ހައްގު ހޯދުމުގެ ނަމުގައި އަމިއްލަ އެދުން!
25 އެޕްރީލު 2021 | އާދީއްތަ 10:19ބޭވަފާތެރިއެއް ކަމަށް ބުނެ ޕީޕީއެމުން ނާއިބުރައީސް ކަމުގެ ގޮނޑިވެސް ޖަހައިގަތް
ޑރ. ޖަމީލް - ހައްގު ހޯދުމުގެ ނަމުގައި ދެއިރު ދެލަވަ ކިޔުމަކީ އެހާ "ކޫލް" ކަމެއް ނޫން
ހައްގު ހޯދުމަށް މަސައްކަތް ކުރުމަކީ މައްސަލައެއް ނޫނެވެ. އެހެންނަމަވެސް ހައްގު ހޯދުމުގެ ނަމުގައި ދެއިރު ދެލަވަ ކިޔުމަކީ އެހާ "ކޫލް" ކަމެއްވެސް ނޫނެވެ. މިހެން މިކަންވާ ހިސާބުން ދެން ބަލައިގަނެވޭނީ އެއީ ހައްގު ހޯދުމަށްވުރެ ބޮޑަށް އަމިއްލަ އެދުމެއް ހާސިލްކުރުމަށް މަސައްކަތްކުރާ މީހެއްގެ ގޮތުގައެވެ.
ދައްކަން މިއުޅެނީ ކުރީގެ ނާއިބުރައީސް ޑރ. މުހައްމަދު ޖަމީލު އަހުމަދުގެ ވާހަކައެވެ. އެމަނިކުފާނަކީ މިހާރު ޕީޕީއެމްގެ އެޑްވައިޒަރު ވެސް މެއެވެ. ރައީސް ޔާމީނުގެ ވެރިކަމުގައި އެމަނިކުފާނު ނާއިބުރައީސްކަމުން ވަކި ކުރުމުން އެކަމުގެ ބަދަލު ހޯދުމަށް ސުޕްރީމް ކޯޓަށް މައްސަލަ ހުށަހަޅުއްވައި އަދި މައްސަލައާއިގެން ކުރިއަށް ވަޑައިގެންނެވި ހިސާބުން ފެށިގެން އެކަމަށް އެންމެ ބޮޑަށް ފާޑުކިޔާފައިވަނީ ވެސް ޕީޕީއެމުންނެވެ. އެހެންނަމަވެސް މިހާރު އެންމެ ގާތް މިތުރުންނަކީ އެއީއެވެ.
ރައީސް ޔާމީނުގެ ވެރިކަމުގައި ހިނގައި ދިޔަ އެތައްކަމަކީ އެތައް ގޮތަކުން މިއަދު އެކަންކަމުގެ މައްޗަށް ނަޒަރު ހިންގާލެވިދާނެ ކަންކަމެވެ. ޔާމީނުގެ ވެރިކަމުގައި މަޖިލީހުގެ މެންބަރުކަމުން ވަކިވިކަމަށް ކަނޑައެޅި 12 މެމްބަރުންނާމެދު ކަންކަން ހިގައިދިޔަ ގޮތާއި އަދި ނާއިބުރައީސްކަމުން ޑރ ޖަމީލު ދުރުކުރިގޮތް، މިހެން ކިޔަން ފަށައިފިނަމަ ކޮޅުންނުލާވަރަށް ކަންކަން އެބައޮތެވެ. މިހުރިހާ ކަންކަމަށް އިންސާފު ހޯދަން ތެދުވެއްޖެނަމަ ކަރުގައި ހިފާފައި ނުހިފާނެ މީހަކު ނޭނގޭނެއެވެ.
ސިޔާސީ ކަންކަމުގެ ތެރެއިން މިތުރުން ހަތުރުންނަށް ވުމާއި ހަތުރުން މިތުރުންނަށް ވުމަކީ އަބަދުވެސް ހިނގަމުންދާ ކަންކަމެވެ. އެބީދައިން އޭރު ޑރ ޖަމީލުވީ ރައީސް ޔާމީނާއި ޕީޕީއެމްގެ ހަތުރަކަށެވެ. އެހެންނަމަވެސް މިއަދު ޑރ ޖަމީލު ވަރުގެ މިތުރެއް ނެތެވެ.
