މަޖިލީހުގެ ދައުރުތައް ދިރާސީ އަހަރުގެ ކަލަންޑަރާއި އެއްގޮތަށް އިސްލާހުކުރުމަށް ރައްޔިތުންގެ މަޖިލީހުން ފާސް ކޮށްފިއެވެ.

ބުރާސްފަތި ދުވަހުގެ ޖަލްސާގައި މިކަން ފާސް ކޮށްފައިވަނީ ވޯޓުގައި ބައިވެރިވި 70 މެންބަރުންގެ އިއްތިފާގުންނެވެ.

މަޖިލީހުގެ ގަވާއިދުގެ 24 ވަނަ މާއްދާގެ (ހ) ގެ (2) ވަނަ ނަންބަރާއި (3) ވަނަ ނަންބަރު އިސްލާހުކުރުމަށް ހުށައަޅާފައިވާ މައްސަލަ ދިރާސާ ކޮށްފައިވަނީ މަޖިލީހުގެ އާންމު ކޮމިޓީންނެވެ. މި އައު އިސްލާހާއެކު މަޖިލީހުގެ ދެވަނަ ދައުރު ހިނގާނީ މޭ މަހުގެ ސޯޅަ ވަނަ ދުވަހުން ފެށިގެން ޖޫން މަހުގެ ނިޔަލަށެވެ. އަދި މަޖިލީހުގެ ތިންވަނަ ދައުރު ހިނގާނީ އޮގަސްޓު މަހުގެ ސޯޅަ ވަނަ ދުވަހުން ފެށިގެން ނޮވެންބަރު މަހުގެ ނިޔަލަށެވެ.

ދިރާސީ އައު އަހަރުގެ ކިޔެވުން ފެށުން ކޮންމެ އަހަރެއްގެ އޮގަސްޓު މަހަށް ބަދަލުކުރުމުން، ދިރާސީ އަހަރުގެ ކިޔެވުން ނިމިގެން ދަރިވަރުންނަށް ޗުއްޓީ ލިބެނީ އަހަރުގެ ޖުލައި އަދި އޮގަސްޓު މަހުއެވެ. މަޖިލީހުގެ ގަވާއިދު މިހާރު އޮތްގޮތުން ދިރާސީ އަހަރުގެ ޗުއްޓީއާއި މަޖިލީހުގެ ޗުއްޓީ ދިމާނުވާކަމަށް ކޮމިޓީއަށް ފާހަގަކުރެވިފައިވާކަމަށް ކޮމިޓީ ރިޕޯޓުގައި ބުނެއެވެ. އަދި މަޖިލީހުގެ ޗުއްޓީ ދުވަސްތައް ކަނޑައެޅުމުގައި ދިރާސީ އަހަރުގެ ކަލަންޑަރަށް ރިޢާޔަތްކުރަމުން އަންނާތީ މި އިސްލާހު ގެނައުމުގައި އެ ކަލަންޑަރަށްވެސް ކޮމިޓީން ވަނީ ރިއާޔަތްކޮށްފައެވެ.

ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގެ (ހ) ގެ (2) ވަނަ ނަންބަރު މިހާރު އޮތްގޮތުން ދިރާސީ އަހަރުގެ ކިޔެވުން ނިމިގެން ދަރިވަރުންނަށް ލިބޭ ޗުއްޓީ ދިމާވަނީ މަޖިލީހުގެ ދެވަނަ ދައުރުގެ މެދުތެރެއަށެވެ. މިކަމުގެ ސަބަބުން މެންބަރުންނަށް ދަތިތަކެއް ދިމާވުމަކީ އެކަށީގެންވާ ކަމެއްކަމުގައި ކޮމިޓީން ފާހަގަކޮށްފައިވެއެވެ. އެހެންކަމުން، ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގެ (ހ) ގެ (2) ވަނަ ނަންބަރުގައިވާ މަޖިލީހުގެ ދެވަނަ ދައުރުގެ ހިނގުން މޭ މަހުގެ ސޯޅަ ވަނަ ދުވަހުން ފެށިގެން ޖޫން މަހުގެ ނިޔަލަށް ބަދަލުކޮށް އެ ގަވާއިދު ގެ 24 ވަނަ މާއްދާގެ (ހ) ގެ (3) ވަނަ ނަންބަރުގައިވާ މަޖިލީހުގެ ތިންވަނަ ދައުރު އޮގަސްޓުމަހުގެ ސޯޅަ ވަނަ ދުވަހުން ފެށިގެން ނޮވެންބަރު މަހުގެ ނިޔަލަށް ހިނގާނެ ގޮތަށް ވަނީ ބަދަލު ކޮށްފައެވެ.

މިގޮތަށް މި މާއްދާ އިސްލާހު ކުރުމުން މަޖިލީހުގެ ދެވަނަ ދައުރުގައި މަސައްކަތްކުރާ ދުވަސްތައް މަދުވި ނަމަވެސް ތިން ވަނަ ދައުރުގައި މަސައްކަތްކުރާ ދުވަސްތައް އިތުރުވެގެން ދާނެއެވެ. މިގޮތަށް ބަދަލު ގެނައުމުން ޖުމްލަކޮށް މުޅި އަހަރު މަސައްކަތްކުރާ ދުވަސްތަކުގެ އަދަދަކަށް އެއްވެސް ބަދަލެއް ނާންނާނެއެވެ.