ލެސްޓާއިން ތިންވަނައިގައި ލީޑު ދަމަހައްޓައިފި

އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ފަހަތުން އަރައި ކްރިސްޓަލް ޕެލަސް ބަލިކޮށް ތާވަލުގެ ތިންވަނައިގައި ލެސްޓާ ސިޓީން ލީޑު ދަމަހައްޓައިފިއެވެ.

އަމިއްލަ ދަނޑުގައި ކުޅުނު މެޗުން ލެސްޓާ މޮޅުވީ 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ޕެލަސްއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން 12 ވަނަ މިނެޓުގައި އެބްރެޗީ އެޒޭ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ވިލްފްރިއެޑް ޒަހާއެވެ. އޭގެ ފަހުން މެޗުގެ ފުރަތަމަ ހާފުގައި ލެސްޓާއިން ގިނަ ހަމަލާތަކެއް އުފެއްދި ނަމަވެސް، މި ހާފުގައި އެ ޓީމުގެ މަސައްކަތް ކާމިޔާބުވެފައެއް ނުވެއެވެ.

ނަމަވެސް ދެވަނަ ހާފު ފަށައިގެން ފަސްވަނަ މިނެޓުގައި ލެސްޓާއިން ވަނީ ލީޑު ނަގާފައެވެ. ކެލެޗީ އިހެނާޗޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޓިމޮތީ ކަސްޓާނިއާއެވެ. އަދި މެޗު ނިމެން 10 މިނެޓަށް ވެފައި ވަނިކޮށް އިހެނާޗޯ ވަނީ ލަނޑެއް ޖަހައި، ލެސްޓާ ކޮޅަށް ނަތީޖާ އަނބުރާލާފައެވެ.

މި މޮޅާއެކު ތާވަލުގެ ތިންވަނައިގައި ލެސްޓާއިން ހަތަރު ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 33 މެޗުން 62 ޕޮއިންޓް ލިބިފައެވެ. ހަތަރުވަނައިގައި އޮތް ޗެލްސީއަށް 33 މެޗުން 58 ޕޮއިންޓް ލިބިފައިވާއިރު، ފަސްވަނައިގައި އޮތް ވެސްޓް ހޭމް ޔުނައިޓެޑަށް 33 މެޗުން ލިބިފައިވަނީ 55 ޕޮއިންޓެވެ. އަދި ގަދަ ހަތަރަކަށް ވާދަކުރާ އެންމެ ފަހުގެ ޗެމްޕިއަން ލިވަޕޫލް އޮތީ ތާވަލުގެ ހަވަނައިގައި 33 މެޗުން 54 ޕޮއިންޓާއެކުއެވެ.