ކޮވިޑް-19ގެ ކޭސްތައް ފެނި ހާލަތު ކޮންޓްރޯލްކުރުމުގެ ގޮތުން މިވަގުތުވެސް ރާއްޖޭގެ 23 ރަށެއް މޮނިޓަރިންގ ގެ ހާލަތުގައިވާ ކަމަށް އެޗްޕީއޭއިން ހާމަކޮށްފިއެވެ.

މީގެތެރޭގައި މަރޗް މަހުގެ ފަހުކޮޅުން ފެށިގެން މޮނިޓަރިންގ ގެ ހާލަތުގައިވާ ޅ. އަތޮޅުގެ ދެ ރަށެއް ހިމެނެެއެވެ. އަދި 4 އަތޮޅެއްގައި ކޮންމެ އަތޮޅެއްގެ 4 ރަށެއް ވަނީ މޮނިޓަރިންގ ގެ ހާލަތުގައެވެ. އެއީ ތ. އަތޮޅު، ލ. އަތޮޅު، އއ. އަތޮޅު އަދި ކ. އަތޮޅުގެއެވެ.

މަރޗް މަހު ކޮވިޑްގެ ކޭސްތައް ފެނި ބަލި ފެތުރެން ފެށުމުން މޮނިޓަރިންގ ގެ ހާލަތަށް ގެނައި ޅ. ނައިފަރާއި ފެލިވަރު އަދިވެސް އޮތީ މޮނިޓަރިންގ ގައެވެ. ޅ. ނައިފަރު މޮނިޓަރިންގ ގެ ހާލަތަށް ގެނެސްފައިވަނީ މަރޗް މަހުގެ 23 ވަނަ ދުވަހުއެވެ. އަދި ފެލިވަރު މޮނިޓަރިންގ ގެ ހާލަތަށް ގެނެސްފައިވަނީ މަރޗް މަހުގެ 24 ވަނަ ދުވަހުއެވެ. އެ ދެރަށް މޮނިޓަރިންގ ގައި އޮންނަތާ މަސް ދުވަހަށް ވުރެ ގިނަ ވެފައިވާއިރު ނައިފަރުގައި އޭޕްރީލް މަހުގެ 30 ވަނަ ދުވަހުގެ ނިޔަލަށް 431 މީހަކު ވަނީ ކޮވިޑަށް ޕޮޒިޓިވްވެފައެވެ. މީގެތެރެއިން މިހާރު އެކްޓިވް ކޭސްގެ ގޮތުގައި ގުނަމުންދަނީ 189 ކޭހެވެ.

އޭޕްރީލް މަހުގެ 30 ވަނަ ދުވަހު 38 މީހަކު ވަނީ ކޮވިޑަށް ޕޮޒިޓިވްވެފައެވެ. އޭގެތެރެއިން 16 މީހަކީ ފްލޫ ކްލިނިކަށް ދެއްކި މީހުންނެވެ. އަނެއް 22 މީހުންނަކީ ކޮންޓެކްޓް ޓްރޭސިންގ ގެ ތެރެއިން ޕޮޒިޓިވްވިކަމަށް ރިޕޯޓްކޮށްފައިވާ މީހުންނެވެ. ނައިފަރުގައި މިހާތަނަށް 3030 ސާމްޕަލެއް ނަގާފައިވާއިރު އަދިވެސް ނަތީޖާ ނުލިބޭ 94 ސާމްޕަލެއްވާ ކަމަށް ޅ. އަތޮޅު ހޮސްޕިޓަލުން މައުލޫމާތުދެއެވެ.

