އުޅަނދު ރަޖިސްޓްރީ ކުރާއިރު ގަރާޖު ސިޓީ ހުށައެޅުން ލާޒިމު ނުވާ ބިލު އަނބުރާ ކޮމިޓީއަށް
މާލޭގައި އެއްގަމު އުޅަނދުފަހަރު ޕާކުކުރުމުގައި ހުރި ދަތިތަކަށް ދާއިމީ ހައްލެއް ހޯދުމަށް ކޮމިޓީން ރިއާޔަތް ކޮށްފައިވޭ
މާލޭގެ މަގުމަތީގައި ކާރެއް ދަތުރު ކުރަނީ
އިންޖީނުލީ އެއްގަމު އުޅަނދު ރަޖިސްޓްރީ ކުރަން ހުށައަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށައެޅުން ލާޒިމު ނުވާ ގޮތަށް އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލު އަނބުރާ ކޮމިޓީއަށް ފޮނުވާލައިފިއެވެ.
ގައުމީ ތަރައްގީއާއި ތަރިކައިގެ ކޮމިޓީއަށް މި ބިލު ފޮނުވާލުމަށް ބުދަ ދުވަހު ނެގުނު ވޯޓުގައި 70 މެންބަރުން ބައިވެރިވެ 68 މެންބަރުން ވޯޓު ދެއްވާފައިވެއެވެ. އެއް މެންބަރަކު ބިލު އަނބުރާ ފޮނުވާލަން ބޭނުން ނުވާކަމަށް ވޯޓު ދެއްވިއިރު އެއް މެންބަރަކު ވަކި ގޮތަކަށް ވޯޓު ދޭން ބޭނުން ނުވިއެވެ.
އެއްގަމު ދަތުރުފަތުރުގެ ގާނޫނަށް މި އިސްލާހު ހުށައެޅުއްވީ ނޮޅިވަރަމް ދާއިރާގެ މެންބަރު މުހައްމަދު ނަޝީދެވެ. އިސްލާހު ހުށައަޅުއްވަމުން މެންބަރު ނަޝީދު ވިދާޅުވެފައިވަނީ މި ބިލަކީ އެއްގަމު ދަތުރުފަތުރުގެ ގާނޫނުގެ ދަށުން ހަދާފައިވާ ގަވާއިދުގައި އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓަރީކުރާއިރު ދެ ފުރޮޅަށްވުރެ ގިނަ ފުރޮޅުލީ އުޅަނދު ގަރާޖެއްގައި ރަޖިސްޓްރީ ކުރާ ގޮތަށް މިހާރު އޮންނާތީ އެކަމުގެ ނާޖާއިޒް ފައިދާ ބަޔަކު ނަގަމުންދާތީ ހުށަހަޅާ ބިލެއް ކަމަަށެވެ.
ގަރާޖު ފީގެ ގޮތުގައި ނުވަތަ ގަރާޖު ކުލީގެ ގޮތުގައި ބޮޑު އަދަދެއް ބައެއް ގަރާޖުތަކުގެ ވެރިން ނަގަމުން ގެންދާ ކަމަށާއި ގަރާޖުގައި އޮންނަ ޖާގައަށްވުރެ ގިނަ އުޅަނދު ފަހަރު ގަރާޖުގައި ރަޖިސްޓްރީ ކޮށްދީ ފައިދާ ނަގަމުން ގެންދާކަން ފާހަގަވެފައިވާ ކަމަށް ވެސް މެންބަރު ވަނީ ވިދާޅުވެފައެވެ. މެންބަރު ނަޝީދު ވިދާޅުވީ މި ބިލު ހުށައެޅުއްވީ މިކަންކަން ރަނގަޅަށް މޮނިޓަރކުރެވޭތަން ނުފެންނާތީ އެކަމަށް ހުއްޓުމެއް ގެނައުމަށް ކަމަށެވެ.
މި އިސްލާހު ގައުމީ ތަރައްގީއާއި ތަރިކައިގެ ކޮމިޓީން ދިރާސާކޮށް ނިންމި ގޮތުގެ ރިޕޯޓު އިއްވާފައިވަނީ ކޮމިޓީގެ މުގައްރިރު ބާރަށު ދާއިރާގެ މެންބަރު އަހުމަދު އަބްދުﷲ އެވެ. މެންބަރު ވިދާޅުވީ ބިލު ދިރާސާ ކުރުމުގައި އެކި މުއައްސަސާތަކާއި މިނިސްޓްރީތަކާއި މަޝްވަރާ ކުރައްވާފައިވާ ކަމަށެވެ.
މި ބިލު ދިރާސާ ކުރުމުގައި ކޮމިޓީން ވަނީ އުޅަނދުތައް ރަޖިސްޓްރީކުރުމުގައި އިޖުރާއަތުތައް ފަސޭހަކަމާއިއެކު ޚަރަދު ކުޑަކަމާއެކު ފުރިހަމަ ކުރެވޭނެ ގޮތަކަށް ބިލު ފަރުމާކުރުމުގެ ކަންކަމަށް ރިއާޔަތް ކޮށްފައެވެ. އަދި މާލޭގައި އެއްގަމު އުޅަނދުފަހަރު ޕާކުކުރުމުގައި ހުރި ދަތިތަކަށް ދާއިމީ ހައްލެއް ހޯދުމަށް ވެސް ރިއާޔަތް ކޮށްފައިވެއެވެ.
