އިންޑިއާ ހޮސްޕިޓަލެއްގައި ގިނަ ކުދިންތަކެއް މަރުވި ހާދިސާއާ ގުޅިގެން ހޮސްޕިޓަލުގެ ވެރިޔާ ސަސްޕެންޑްކޮށްފި

އިންޑިއާގެ އުއްތަރަ ޕްރަދޭޝްގެ ހޮސްޕިޓަލެއްގައި ދާދި ފަހުން 60 ކުޑަކުދިން މަރުވި ހާދިސާއާ ގުޅިގެން އެ ހޮސްޕިޓަލުގެ އިސްވެރިޔާ ހައްޔަރުކޮށްފިއެވެ.

އެގޮތުން އެ ކުދިން މަރުވެފައި ވަނީ އޮކްސިޖަން ސަޕްލައި ކުރާ ކުންފުންޏަށް ބިލް ނުދެއްކުމުން އޮކްސިޖަން ކަނޑާލުމުން ކަމަށް ރިޕޯޓުތައް ބުނެއެވެ.

އުއްތަރަ ޕްރަދޭޝްގެ ސަރުކާރުން ބުނެފައި ވަނީ ދައުލަތުން ހިންގާ ބީއާރްޑީ މެޑިކަލް ކޮލެޖްގެ އިސްވެރިޔާ، ރަޖީވް މިސްރާ މިހާރު ސަސްޕެންޑް ކޮށްފައިވާ ކަމަށާއި މިހާރު ހާދިސާ ތަހުގީގު ވެސް ކުރަމުންދާ ކަމަށެވެ.

އުއްތަަރަ ޕްރަދޭޝްގެ ޗީފް މިނިސްޓަރު ޔޯގީ އަދިތިޔާނާތުގެ އޮފީހުން ނެރުނު ބަޔާނެއްގައި ބުނީ ހޮސްޕިޓަލުގެ ކުޑަ ކުދިންގެ ވޯޑުން ކުދިން މަރުވާން ފަށާފައި ވަނީ ހޯމަ ދުވަހުން ފެށިގެން ކަމަށެވެ. މަރުވި 60 ކުޑަކުދިންގެ ތެރޭގައި ވަރަށް ޅަ 34 ކުއްޖަކު ވެސް ހިމެނެއެވެ.

އުއްތަރަ ޕްރަދޭޝްގެ ހެލްތު އޮފިޝަލެއް މީޑިއާއަށް ވިދާޅުވެފައި ވަނީ އޮކްސިޖަން ސަޕްލައި ކުރުމުގައި މައްސަލައެއް ނޫޅޭ ކަމަށާއި ހޮސްޕިޓަލުގައި ވެސް އެކަށީގެންވާ ވަރަށް އޮކްސިޖަން ސިލިންޑަރު ވެސް ހުރި ކަމަށެވެ. ނަމަވެސް މަރުވި ކުދިންގެ ބެލެނެވެރިން އެކަން ގަބޫލެއް ނުކުރެއެވެ. އަދި އެއްފަހަރާ އެއްހާ ގިނަ ކުދިން މަރުވުމުން އެތައް ބަޔަކު ދަނީ އެކަމާ މެދު ސުވާލު އުފައްދަމުންނެވެ.