އަތޮޅުތެރޭގެ 135 ކޭހާއެކު މުޅި ރާއްޖެއިން ޖުމްލަ 218 ކޭސް ރިޕޯޓުކޮށްފި
24 އެޕްރީލު 2021 | ހޮނިހިރު 19:29އެންމެ ގިނަ ކޭސްތައް ފެނުނީ އަތޮޅުތެރެއިން
ކޮވިޑަށް ޓެސްޓު ކުރުމުގެ މަސައްކަތް ކުރިއަށްދަނީ
ފާއިތުވެދިޔަ 24 ގަޑި އިރު ރާއްޖެއިން 218 މީހުން ކޮވިޑް-19ށް ޕޮޒިޓިވްވެފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕިއޭއިން އާންމުކުރި ތަފާސްހިސާބުތައް ދައްކާގޮތުން އެންމެ ގިނައީ އަތޮޅުތެރެއިން ރިޕޯޓުކުރި ކޭސްތަކެވެ. ހުކުރު ދުވަހު އިރު އޮއްސި ހަޔަކުން ފެށިގެން ހޮނިހިރު ދުވަހު އިރު އޮއްސި ހަޔަކަށް ނެގި 3،375 ސާމްޕަލްގެ ތެރެއިން ޕޮޒިޓިވްވި 218 މީހުންގެ ތެރޭގައި ހިމެނެނީ އަތޮޅުތެރެއިން 135 ކޭހާއި މާލެ ސަރަހައްދުން 76 ކޭސް އަދި ރިސޯޓުތަކުން 6 ކޭހެވެ.
އަތޮޅު ތެރެއިން 135 ކޭސް ހުކުރުދުވަހު ރިޕޯޓުކުރި އިރު ބުރާސްފަތި ދުވަހު ވެސް އަތޮޅުތެރެއިން 182 ކޭސް ރިޕޯޓުކޮށްފައިވެއެވެ. އެ އަދަދާއެކު ކޭސްތަކުގެ ޖުމްލަ 300ށް ވުރެ ވެސް މައްޗަށް އަރާފައިވެއެވެ.
ހުކުރު ދުވަހު ރިޕޯޓުކުރި 218 ކޭހާއިއެކު މުޅި ރާއްޖެއިން ޖުމްލަ އަދަދު ވަނީ 27،403ށް އަރާފައެވެ. އަދި އޭގެ ތެރެއިން 24،116 މީހަކު ބަލިން ރަނގަޅުވެފައިވާއިރު، މިވަގުތު ފަރުވާދެމުން އަންނަނީ 3،207 މީހަކަށެވެ. އޭގެ ތެރެއިން 98 މީހުންނަށް ފަރުވާދެނީ އެޑްމިޓްކޮށްގެންނެވެ. އަދި ރާއްޖޭގައި މިހާތަނަށް 71 މީހަކު ވަނީ މަރުވެފައެވެ.
އެޗްޕީއޭގެ އެންމެ ފަހުގެ މައުލޫމާތުތައް ދައްކާގޮތުން މިހާރު ޖުމްލަ 20 ރަށެއް މިވަގުތު އޮތީ މޮނިޓަރިންގައެވެ. އޭގެ ތެރޭގައި އެންމެ ގިނަ ކޭސްތައް ރިޕޯޓުކޮށްފައިވާ ކަމަށް މިހާތަނަށް ދައްކަނީ އއ. މަތިވެރިންނެވެ.