އެއް އަތޮޅަކުން އެންމެ ގިނަ ރަށް މޮނިޓަރިންގ ގައި އޮތް އަތޮޅަކީ ތ. އަތޮޅެވެ. ތ. އަތޮޅުން ކޮވިޑްގެ ކޭސްތައް ފެނިގެން އެރަށުގެ މީހުން ދިރިއުޅޭ 7 ރަށެއް މޮނިޓަރިންގ ގެ ހާލަތަށް ގެނައެވެ. ނަމަވެސް އޭޕްރީލް މަހުގެ 30 ވަނަ ދުވަހާ ހަމައަށް އެއަތޮޅުން މޮނިޓަރިންގ ގެ ހާލަތުގައި އޮތީ 4 ރަށެކެވެ. އެއީ އޭޕްރީމް މަހުގެ 9 ވަނަ ދުވަހު މޮނިޓަރިންގ އަށް ލީ ވޭމަންޑޫ އާއި އޭޕްރީލް މަހުގެ 11 ވަނަ ދުވަހު މޮނިޓަރިންގ ގެ ހާލަތަށް ގެނައި ކިނބިދޫ އާއި އޭޕްރީލް މަހުގެ 16 ވަނަ ދުވަހު މޮނިޓަރިންގ އަށް ގެނައި މަޑިފުށި އަދި އެންމެ ފަހުން އެއަތޮޅުން ކޮވިޑްގެ ކޭސްތައް ފެނިގެން އޭޕްރީލް މަހުގެ 19 ވަނަ ދުވަހު މޮނިޓަރިންގ ގެ ހާލަތަށް ގެނައި ތިމަރަފުއްޓެވެ.

ތ ވޭމަންޑޫއަށް ބަލާއިރު އޭޕްރީލް މަހުގެ 30 ވަނަ ދުވަހުގެ ނިޔަލަށް އެރަށުން ޖުމްލަ 205 މީހަކު ވަނީ ކޮވިޑަށް ޕޮޒިޓިވްވެފައެވެ. އޭގެތެރެއިން މިހާރު 101 މީހަކު ބަލިން ރަނގަޅުވެފައިވާއިރު މިވަގުތުވެސް ކޮވިޑް ބަލީގެ 101 މީހަކު އެރަށުގައި އެބަތިބި ކަމަށް ތ. އަތޮޅު ހޮސްޕިޓަލުން މައުލޫމާތުދެއެވެ. ޖުމްލަ 913 ސާމްޕަލެއް ނަގާފައިވާއިރު އަދިވެސް ނަތީޖާ ނުލިބޭ 23 ސާމްޕަލެއްވާ ކަމަށް އަތޮޅު ހޮސްޕިޓަލުން ބުނެއެވެ. އަދި ކޮވިޑް ފެސިލިޓީގައި އަންނަނީ 3 މީހަކަށް ފަރުވާދެމުންނެވެ.

މަޑިފުއްޓަށް ބަލާއިރު އެރަށުން 26 މީހަކު ވަނީ ކޮވިޑަށް ޕޮޒިޓިވްވެފައެވެ. އަދި އޭޕްރީލް މަހުގެ 29 ވަނަ ދުވަހާ ހަމައަށް އެރަށުގައި އެކްޓިވް ކޭހުގެ ގޮތުގައި 25 ކޭހެއް އަންނަނީ ރިޕޯޓްކުރަމުންނެވެ. ޖުމްލަ 371 ސާމްޕަލެއް މިހާތަނަށް އައިއިރު އެރަށުން ނަގާފައިވާއިރު އަދިވެސް ނަތީޖާ ނުލިބޭ 8 ސާމްޕަލެއްވާ ކަމަށް އެރަށު ހެލްތު ސެންޓަރުން މައުލޫމާތުދެއެވެ.

ތ. އަތޮޅުގެ އިތުރުން ލ. އަތޮޅުގެވެސް 4 ރަށެއް ވަނީ މޮނިޓަރިންގގައެވެ. އެއީ އޭޕްރީލް މަހުގެ 23 ވަނަ ދުވަހު މޮނިޓަރިންގ ގެ ހާލަތަށް ގެނައި މާންދޫ އާއި އޭޕްރީލް މަހުގެ 24 ވަނަ ދުވަހު މޮނިޓަރިންގ ގެ ހާލަތަށް ގެނައި ގަން އަދި ފޮނަދޫގެ އިތުރުން އޭޕްރީލް މަހުގެ 28 ވަނަ ދުވަހު މޮނިޓަރިންގ އަށް ލާފައިވާ ދަނބިދޫއެވެ.

