒްލާ ވިދާޅުވީ ބަލި މީހުންނަށް ސިއްހީ ޚިދުމަތްތެރިން ފަރުވާ ދޭން ބޭނުންވާނެ ކަމަށާއި، އަޅާނުލާ ދޫކޮށްލަން ބޭނުން ނުވާނެ ކަމަށެވެ. ނަމަވެސް މިހާރުގެ ހާލަތު ހުރި ގޮތުން ކޮވިޑްގެ ބައްޔާއި، އެހެނިހެން ބަލިތަކުގެ މީހުންނަށް ވެސް ފަރުވާ ދިނުމަށް އުނދަގޫތަކާއި ދަތިތައް ކުރިމަތިވަމުންދާ ކަމަށް ވިދާޅުވިއެވެ.
މިހާރުވެސް ސިއްހީ ޚިދުމަތްތެރިން ވަރަށް ބުރަކޮށް މަސައްކަތްކުރާ ކަމަށާއި ނަރުހުން 12 ގަޑިއިރު މަސައްކަތް ކުރަމުންދާ ކަން ޑރ ނަޒްލާ ފާހަގަ ކުރެއްވިއެވެ.
ބަލީގެ ހާލަތު ގޯސްވެ މިހާރު އަޅާފައިވާ ފިޔަވަޅުތަކަށް އިޝާރާތް ކުރައްވަމުން ވިދާޅުވީ އަބަދުވެސް ވިސްނަމުންދަނީ ހެލްތުގެ ސައިޑުން ކަމަށެވެ. އެގޮތުން މިހާރު އަޅާފައިވާ ފިޔަވަޅުތައް އިތުރަށް ހަރުކަށިކޮށް މީހުން އެއްވެ އުޅުން ކޮންޓްރޯލް ކުރަން ބޭނުންވާ ކަމަށްވެސް ވިދާޅުވިއެވެ.
ރާއްޖޭގެ ހާލަތަށް އަލިއަޅުވާލައްވަމުން ޑރ.ނަޒްލާ ވިދާޅުވީ 52 އިންސައްތަ މީހުން ވެކްސިންގެ ފުރަތަމަ ޑޯޒް ޖެހުމަކީ ލިބުނު ކުރިއެރުމެއް ކަމަށެވެ. އެހެންނޫން ނަމަ ހާލަތު މިހާރު މާ ގޯސްވާނެ ކަމަށް ޑރ.ނަޒްލާ ވަނީ ލަފާކުރައްވާފައެވެ.
ދުނިޔޭގައި މިހާރު 4 ވޭރިއަންޓެއް އުޅޭއިރު އެތަނުން ބައެއް ވޭރިއަންޓުތައް ރާއްޖޭގައި ވެސް އުޅޭނެ ކަމަށް ޑރ ނަޒްލާ ވިދާޅުވިއެވެ. ވޭރިއަންޓްތަކާމެދު އޭނާ ވިދާޅުވީ ޔޫކޭ ވޭރިއެންޓާއި ބްރެޒިލް ވޭރިއެންޓް އެސްޓަރަޒެނިކާ، ކޮވިޝީލްޑް ވެކްސިނަށް މަސައްކަތް ކުރާނެ ކަމަށެވެ.
