އެމްޑީޕީގެ އެތެރޭގެ އިންތިޚާބުގައި ވާދަކުރެވޭނީ ޕާޓީގެ މެމްބަރަކަށް ވާތާ އެއް އަހަރުވެފައިވާ މީހުންނަށްކަމަށް އެ ޕާޓީގެ ގައުމީ ހިންގާ ކޮމިޓީން ފާސްކޮށްފިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި އެމްޑީޕީގެ ރައީސް، ރައީސް މުހައްމަދު ނަޝީދު ރިޔާސަތުގައި އިންނަވާ އެމްޑީޕީ ގައުމީ ހިންގާ ކޮމިޓީގެ ބައްދަލުވުމެއް ހޮނިހިރު ދުވަހުގެ ރޭ ވަނީ ކުރިޔަށް ގެންގޮސްފައެވެ. މިބައްދަލުވުމުގެ އެޖެންޑާގައި ވަނީ މައިގަނޑު ދެ ކަމެކެވެ. އެތަނުން އެއް ކަމަކީ އެމްޑީޕީގެ ދާއިރާތަކުގެ އިންތިޚާބު 2021 ގައި ބައިވެރިވާ ކެންޑިޑޭޓުންގެ ޝަރުތުތައް ކަޑައެޅުމެވެ.

އެގޮތުގެ މަތިން ޕާޓީގައި އެއްއަހަރު ނުވާ މެންބަރުންނަށް ކުރިމަތިނުލެވޭ ގޮތައް ހުށަހެޅި ހުށަހެޅުން ވަނީ މިބައްދަލުވުމުގައި ފާސްވެފައެވެ. އެމްޑީޕީން މިހާރު އިއުލާން ކޮށްފައިވާ ގޮތުގައި ގައުމީ މަޖިލީހުގެ އިންތިހާބުގައި ވޯޓުލެވޭނީ 18 އޭޕްރީލް 2021 ވަނަ ދުވަހާ ހަމައަށް އެޕާޓީގެ މެންބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ. އޭޕްރީލް 18 ވަނަ ދުވަހުން ފެށިގެން މެމްބަރޝިޕް ފޯމުތައް ބަލައިގަތުން ވެސް އެމްޑީޕީން ވަނީ ހުއްޓާލާފައެވެ.

މީގެއިތުރުން ގައުމީ ހިންގާ ކޮމިޓީގެ ބައްދަލުވުމުގައި ވަނީ އިންތިހާބުގެ ކަންކަން ކުރިޔަށް ގެންދިޔުމަށް ހާއްސަ ކޮމިޓީއެއް އެކުލަވާލަން ފާސްކޮށްފައެވެ. ކޮމިޓީގައި ހިމެނިވަޑައިގަންނަވަނީ އެމްޑީޕީގެ ޗެއަރޕާސަން ހަސަން ލަތީފު، ހެލްތު މިނިސްޓަރ އަހުމަދު ނަސީމް، ދާންދޫ ދާއިރާގެ މެމްބަރ ޔައުގޫބް އަބްދުﷲ، ގާނޫނީ ވަކީލް ނާޒިމް އަބްދުލް ސައްތާރު، ފޮނަދޫ ދާއިރާގެ މެމްބަރ މޫސާ ސިރާޖު، އަހުމަދު ޝާހިދު (ސާބެ)، ބާރަށު ދާއިރާގެ މެމްބަރ އަހުމަދު އަބްދުﷲ އަދި އެޑިއުކޭޝަން މިނިސްޓަރ ޑރ. އައިޝަތު އަލީއެވެ.

އެމްޑީޕީގެ އެތެރޭގެ އިންތިޚާބުގައި ޖުމްލަ 455 މަގާމަކަށް މެންބަރުން އިންތިޚާބުކުރުމަށް ހަމަޖެހިފައިވެއެވެ. އެއީ 87 ދާއިރާ އެއްގެ އިތުރުން ހަ ޕްރޮވިންސް އަދި ހަތަރު ސިޓީ އެއްގެ މަގާމުތަކަށެވެ.