ޑރ ޖަމީލަކީ ބޭފަވާތެރިއެއް ކަމަށް ބުނެ އޭރު މަޖިލިސް ކޮންޓްރޯލް ކުރަމުން ދިޔަ ޕީޕީއެމުން އެމަނިކުފާނުގެ ނާއިބުރައީސް ކަމުގެ ގޮނޑި ޖަހައިގަތީއެވެ. ޑރ ޖަމީލް މަގާމުން ދުރުކުރުމަށް އެދިވަޑައިގެން ޚުދު ރައީސް ޔާމީނު ވެސް ވަނީ ފުލުހުންގެ ފަރާތުން ލިބުނު މައުލޫމާތުތައް، އޭރުގެ ޕީޕީއެމްގެ ޕީޖީ ގުރޫޕްގެ މެމްބަރުންނާ ހިއްސާ ކުރައްވާފައެވެ. ދެން ޑރ ޖަމީލު ފެއްޓެވީ އެމަނިކުފާނުގެ ހައްގު ހޯދުމުގެ މަސައްކަތެވެ.
ކޮރަޕްޝަނާއި ވައްކަމާއި ފަސާދައިގެ ތުހުމަތު ޔާމީނުގެ ސަރުކާރަށް އެންމެ ހަރު އަޑުން އަމާޒުކުރައްވަމުން ގެންދެވީވެސް ޑރ ޖަމީލެވެ.
އެކަމަކު އޭރު އިތުބާރު ނެތް ނާއިބުރައީސަކީ މިހާރު ޖަލުގައި ހުންނެވި ޔާމީނުގެ އިތުބާރު ލިބިފައިވާ ގާތް މިތުރެކެވެ. ޑރ ޖަމީލަކީ ޔާމީނުގެ ދިފާއީ ވަކީލުންގެ ޓީމުގެ އިސް މެންބަރެވެ.
މިކަން ދެކޮޅު ޖެހޭގޮތެއް ނުވިސްނުނެވެ. އޭރު އިތުބާރު ނެތިފައި މިހާރު އިތުބާރު ލިބުނީތޯއެވެ. ހަމަ މި ނޭވާގައި ފާހަގަ ކޮށްލަން ބޭނުމެވެ. ގާނޫނީ ވަކީލުކަން މިއަދު ކުރައްވަމުން ގެންދެވިނަމަވެސް މިއަދާހަމައަށްވެސް ކުރިން ލިބިފައިހުރި އަނިޔާތަކަށް ހިތް ޚަލާސްކަމެއް ނެތެވެ.
ފާއިތުވެދިޔަ ކުރު މާޒީއަށް ނަޒަރު ހިންގާލާއިރު ރައީސް ޔާމީނު ކުރެއްވި އަނިޔާއަށް ކެތްނުކުރެވިގެން ވީޓީވީގެ ލައިވް ޕްރޮގްރާމެއްގައި ޑރ ޖަމީލް ވަނީ ކީރިތި ވެސް ކުރައްވައިފައެވެ. މިކަމާހުރެ ޕްރޮގްރާމް ކުރިއަށް ނުގެންދެވި މެދުކަނޑާލަން ޖެހުނު މަންޒަރު ވެސް ފެނުނެވެ.
