ހުޅުމާލޭގެ ދެ ފިޔަވަހި ދޭތެރޭގައި ހަދާ ކޯރުގެ 49 އިންސައްތަ މަސައްކަތް ނިންމާލައިފި
30 އެޕްރީލު 2021 | ހުކުރު 12:38މިއީ 50 މީޓަރު ފުޅާ، 1.85 މީޓަރު ފުން ކޯރެއް
ހުޅުމާލެ ފޭސް 2
ހުޅުމާލޭގެ ދެ ފިޔަވަހި ވަކިކުރަން ހަދާ ކޯރުގެ 49 އިންސައްތަ މަސައްކަތް ނިންމާލައިފިއެވެ.
ކޯރު ފަރުމާކޮށްފައިވަނީ އެ ސަރަޙައްދުގައި ބައެއް ކަހަލަ ރިކްރިއޭޝަނަލް ހަރަކާތްތައް ހިންގޭގޮތަށެވެ. މިއީ ލޭންޑް ސްކޭޕް ފުރިހަމަކުރުމަށް ކުރާ މަސައްކަތެކެވެ.
ދެ ފިޔަވަހި ގުޅުވައިދެނީ ކުދި ބުރިޖުތަކުންނެވެ. ބުރިޖު ދަށުން ފެންގަނޑު ދެމޭގޮތަށް ކޯރު ފަރުމާކޮށްފައިވަނީ ހުޅުމާލޭގެ އެ ސަރަހައްދުގެ ލޭންޑް ސްކޭޕަށް އިތުރު ފުރިހަމަކަމެއް އަންނަ ގޮތަށެވެ. މި ކޯރަކީ 50މީޓަރު ފުޅާ، 1.85 މީޓަރު ފުން ތަނެކެވެ. މަޝްރޫއުގެ ބޮޑެތި ގިނަ މަސައްކަތްތައް މިހާރު ނިމިފައިވާއިރު މުޅި މަސައްކަތުގެ %49 ނިމިފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަނުން ބުނެއެވެ. އެގޮތުން ސަރަހައްދު ފުންކުރުމާއި ވެލިގަނޑު ހިމާޔަތްކުރުމަށް ޝީޓް ޕައިލް ކުރުމާއި ގައު ޖެހުމުގެ މަސައްކަތްތައްވެސް ފަށައިގެން ކުރިއަށްދެއެވެ. އެ ސަރަޙައްދުގެ މަލަމައްޗަށް ބޮޑު ބަދަލެއް އަންނާނެ މި މަސައްކަތް، އަންނަ އަހަރުގެ ކުރީކޮޅު ނިންމާލެވޭނެކަމަށް ވެސް އެޗްޑީސީން މަޢުލޫމާތުދެއެވެ.
ކޯރުގެ މަސައްކަތް މުޅިން ނިމޭއިރު އެތަނާ ކައިރިން އެއްގަމުގެ ސަރަހައްދު ތަރައްގީކުރާނީ ތިމާވެއްޓާ ރަށްޓެހި ފެހި ސަރަޙައްދެއްގެ ގޮތުގައެވެ. ދެ ފިޔަވަހި ގުޅުވާލުމަށް ހަދާ ހަތަރު ބުރިޖުގެ މަސައްކަތްވެސް ވަނީ ނިމިފައެވެ. ހުޅުމާލޭ ދެވަނަ ފިޔަވަހީގައި އަމިއްލަ މީހުން ތަރައްގީކޮށްފައިވާ ބައެއް ގެތަކަށް މީހުން ބަދަލުވެ ދިރިއުޅެން ފެށުމާއެކުު އެތަނުން އެއް ބުރިޖުވަނީ އާއްމުކޮށް ބޭނުންކުރަން ހުޅުވާލާފައެވެ.
ހުޅުމާލޭގެ ދެ ވަނަ ފިޔަވަހީގައި ބޮޑު އާބާދީއެއް ދިރިއުޅުމަށް އިމާރާތް ކުރަން ފެށިއިރު، ކުރީގެ ސަރުކާރުން އެޔާއެކު އަންނަންޖެހޭ އެހެން ޚިދުމަތްތައް ފޯރުކޮށްދިނުމުގެ މަސައްކަތް ފަށާފައެއް ނުވެއެވެ. ދެ ވަނަ ފިޔަވަހީގައި ސުކޫލެއްވެސް ނެތްއިރު، ސުކޫލެއް އިމާރަތްކުރުމަށް އެޑިއުކޭޝަން މިނިސްޓްރީން މިހާރު ވަނީ ކުންފުންޏަކާ ހަވާލުކޮށްފަ އެވެ. އޭގެއިތުރުން ބަސް ސްޓޮޕްތަކާއި، އެހެނިހެން އަސާސީ ހިދުމަތްތައް ލިބޭނެ އިންތިޒާމް އެޗްޑީސީން އަންނަނީ ހަމަޖައްސަމުންނެވެ. މީގެ އިތުރުން ފޭސް އެކަކުން ފޭސް ދޭކަށް ކަރަންޓު ނެޓްވޯކް ގުޅާލުމުގެ މަސައްކަތްވެސް ދަނީ ކުރަމުންނެވެ.
