ދިވެހިން ވަޒީފާއިން ވަކިނުކުރުމަށް ޝަރުތުކޮށް 419 ވިޔަފާރިއަކަށް ލޯނު އެހީ!
އެއްވެސް ސިވިލް ސަރވަންޓެއްގެ މުސާރަ އުނިކޮށްފައެއް ނުވޭ
ރައީސުލްޖުމްހޫރިއްޔާ އިބްރާޙިމް މުހައްމަދު ސާލިހު އެމަނިކުފާނުގެ ތަރުޖަމާނު މަބްރޫކު އަޒީޒާއެކު ރައީސް އޮފީހުގައި
ދިވެހިން ވަޒީފާއިން ވަކި ނުކުރުމަށް ޝަރުތުކޮށް ބީއެމްއެލް މެދުވެރިކޮށް ބޮޑެތި ވިޔަފާރިތަކުގެ ތެރެއިން 419 ވިޔަފާރިއަކަށް ސަރުކާރުން ލޯނު އެހީ ދޫކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މުހައްމަދު މަބްރޫކު އަޒީޒް ވިދާޅުވީ ދިވެހިން ވަޒީފާއިން ވަކި ނުކުރުމަށް ޝަރުތުކޮށް ބީއެމްއެލް މެދުވެރިކޮށް 419 ވިޔަފާރިއަކަށް ލޯނު ދޫކޮށްފައިވާ ކަމަށެވެ. އެއީ މަސައްކަތްތެރިންގެ ހައްގުތައް ރައްކާތެރި ކުރުމުގެ މަގުސަދުގައި ސަރުކާރުން ކުރިއަށް ގެންދިޔަ މުހިއްމު މަސައްކަތެއް ކަމަށް މަބްރޫކު ވިދާޅުވިއެވެ.
މީގެ އިތުރުން އެސްޑީއެފްސީ މެދުވެރިކޮށް ކުދި ވިޔަފާރިތަކާއި އަމިއްލަ މަސައްކަތް ކުރާ މީހުންނަށްވެސް 363 މިލިއަނަށްވުރެ ގިނަ ރުފިޔާ ސަރުކާރުން ވަނީ ދޫކޮށްފައެވެ. އެއީ 1557 ކުދި އަދި މެދުފަންތީގެ ވިޔަފާރިއާއި 662 އަމިއްލަ މަސައްކަތެވެ.
މަބްރޫކު ވަނީ ކޮވިޑުގެ މި ހާލަތުގައިވެސް މަސައްކަތްތެރިންގެ ހައްގުތައް ރައްކާތެރި ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވައި އެކަމުގެ ބައެއް ތަފްސީލުތައް ހިއްސާ ކުރައްވާފައެވެ.
މަބްރޫކު ވިދާޅުވީ ކޮވިޑުގެ މި ހާލަތުގައިވެސް އެއްވެސް ސިވިލް ސަރވަންޓެއްގެ މުސާރަ އުނިކޮށްފައި ނުވާ ކަމަށެވެ. ވަޒީފާއަށް އަސަރުކޮށްފައިވާ ފަރާތްތަކަށް ދޫކުރާ އިންކަމް ސަޕޯޓު އެލަވަންސަކީ ވެސް ރައީސް ސާލިހުގެ ސަރުކާރުން މަސައްކަތްތެރިންގެ ހައްގުތައް ރައްކާތެރި ކުރުމަށް އިސްކަންދީގެން ކޮށްފައިވާ ފާހަގަކޮށްލެވޭ މަސައްކަތެއްކަމަށް ވިދާޅުވިއެވެ.
އެގޮތުން މިހާތަނަށް 22،786 މީހަކަށް އިންކަމް ސަޕޯޓު އެލަވަންސް ދޫކޮށްފައިވާއިރު އިންކަމް ސަޕޯޓުގެ ގޮތުގައި ދޫކޮށްފައިވާ އަދަދުތައް 418 މިލިއަން ރުފިޔާއަށް އަރައެވެ.
މީގެ އިތުރުން ދިވެހިންނަށް ވަޒީފާގެ ފުރުސަތު ފަހިކޮށް ދިނުމާއި ވަޒީފާ ހޯދާ ފަރާތްތަކާއި ވިޔަފާރިތައް ގުޅުވާލުމަށް މިނިސްޓްރީ އޮފް އިކޮނޮމިކް ޑިވެލޮޕްމެންޓުން ތައާރަފު ކުރި ޖޮބް ސެންޓަރުގައި މިހާތަނަށް 883 ވިޔަފާރިއެއް ރަޖިސްޓްރީ ވެފައިވާކަންވެސް މަބްރޫކު ފާހަގަ ކުރެއްވިއެވެ.
މަބްރޫކު ވިދާޅުވީ ކުރިއަށް އޮތް ތަނުގައިވެސް ޖޮބް ސެންޓަރު އިތުރަށް ޕްރޮމޯޓު ކުރުމަށް މުޅި ރާއްޖެއަށް އަމާޒުކޮށްގެން ހޭލުންތެރި ކުރުމުގެ ޕްރޮގްރާމްތައް ހިންގުމަށް ރޭވިފައިވާ ކަމަށެވެ. ރާއްޖޭގެ 62 ރަށަކަށް އަމާާޒުކޮށް އެފަދަ ޕްރޮގްރާމްތައް ހިންގުމަށް ވަނީ ރާވާފައެވެ.
ފިޒިކަލް ޖޮބް ސެންޓަރެއް ހުޅުމާލޭގައި ގާއިމު ކުރުމަށްވެސް ހައުސިން ޑިވޮލޮޕްމަންޓް ކޯޕަރޭޝަނާ ގުޅިގެން މަސައްކަތްތަކެއް ކުރެވެމުންދާކަން މަބްރޫކު ފާހަގަ ކުރެއްވިއެވެ.