އެމަންޒަރު މިހާރު މިވަނީ ބަދަލުވެފައެވެ. މިހާރު މާގިނަގިނައިން އަނިޔާގެ ވާހަކަ ދައްކަވާ އަޑެއް ނީވެއެވެ. މިހާރު އިވެނީ ރައީސް ޔާމީނަށް ނުހައްގުން އަނިޔާ ދެނީއޭ ވިދާޅުވާ އަޑެވެ. ވާނީވެސް އެހެންތާއެވެ. އޭރު އިތުބާރު ނެތްކަމަށް ނިންމައި ގޮނޑި ޖަހައިގަތް މެންބަރުން ތިބި ޕާޓީއަށް އެޑްވައިޒް ދޭން މިއަދު މިއޮތީ ޖެހިފައެވެ. އެޑްވައިޒަރުގެ ހައިސިއްޔަތުން ޕީޕީއެމްގެ އެންމެ ކުރީ ގޮނޑިބަރިން ހުރިހާ ޖަލްސާއަކުން ވެސް ޖާގަ ލިބިވަޑައިގަނެއެވެ. މީޑިއާތަކުގައި ޕީޕީއެމްގެ އޯނަރޝިޕް ނަންގަވައިގެން ވާހަކަފުޅު ދައްކަވައެވެ.
އެހެންނަމަވެސް ރައީސް ޔާމީނު މިނިވަންކުރުމަށް ގޮވާލައި ކުރިއަށްދާ މުޒާހަރާތަކަށް ނިކުމެވަޑައިގަންނަވާ ތަނެއް ނުފެނެއެވެ. މުޒާހަރާތައް ފެށިގެން އައި ދުވަސްވަރު، ކޮންމެ މުޒާހަރާއެއްވެސް ނިމުމުން ކާމިޔާބީ ފާހަގަކޮށް ސަރުކާރަށް އިންޒާރު ދިނުމަށް އެންމެ ފުރަތަމަ ޓުވީޓު ކުރައްވަނީ ޑރ ޖަމީލެވެ.
ކޮންމެއަކަސް ރައީސް ޔާމީނުގެ ވެރިކަމުގައި ނާއިބުރައީސްކަމުން ވަކިކުރި ކުރުމުގެ އިންސާފު ހޯއްދެވުމަށް ޑރ. ޖަމީލު މިއަދު ކުރައްވަމުން ގެންދަވާ މަސައްކަތްތަކަށް ޕީޕީއެމްގެ އެތެރެއިން ފާޑު ކިއުން އަމާޒުވަމުން ދަނީ ސަބަބުތަކެއް އޮވެގެން ކަމުގައި ނޫނީ ނުވާނެއެވެ.
މިއީ ވަކީލަކު އޭނާގެ ކްލައިންޓެއްގެ ވަކީލުކަން ކުރަމުން އަދި އެޑްވައިސް ކުރާ ޕާޓީ ލީޑަރޝިޕަށް އެޑްވައިސް ދެމުން އަދި އެ މީހުންނާ ދެކޮޅަށް ކޯޓަށް ދާ ދުނިޔޭގެ ފުރަތަމަ މައްސަލައަށްވުން ވެސް އެކަށީގެންވެއެވެ. ހެނދުނު ކޯޓަށް ވަޑައިގަންނަވަނީ ރައީސް ޔާމީނު މިނިވަން ކުރުމަށް ވަކާލާތު ކުރެއްވުމަށެވެ. މެންދުރު ކޯޓަށް ވަޑައިގަންނަވަނީ ރައީސް ޔާމީނާ ދެކޮޅަށް އަމިއްލަފުޅަށް ކުރައްވާ ދައުވާ ސާބިތުކޮށްދެއްވައި އަނެއްކާ ޖަލަށް ލުމަށެވެ. ހަވީރު ޕާޓީއަށް އެޑްވައިސް ދެއްވުމަށެވެ. މިކަން ދެކޮޅު ޖައްސާނެ ގޮތެއް ހަމަ ނުވިސްނުނެވެ.
މިއިން ދޭހަވާ ކަމަކީ ސިޔާސީގޮތުން ނެގެން އޮތް ފާއިދާއެއް ނަގައި، ހުރިހާ ކޮޅަކުންވެސް މޮޅު ގޮތް ހޯދަން، ދަނޑިވަޅު ބަލާފައި ބަދަލު ހިފަންޖެހޭ ވަގުތު އެމަގަށް ވެސް ހުރިހާ ދޮރެއް ހުޅުވައިގެން ހުރިކަމެވެ.
