ރާއްޖޭގެ މިނިވަން މުއައްސަސާތަކުން އެ އިރެއްގައި އޮންނަ ސަރުކާރެއް ރުއްސަން މަސައްކަތްކުރާކަން ފާހަގަވެފައިވާކަމަށާއި މި ސަރުކާރުގައި އެ މަންޒަރު ނުފެންނަކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރ މުހައްމަދު އަބްދުﷲ ޝަފީގު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައިވެސް އިންނަވާ ޝަފީގް ވިދާޅުވީ، ރާއްޖޭގެ މިނިވަން މުއައްސަސާތަކުގެ އެންމެ ބޮޑު އެއް މައްސަލައަކީ ސަރުކާރު ރުއްސަން މަސައްކަތްކުރުން ކަމަށެވެ. ކޮމިޓީގައި ކަންކަން ބަލާއިރު އެކަން ފާހަގަވެފައިވާ ކަމަށާއި، އެކަން އެހެން ވަނީ އެ އިރެއްގައި އޮންނަ ސަރުކާރެއްގެ ސަބަބުން ކަމަށެވެ.

އޭނާ ވިދާޅުވީ އަބަދުވެސް ސަރުކާރުތަކުގެ ޕްރެޝަރ މުއައްސަސާތަކަށް އޮންނަކަމަށާއި، އެކަމުގެ ސަބަބުން ރުއްސަން މަސައްކަތްކުރަނީ ކަމަށެވެ. އެކަމަކު މި ސަރުކާރު އައި ފަހުން އެކަން ނުފެންނަ ކަމަށާއި، މި ސަރުކާރުން އެފަދަ އެއްވެސް ޕްރެޝަރ އެއް ނުކުރާކަމަށް ވިދާޅުވިއެވެ.

ރާއްޖޭގެ ނޫސްވެރިކަމާ ގުޅޭގޮތުން ވާހަކަދައްކަވަމުން ޝަފީގް ވިދާޅުވީ އެންމެ ފުރަތަމަ ޑިމޮކްރަސީގެ ވާހަކަ ފެށިގެން އައިއިރާއި އަދި އޭގެ ފަހުން ފާއިތުވެގެން ދިޔަ 10 ވަރަކަށް އަހަރުގެ މާޒީގައިވެސް ނޫސްވެރިކަމަކީ އެހާ ފަސޭހަކަމެއް ނޫން ކަމަށެވެ. ވަރަށް ބޮޑެތި ދަތިތަކާ އުނދަގޫތައް ނޫސްވެރިންނަށް ހުރިކަން ފާހަގަކުރައްވާ ވިދާޅުވީ މިހާރު ރާއްޖެ މި ދެކޭ ނޫސްވެރިކަމަކީ ދުވަހަކުވެސް ރާއްޖޭގައި ނުލިބޭ މިނިވަންކަމެއްގައި ކުރަމުން އަންނަ ނޫސްވެރިކަމެއް ކަމަށެވެ.

މިއަދު އެންމެނަކީވެސް ނޫސްވެރިން ކަމަށާއި، ސޯޝަލް މީޑިއާގައި ޖަހާލާ އެއްޗެއްވެސް ހަބަރަކަށް ވެދާކަން ފާހަގަކުރައްވާ ވިދާޅުވީ އެ މިނިވަންކަމުގެ ބޭނުންވެސް ހެޔޮގޮތުގައި ހިފަންވާނެ ކަމަށެވެ. އޭނާ ވިދާޅުވީ ރާއްޖޭގައި ނޫސްވެރިކަން ރެގިއުލޭޓްކުރަން ތިިބި އޮތޯރިޓީތަކުގައި މައްސަލަ އެބަހުރިކަން ގަބޫލުކުރައްވާ ކަމަށެވެ. އެއީ މިނިވަން ދެ މުއައްސަސާއަށްވާއިރު، ނޫސްވެރިންގެ ކަންކަން އެ މުއައްސަސާއެއްގެ ދަށަށް ގެނައުން އެއީ ރަނގަޅު ގޮތް ކަމުގައި ގަބޫލުކުރައްވާ ކަމަށާއި، އެކަމުގެ މަޝްވަރާތައް މިހާރު ކުރިއަށް ދިއުމަކީ ހެޔޮ ފާލެއް ކަމުގައި ދެކޭ ކަމަށްވެސް ވިދާޅުވިއެވެ.