މާންދޫ ކްލަސްޓަރ އާ ގުޅިގެން އެއަތޮޅުގެ ރަށްރަށުން ކޭސްތައް ފެންނަމުންދާއިރު އޭޕްރީލް މަހުގެ 30 ވަނަ ދުވަހުގެ ނިޔަލަށް އެރަށުން 6 މީހަކު ވަނީ ކޮވިޑަށް ޕޮޒިޓިވްވެފައެވެ. 88 ސާމްޕަލެއް މިހާތަނަށް އައިރު ނަގާފައިވާއިރު ނަތީޖާ ނުލިބޭ 51 ސާމްޕަލެއްވާކަމަށް އެރަށު ހެލްތު ސެންޓަރުން މައުލޫމާތުދެއެވެ. ލ. ގަން ރީޖަނަލް ހޮސްޕިޓަލުން މައުލޫމާތުދޭ ގޮތުގައި މާންދޫ ޕޮޒިޓިވްވި މީހުންގެ އަދަދު ވަނީ 230ށް އަރާފައެވެ. ލ. ގަން މުކުރިމަގުން 16 މީހުން ޕޮޒިޓިވްވެފައިވާއިރު ލ. ގަން އާބާދު ސަރަހައްދުން 5 މީހުން ވަނީ ކޮވިޑަށް ޕޮޒިޓިވްވެފައެވެ. މިހާތަނަށް 1057 ސާމްޕަލެއް ނަގާފައިވާއިރު ނަތީޖާ ނުލިބޭ 343 ސާމްޕަލެއްވާ ކަމަށް ރީޖަނަލް ހޮސްޕިޓަލުން މައުލޫމާތުދެއެވެ.

މީގެއިތުރުން އއ. އަތޮޅުގެވެސް 4 ރަށެއް ވަނީ މޮނިޓަރިންގ ގެ ހާލަތަށް ގެނެސްފައެވެ. އެ ރަށްތަކަކީ އޭޕްރީލް މަހުގެ 19 ވަނަ ދުވަހު މޮނިޓަރިންގ ގެ ހާލަތަށް ގެނައި ބޮޑުފުޅަދޫ އާއި އޭޕްރީލް މަހުގެ 21 ވަނަ ދުވަހު މޮނިޓަރިންގ ގެ ހާލަތަށް ގެނައި މަތިވެރި އާއި 27 ވަނަ ދުވަހު މޮނިޓަރިންގ އަށް ލާފައިވާ އުކުޅަސް އަދި އެންމެ ފަހުން އޭޕްރީލް މަހުގެ 30 ވަނަ ދުވަހު މޮނިޓަރިންގ ގެ ހާލަތަށް ގެނައި ރަސްދޫއެވެ.

އއ. މަތިވެރިއަށް ބަލާއިރު އެރަށުން އެރަށުން 185 މީހަކު ވަނީ ކޮވިޑަށް ޕޮޒިޓިވްވެފައެވެ. ޖުމްލަ 364 ސާމްޕަލެއް ނަގާފައިވާއިރު އަދި ނަތީޖާ ނުލިބޭ 55 ސާމްޕަލެއްވާ ކަމަށް އެރަށު ހެލްތު ސެންޓަރުން މައުލޫމާތުދެއެވެ. އއ. އުކުޅަހުގެ ހާލަތަށް ބަލާއިރު އެރަށުން 23 މީހަކު ވަނީ ކޮވިޑަށް ޕޮޒިޓިވްވެފައެވެ. އެރަށުން ޖުމްލަ 55 ސާމްޕަލެއް ނަގާފައިވާއިރު އަދިވެސް ނަތީޖާ ނުލިބޭ 1 ސާމްޕަލެއްވާ ކަމަށް އެރަށު ހެލްތު ސެންޓަރުން މައުލޫމާތުދެއެވެ.

