ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ އެންމެ ފަހު ޖަލްސާ ބުރާސްފަތި ދުވަހުގެ ހެނދުނު 10:30ގައި ބޭއްވުމަށް އެޖެންޑާކޮށްފިއެވެ.

އާންމު ގޮތެއްގައި ޖަލްސާތައް އޮންނަނީ ކޮންމެ ހަފުތާއެއްގެ ހޯމަ އިން ބުދައަށެވެ. ނަމަވެސް މިމަސް ނިންމުމަށްފަހު މަޖިލީހުގެ މިދައުރު ނިމިގެންދާނެތީ ކޮމިޓީތަކުން ނިންމާފައި ހުރި މަސައްކަތްތައް ތަޅުމުން ފާސްކޮށް ގޮތެއް ނިންމުމަށް ބުރާސްފަތި ދުވަހު ޖަލްސާއެއް ބޭއްވުމަށް ވަނީ އެޖެންޑާކޮށްފައެވެ. ބުދަ ދުވަހުގެ ޖަލްސާ ނިންމަވާލައްވަމުން ރިޔާސަތުގައި އިންނެވި ވިލުފުށި ދާއިރާގެ މެމްބަރު ހަސަން އަފީފު ވަނީ މިދައުރުގެ ފަހު ޖަލްސާ ބުރާސްފަތި ދުވަހު އޮންނާނެ ކަމަށް ވިދާޅުވެފައެވެ.

ބުރާސްފަތި ދުވަހުގެ ޖަލްސާގެ އެޖެންޑާގައި ވަނީ ކޮމިޓީތަކުން ހުށަހަޅާފައިވާ 10 ރިޕޯޓެކެވެ.

އޭގެތެރޭގައި ހިމެނެނީ އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލް ގައުމީ ތަރައްގީ އާއި ތަރިކައިގެ ކޮމިޓީން ދިރާސާކޮށް ނިންމި ގޮތުގެ ރިޕޯޓާއި މާލޭގެ ޒުވާނުންނަށް ފަސޭހަކަމާއެކު މިޔުޒިކް އަޑުއަހާލާއި އެކުވެރިންނާ ބައްދަލުކޮށް އެއްވެ ތިބެވޭނެ ފަދަ މަރުކަޒެއް ގާއިމުކޮށްދިނުމަށް ސަރުކާރަށް ގޮވާލައި ހުށަހަޅާފައިވާ ގަރާރު އިޖުތިމާއީ ކޮމީޓިން ދިރާސާކޮށް ނިންމި ގޮތުގެ ރިޕޯޓެވެ.

އަދި ނޭޝަނަލް ޑްރަގް އެޖެންސީގެ ގާނޫނީ ޒިންމާ އަދާކުރަމުން ނުދާކަމަށް ބަޔާންކޮށް ހުށަހަޅާފައިވާ މައްސަލަ ހިޔުމަން ރައިޓްސް އެންޑް ޖެންޑަރ ކޮމިޓީން ދިރާސާކޮށް ނިންމި ގޮތުގެ ރިޕޯޓާއި އާންމު ސިއްހަތު ރައްކާތެރިކުރުމުގެ ގާނޫނަށް އިސްލާހު ގެނައުމުގެ ބިލް ޖުޑީޝަރީ ކޮމިޓީން ދިރާސާކޮށް ނިންމި ގޮތުގެ ރިޕޯޓެވެ.

މީގެއިތުރުން ރައްޔިތުންގެ މަޖިލީހުގެ ގަވާއިދު އިސްލާހުކޮށް އާންމު ކޮމިޓީން ދިރާސާކޮށް ނިންމި ގޮތުގެ ރިޕޯޓާއި މޯލްޑިވްސް ބްރޯޑްކާސްޓިން ކޮމިޝަނުގެ ހުސްވެފައިވާ މަގާމަށް މެމްބަރަކު އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓްވެސް ވަނީ އެޖެންޑާކޮށްފައެވެ.

ސިވިލް ސަރވިސް ގާނޫނަށް އިސްލާހު ގެނައުމުގެ ބިލް މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓާއި މޫސުމަށް އަންނަ ބަދަލުތަކާއި ބެހޭ ބިލް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީން ދިރާސާކޮށް ނިންމި ގޮތުގެ ރިޕޯޓްވެސް ވަނީ އެޖެންޑާކޮށްފައެވެ.

ކޮވިޑާއި ގުޅިގެން ކުދި އަދި މެދު ފަންތީގެ ވިޔަފާރިތަކަށް ދޫކޮށްފައިވާ މޮރަޓޯރިއަމްގެ މުއްދަތު ހަމަވެ، މިހާރު އެ ކުންފުނިތަކުން ލޯނުތައް އަނބުރާ ދައްކަންޖެހިފައިވާތީ، ވިޔަފާރިތަކަށް ކުރިމަތިވެދާނެ ދަތިތަކުން އަރައިގަތުމަށް އެހީވެވޭނެ ގޮތްތަކެއް ބެލުމަށް ހުށަހަޅާފައިވާ މައްސަލަ ސްޓޭޓް އޯންޑް އެންޓަރޕްރައިޒަސް ކޮމިޓީން ދިރާސާ ކޮށް ނިންމިގޮތުގެ ރިޕޯޓްގެ އިތުރުން އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ގާނޫނު ފާސްވުމާއެކު ކައުންސިލްތަކުގެ މެމްބަރުންގެ މުސާރައާއި އިނާޔާތްތައް މުރާޖައާކޮށް އެމައްސަލަ މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓްވެސް ވަނީ އެޖެންޑާކޮށްފައެވެ.

މިރިޕޯޓްތައް ހުށަހަޅައި ރިޕޯޓްތަކަށް ބަހުސްކުރާނެއެވެ. އަދި އެއަށްފަހު ރިޕޯޓްތައް ފާސްކުރުމަށް ވޯޓަށް އަހާނެއެވެ.

ޖުމްލަ 37 ޖަލްސާ ފުރަތަމަ ދައުރުގައި ބޭއްވުމަށްފަހު މަޖިލިސް އެއް މަސް ދުވަހުގެ ޗުއްޓީއަކަށް ދާނެއެވެ. ދެވަނަ ދައުރުގެ ޖަލްސާތައް ފަށާނީ ޖޫން މަހުއެވެ. އަދި އޮގަސްޓްމަހުގެ ނިޔަލަށް ދެ ވަނަ ދައުރު ކުރިޔައަށްދާނެއެވެ.