އިރާގުގެ ވެރި ރަށް ބަޣްދާދުގައި ކޮވިޑަށް ފަރުވާދޭ ހޮސްޕިޓަލެއްގައި ރޯވެ، ގިނަ ބަޔަކު މަރުވެއްޖެއެވެ.

އަލްޖަޒީރާއިން ރިޕޯޓު ކޮށްފައިވާ ގޮތުން އިބްން ޚަތީބްގައި ހިިނގި މި ހާދިސާގެ ސަބަބުން 27 މީހަކު މަރުވެ، 46 މީހަކަށް އެކިވަރުގެ އަނިޔާ ލިބި ޒަޚަމްވެފައިވެއެވެ. އޮކްސިޖަން ޓޭންކެއް ގޮވައި ހިނގި މި އަލިފާނުގެ ހާދިސާގައި ހުޅުގަނޑު އިތުރަށް ބޮޑުވެ އަލިފާނގަޑު ފެތުރުނީ އެ ހޮސްޕިޓަލުގައި އަލިފާނުގެ ހާދިސާއަކުން ރައްކާތެރިވުމަށް ބޭނުންވާ އެއްވެސް ވަސީލަތެއް ނެތުމުން ކަމަށް އޮފިޝަލުން ހާމަ ކޮށްފައިވެއެވެ.

އިރާގުގެ ޕްރައިމް މިނިސްޓަރ މުސްތަފާ އަލް ޚަދީމީ ވިދާޅުވީ މިކަން ހިނގުމަށް މެދުވެރިވި ސަބަބު ވީ އެންމެ އަވަހަށް ހޯދަން ޖެހޭ ކަމަށެވެ. އަދި މިހާތަނަށް 120 މީހުންގެ ތެރެއިން 90 މީހަކު ސަލާމަތް ކުރެވިފައިވާ ކަމަށެވެ. ހާދިސާ ހިނގި ވަގުތު އެ ހޮސްޕިޓަލުގައި ކޮވިޑަށް އެތައް ބަޔަކު ފަރުވާ ހޯދަމުން ދިޔަކަމަށް ހޮސްޕިޓަލުން ވަނީ މައުލޫމާތު ދީފައެވެ.

އަދި އެވަގުތު 30 މީހަކު ދިޔައީ އިންޓެންސިވް ކެއަރ ޔުނިޓް (އައިސީޔޫ)ގައި ފަރުވާ ހޯދަމުންނެވެ. ހާދިސާގައި އަނިޔާ ލިބުނު މީހުންގެ އިތުރުން ހޮސްޕިޓަލްގައި އެޑްމިޓު ކޮށްފައިވާ މީހުން ވަނީ ކައިރީގައި ހުރި އެހެން ހޮސްޕިޓަލްތަކަށް ބަދަލު ކޮށްފައެވެ.

އިރާގުގައި ފާއިތުވި ފެބްރުއަރީ މަހުން ފެށިގެން ކޮވިޑް-19 ހަލުވި ކަމާއެކު ފެތުރެމުން އަންނައިރު އެ ގައުމުގެ ހޮސްޕިޓަލުތަކަށް ބާރުބޮޑުވަމުން ދާކަމަށް އެގައުމުން ދަނީ ބުނަމުންނެވެ. މިހާތަނަށް އެގައުމުން 1,025,288 މީހަކު ބައްޔަށް ޕޮޒިޓިވް ވެފައިވާއިރު މި ބަލީގައި 15,217 މީހަކު ވަނީ މަރުވެފައެވެ.