'މަޖާކޮށް ހިތްއުފާކޮށްލަން ޒުވާނުން އެއްތަނަކަށް އެއްވުން' ބައެއް މީހުން މާނަކުރަނީ ރަނގަޅަށް ނޫންކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވެއްޖެއެވެ.

މާލޭގައި ޒުވާނުންނަށް ފަސޭހަކަމާއެކު މިޔުޒިކު އަޑުއަހާލައި، އެކުވެރިންނާ ބައްދަލުކޮށް ހާސްކަމުން ބޭރުގައި އުފާވެރި މާހައުލެއްގައި އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް އެދި ހެންވޭރު ހުޅަނގު ދާއިރާގެ މެންބަރު ހަސަން ލަތީފު ހުށަހެޅުއްވި ގަރާރު ބުރާސްފަތި ދުވަހު ރައްޔިތުންގެ މަޖިލީހުން ވަނީ ފާސްކޮށްފައެވެ. މި ގަރާރު މަޖިލީހުން ފާސްކުރުމާއި ގުޅިގެން ގިނަބައެއްގެ ފާޑުކިޔުން ވަނީ އަމާޒުވެފައެވެ.

މިކަމާއި ގުޅޭ ގޮތުން ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަފުޅު ދައްކަވަމުން، އަހުމަދު އަބްދުﷲ ވިދާޅުވީ، ބުރާސްފަތި ދުވަހު މަޖިލީހުން ފާސްކުރި ގަރާރުގައި ހިމެނޭ ކަންތައްތަކުގެ ތެރެއިން ބައެއް މީހުން ކަންބޮޑުވުން ފާޅުކޮށްފައިވަނީ، ހިތްއުފާކޮށްލާ މަޖާކޮށްލަން އެއްތަނަކަށް އެއްވެލައި އުޅެވުމާގުޅޭ ގޮތުން ކަމަށެވެ. އެއީ އެކަން މާނަކުރެވޭ ގޮތުން ކަމަށް އަހުމަދު އަބްދުﷲ ވިދާޅުވިއެވެ. އަދި މި ގަރާރުގައި ހުރި ކަންކަން ރަނގަޅަށް މާނަކޮށްފިނަމަ އެއިން ނިކުންނާނެ ރަނގަޅު ނަތީޖަތަކުގެ މައްޗަށް އަލިއަޅުއްވާލެއްވިއެވެ.

އަހުމަދު އަބްދުﷲ ވިދާޅުވީ، މާލޭގެ ދިރިއުޅުމުގެ އާންމު ހާލަތު އެންމެންނަށް ވެސް އެނގޭ ކަމަށެވެ. އަދި އެ މާހައުލުގައި ޒުވާނުންނަށް މިނިވަން ކަމާއެކު ހަރަކާތްތެރިވެ އުޅުމުގެ ފުރުސަތު ނެތްކަމަށް ފާހަގަކުރެއްވިއެވެ. އެހެންކަމުން މި މާހައުލުން ނިކުމެވޭނެ، ގޮތްތަކެއް ހޯދުމަކީ ކޮންމެ އިންސާނަކު ވެސް ބޭނުންވާނެ ކަމެއް ކަމަށް އަހުމަދު އަބްދުﷲ ވިދާޅުވިއެވެ.

އަހްމަދު އިތުރަށް ވިދާޅުވީ، ނުރަނގަޅުކޮށް މާނަ ނަގަން ބޭނުންވާ ބަޔަކަށް ކޮންމެ ކަމަކުން ވެސް އެގޮތަށް މާނަ ނެގިދާނެ ކަމަށެވެ. އަދި ކޮންމެ ކަމެއްގެ މާނަ ނުބައިކޮށް ނަގަން ވެއްޖެނަމަ، ގައުމުގައި ކުރެވޭނެ ރަނގަޅު އެއްވެސް ކަމެއް ނޯންނާނެ ކަމަށާއި، ކަންކަމުގައި ރަނގަޅު ވިސްނުމަކުން ވިސްނަން ދަސްކުރަން ވެއްޖެ ކަމަށް ވިދާޅުވިއެވެ.

ޒުވާނުންނަށް ހިތްފަސޭހަކޮށްލެވޭނެ މާހައުލެއް ގާއިމު ކުރުމަށް ހުށަހެޅި ގަރާރު މަޖިލީހުން ފާސްކުރީ 46 މެންބަރުންގެ އަޣުލަބިއްޔަތުންނެވެ.