ކ އަތޮޅަށް ބަލާއިރު އެއަތޮޅުގެވެސް 4 ރަށެއް ވަނީ މޮނިޓަރިންގ ގެ ހާލަތުގައެވެ. އެއީ އެޕްރީލް މަހުގެ 19 ވަނަ ދުވަހު މޮނިޓަރިންގ ގެ ހާލަތަށް ގެނެސްފައިވާ ހިންމަފުއްޓާއި 20 ވަނަ ދުވަހު މޮނިޓަރިންގ ގެ ހާލަތަށް ގެނައި މާފުށި އަދި ގުޅި އާއި އޭޕްރީލް މަހުގެ 27 ވަނަ ދުވަހު މޮނިޓަރިންގ ގެ ހާލަތަށް ގެނައި ތުލުސްދޫއެވެ. މާފުށިން ޕޮޒިޓިވްވީ މީހުންގެ އަދަދު ވަނީ 291ށް އަރާފައެވެ.

އދ. މާމިނގިލި މޮނިޓަރިންގ އަށް ގެނެސްފައިވަނީ އޭޕްރީލް މަހުގެ 4 ވަނަ ދުވަހުއެވެ. އޭޕްރީލް މަހުގެ 30 ވަނަ ދުވަހުގެ ނިޔަލަށް މާމިނގިލިން 95 މީހަކު ވަނީ ޕޮޒިޓިވްވެފައެވެ. މީގެތެރެއިން 29 މީހަކީ މިވަގުތު ރަށުގައި ތިބި މީހުންނެވެ. ޖުމްލަ 1037 ސާމްޕަލެއް އެރަށުން ނަގާފައިވާއިރު ނަތީޖާ ނުލިބޭ 52 ސާމްޕަލެއްވާކަމަށް މާމިނގިލި ހެލްތު ސެންޓަރުން މައުލޫމާތުދެއެވެ. އެރަށުން އޭޕްރީލް މަހުގެ 30 ވަނަ ދުވަހުވެސް ވަނީ 5 މީހަކު ކޮވިޑަށް ޕޮޒިޓިވްވެފައެވެ.

ބ. އޭދަފުށިން ކޮވިޑްގެ ކޭސްތައް ފެނިގެން އެރަށް މޮނިޓަރިންގ ގެ ހާލަތަށް ގެނެސްފައިވަނީ އޭޕްރީލް މަހުގެ 19 ވަނަ ދުވަހުއެވެ. އެރަށުން މިހާތަނަށް އައިއިރު 139 މީހަކު ވަނީ ކޮވިޑަށް ޕޮޒިޓިވްވެފައެވެ. އޭޕްރީލް މަހުގެ 30 ވަނަ ދުވަހު ވަނީ 2 މީހަކު އެރަށުން ކޮވިޑަށް ޕޮޒިޓިވްވެފައެވެ.

ގދ. ތިނަދޫ އޭޕްރީލް މަހުގެ 24 ވަނަ ދުވަހު މޮނިޓަރިންގ ގެ ހާލަތަށް ގެނެސްފައިވާއިރު އައްޑޫ ސިޓީ ހުޅުމީދޫ މޮނިޓަރިންގ އަށް ލާފައިވަނީ އޭޕްރީލް މަހުގެ 29 ވަނަ ދުވަހުއެވެ. އަދި އެންމެފަހުން މޮނިޓަރިންގ އަށް ލާފައިވަނީ މ ކޮޅުފުއްޓެވެ. އެއީ އޭޕްރީލް މަހުގެ 30 ވަނަ ދުވަހުއެވެ.