ޖަލަށް ފޯނާއި ޑްރަގް ވެއްދުމުގައި ތުހުމަތު ކުރެވިގެން ހައްޔަރުކުރި އޮފިސަރުންގެ ވަނަވަރު އާއްމުކޮށް ދައުވާ ކުރަން ފޮނުވައިފި
10 އޯގަސްޓު 2024 | ހޮނިހިރު 12:25މާފުށި ޖަލުގެ 13 އޮފިސަރުން ހައްޔަރު ކޮށްފައިވަނީ 28 ޖޫން 2024 ގައި
ޖަލަށް ފޯނާއި ޑްރަގް ވެއްދުމުގައި ތުހުމަތު ކުރެވިގެން ހައްޔަރުކުރި އޮފިސަރުންތައް
ޖަލަށް ފޯނާއި ޑްރަގް ވެއްދުމުގައި ބައިވެރިވާ ކަމަށް ތުހުމަތު ކުރެވިގެން ހައްޔަރުކުރި އޮފިސަރުންގެ ވަނަވަރު އާއްމުކޮށް ދައުވާ ކުރަން ފޮނުވައިފިއެވެ.
ހޮނިހިރު ދުވަހު ފުލުހުން ބުނީ މި 13 މީހުންގެ މައްސަލަ ތަހުގީގުކޮށް ނިންމައި، ޕްރޮސެކިއުޓަރ ޖެނަރަލް އޮފީހަށް ފޮނުވާފައިވާ ކަމަށެވެ.
ދައުވާ ކުރަން ފޮނުވި މީހުންނަކީ:
ޖަލަށް ފޯނާއި ޑްރަގް ވެއްދުމުގައި ބައިވެރިވާ ކަމުގެ ތުހުމަތުގައި މާފުށި ޖަލުގެ 13 އޮފިސަރުން ހައްޔަރު ކޮށްފައިވަނީ 28 ޖޫން 2024 ގައެވެ.
ޖަލަށް ޑްރަގާއި ފޯނު ވެއްދުމުގައި އެތަނުގައި މަސައްކަތް ކުރާ ބައެއް މުވައްޒަފުން އެހީތެރިވާ ކަމުގެ ތުހުމަތުގައި، އެކަމުގައި ބައިވެރިވާ މީހުން ހޯދުމުގެ ޚާއްސަ އޮޕަރޭޝަންތަކެއް ޖޫން މަހުގެ ތެރޭގައި ކުރިއަށް ގެންގޮސްފައިވެއެވެ. އެކަމާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހްސާން ވިދާޅުވީ މައްސަލައިގައި ކަރެކްޝަންސްގައި މަސައްކަތް ކުރާ 18 އޮފިސަރުން ހިމެނޭ ކަމަށާއި، އެ އޮފިސަރުންގެ އެކައުންޓަށް މިދިޔަ އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ވަދެފައި ވާކަމަށެވެ. އެގޮތުން ބައެއް މުވައްޒަފުންގެ އެކައުންޓަށް 24 މިލިއަން ރުފިޔާ ޖަމާވެފައިވާ ކަމަށް މިނިސްޓަރު އިހުސާން ވިދާޅުވިއެވެ.
ފައިސާ އޮފިސަރުންގެ އެކައުންޓަށް އައިސްފައިވާ ވަނީ ބައެއް ގައިދީންގެ އެކައުންޓުންނާއި އެމީހުންނާ ގުޅުން އޮންނަ މީހުންގެ އެކައުންޓުން ކަމަށްވެސް ފުލުހުން ބުނެފައިވެއެވެ.
މައްސަލައިގެ ތުހުމަތުގައި ހައްޔަރު ކުރި 13 އޮފިސަރުންގެ ތެރޭގައި ހިމެނެނީ، ކ. މާފުށިން ހައްޔަރުކުރި 9 އޮފިސަރުންނާއި ކ. ކާށިދޫން ހައްޔަރުކުރި 2 އޮފިސަރުންނާއި ހއ. އުތީމުން ނާއި މާލެއިން ކޮންމެ ރަށަކުން ހައްޔަރު ކުރި އޮފިސަރެއް ކަމަށް މައުލޫމާތު ލިބެއެވެ.
