އެމެރިކާއިން އިންޑިއާއަށް ފޮނުވާ އެހީގެ ފުރަތަމަ ޝިޕްމެންޓް ބުރާސްފަތިދުވަހު އެ ގައުމަށް ލިބޭނެ ކަމަށް ވައިޓްހައުސްއިން ބުނެފިއެވެ.
އިންޑިއާއަށް އައިސްފައިވާ ކޮވިޑްގެ "ތޫފާނުން" އަރައިގަތުމަށް ގައުމުތަކުން އަންނަނީ އެހީތެރިކަން ފޯރުކޮށްދެމުންނެވެ. ވައިޓްހައުސްއިން ބުނީ 100 މިލިއަން ޑޮލަރުގެ އަގުހުރި ސާމާނު އިންޑިއާއަށް ފޮނުވަން ނިންމާފައިވާ ކަމަށެވެ. އެމެރިކާއިން އިންޑިއާއަށް ފޮނުވަން ހަމަޖެހިފައިވާ ތަކެތީގެ ތެރޭގައި، 1000 އޮކްސިޖަން ސިލިންޑަރާއި، 15 މިލިއަން "އެން95" މާސްކާއި، އެއް މިލިއަން ޓެސްޓް ކިޓް ހިމެނެއެވެ.
އެމެރިކާއަށް މިހާރު އޯޑަރު ކޮށްފައިވާ އެސްޓްރަޒެނެކާ ވެކްސިންގެ 20 މިލިއަން ޑޯޒްވެސް އިންޑިއާއަށް ފޮނުވަން ނިންމާފައިވާކަމަށްވެސް ވައިޓްހައުސްއިން ބުނެއެވެ.
"އެމެރިކާގެ ހޮސްޕިޓަލްތައް ފުރި ބަލި މީހުންނަށް ފަރުވާ ދިނުމުގައި ދަތިތަކާ ކުރިމަތިވި ވަގުތު އިންޑިއާއިންވަނީ އެހީތެރިކަން ފޯރުކޮށްދީފައި، މިއީ އެމެރިކާއިން އިންޑިއާއަށް އެހީވާންވީ ވަގުތު" ވައިޓްހައުސްއިން ބުނެއެވެ.
އިންޑިއާއަށް އެގައުމު އާއްމުހާލަތަށް ރުޖޫއަވުމާހަމައަށް އެހީތެރިކަން ފޯރުކޮށްދޭނެ ކަަމަށް އެމެރިކާގެ ރައީސް ޖޯ ބައިޑަން އިއުލާން ކުރެއްވީ މިދިޔަ ހަފްތާގައެވެ.
