މަޖިލީހުގެ ދައުރުތައް ދިރާސީ އަހަރުގެ ކަލަންޑަރާއި އެއްގޮތަށް އިސްލާހުކުރުމަށް ކޮމިޓީން ފާސްކޮށްފި
25 އެޕްރީލު 2021 | އާދީއްތަ 13:27މިހާރު އޮތްގޮތުން ދިރާސީ އަހަރުގެ ކިޔެވުން ނިމިގެން ދަރިވަރުންނަށް ލިބޭ ޗުއްޓީ ދިމާވަނީ މަޖިލީހުގެ ދެވަނަ ދައުރުގެ މެދުތެރެއާ
ރައްޔިތުންގެ މަޖިލިސް
މަޖިލީހުގެ ދައުރުތައް ދިރާސީ އަހަރުގެ ކަލަންޑަރާއި އެއްގޮތަށް އިސްލާހުކުރުމަށް ރައްޔިތުންގެ މަޖިލީހުގެ އާންމު ކޮމިޓީން ފާސްކޮށްފިއެވެ.
އާންމު ކޮމިޓީން ވަނީ މަޖިލީހުގެ ދައުރުތައް ދިރާސީ އަހަރުގެ ކަލަންޑަރާއި އެއްގޮތައް އިސްލާހުކޮށް މިކަމުގެ ރިޕޯޓް އާންމުކޮށްފައެވެ. އައު އިސްލާހުގައިވާގޮތުން މަޖިލީހުގެ ދެވަނަ ދައުރު ހިނގާނީ މޭ މަހުގެ ސޯޅަ ވަނަ ދުވަހުން ފެށިގެން ޖޫން މަހުގެ ނިޔަލަށެވެ. އަދި މަޖިލީހުގެ ތިންވަނަ ދައުރު ހިނގާނީ އޮގަސްޓު މަހުގެ ސޯޅަ ވަނަ ދުވަހުން ފެށިގެން ނޮވެންބަރު މަހުގެ ނިޔަލަށެވެ. ރައްޔިތުންގެ މަޖިލީހުގެ ދައުރުތައް މިހާރު ބެހިފައިވާގޮތާއި ދިރާސީ އަހަރުގެ ކަލަންޑަރާއި ވީހާވެސް އެއްގޮތްކުރުމަށް ރައްޔިތުންގެ މަޖިލީހުގެ މެންބަރުން އެދިވަޑައިގަންނަވާތީ، ރައްޔިތުންގެ މަޖިލީހުގެ ގަވާއިދު އިސްލާހުކޮށްދިނުމަށް އެދި 25 އެޕްރީލް 2021ގައި ބޭއްވި މި ކޮމިޓީގެ 14 ވަނަ ބައްދަލުވުމުގައި ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ހުށަހެޅުއްވި މައްސަލަ ކޮމިޓީން ދިރާސާކޮށް ނިންމިގޮތުގެ ރިޕޯޓްގައި ވަނީ މި އިސްލާހުގެނައުމަށް ނިންމީ ކޮމިޓީގެ އިއްތިފާގުން ކަމުގައެވެ.
ދިރާސީ އައު އަހަރުގެ ކިޔެވުން ފެށުން ކޮންމެ އަހަރެއްގެ އޮގަސްޓު މަހަށް ބަދަލުކުރުމުން، ދިރާސީ އަހަރުގެ ކިޔެވުން ނިމިގެން ދަރިވަރުންނަށް ޗުއްޓީ ލިބެނީ އަހަރުގެ ޖުލައި އަދި އޮގަސްޓު މަހުއެވެ. މަޖިލީހުގެ ގަވާއިދު މިހާރު އޮތްގޮތުން ދިރާސީ އަހަރުގެ ޗުއްޓީއާއި މަޖިލީހުގެ ޗުއްޓީ ދިމާނުވާކަމަށް ކޮމިޓީއަށް ފާހަގަކުރެވިފައިވާކަމަށް ވަނީ ބުނެފައެވެ. މަޖިލީހުގެ ޗުއްޓީ ދުވަސްތައް ކަނޑައެޅުމުގައި ދިރާސީ އަހަރުގެ ކަލަންޑަރަށް ރިޢާޔަތްކުރަމުން އަންނާތީ މި އިސްލާހު ގެނައުމުގައި އެ ކަލަންޑަރަށްވެސް ކޮމިޓީން ވަނީ ރިއާޔަތްކޮށްފައެވެ.
ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގެ (ހ) ގެ (2) ވަނަ ނަންބަރު މިހާރު އޮތްގޮތުން ދިރާސީ އަހަރުގެ ކިޔެވުން ނިމިގެން ދަރިވަރުންނަށް ލިބޭ ޗުއްޓީ ދިމާވަނީ މަޖިލީހުގެ ދެވަނަ ދައުރުގެ މެދުތެރެއަށެވެ. މިކަމުގެ ސަބަބުން މެންބަރުންނަށް ދަތިތަކެއް ދިމާވުމަކީ އެކަށީގެންވާ ކަމެއްކަމުގައި ކޮމިޓީއަށް ފާހަގަކުރެވުނެވެ. އެހެންކަމުން، ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގެ (ހ) ގެ (2) ވަނަ ނަންބަރުގައިވާ މަޖިލީހުގެ ދެވަނަ ދައުރުގެ ހިނގުން މޭ މަހުގެ ސޯޅަ ވަނަ ދުވަހުން ފެށިގެން ޖޫން މަހުގެ ނިޔަލަށް ބަދަލުކޮށް އެ ގަވާއިދު ގެ 24 ވަނަ މާއްދާގެ (ހ) ގެ (3) ވަނަ ނަންބަރުގައިވާ މަޖިލީހުގެ ތިންވަނަ ދައުރު އޮގަސްޓުމަހުގެ ސޯޅަ ވަނަ ދުވަހުން ފެށިގެން ނޮވެންބަރު މަހުގެ ނިޔަލަށް ހިނގާނެ ގޮތަށް ބަދަލުކުރުމަށް ކޮމިޓީން ވަނީ ނިންމާފައެވެ.
ކޮމިޓީ ރިޕޯޓްގައި ވަނީ މިގޮތަށް މި މާއްދާ އިސްލާހު ކުރުމުން މަޖިލީހުގެ ދެވަނަ ދައުރުގައި މަސައްކަތްކުރާ ދުވަސްތައް މަދުވި ނަމަވެސް ތިން ވަނަ ދައުރުގައި މަސައްކަތްކުރާ ދުވަސްތައް އިތުރުވެގެންދާނެކަން ފާހަގަކޮށްފައެވެ. މިގޮތަށް ބަދަލު ގެނައުމުން ޖުމްލަކޮށް މުޅި އަހަރު މަސައްކަތްކުރާ ދުވަސްތަކުގެ ޢަދަދަކަށް އެއްވެސް ބަދަލެއް ނާންނާނެކަމަށް ކޮމިޓީ ރިޕޯޓްގައި ވަނީ ފާހަގަކޮށްފައެވެ.
