ރާއްޖޭގައި މިވަގުތު ކޮވިޑް އެންމެ ހަލުވި ކަމާއެކު ފެތުރެމުން އަންނަ ތ. އަތޮޅުގެ 7 ރަށެއްގައި 200ށް ވުރެ ގިނަ ކޮވިޑް ކޭސް ރިކޯޑް ކުރަމުން އެބަދެއެވެ.

ތ އަތޮޅުގައި މީހުން ދިރިިއުޅޭ 13 ރަށެއް އޮންނައިރު 7 ރަށެއްގައި ކޮވިޑް ފެތުރެމުން އަންނާތީ ވަނީ މޮނިޓަރިންގ ހާލަތުގައެވެ. އެއީ ވިލުފުށި، ވޭމަންޑޫ، ކިނބިދޫ، އޮމަދޫ، ގާދިއްފުށި، މަޑިފުށި އަދި އެންމެފަހުން މޮނިޓަރިންގ ގެ ހާލަތަށް ގެނައި ތިމަރަފުއްޓެވެ.

ތ. އަތޮޅުން އެންމެ ފުރަތަމަ ކޮވިޑްގެ ކޭހެއް ފެނި މޮނީޓަރިންގެ ހާލަތަށް ގެނައި ވިލުފުއްޓެވެ. އެއީ މިމަހުގެ 5 ވަނަ ދުވަހުއެވެ. ވިލުފުއްޓަށްފަހު އެކި ރަށްރަށުން ކޮވިޑްގެ ކޭސްތައް ފެނި އަންނަނީ ހާލަތު ގޯސްވަމުންނެވެ. ވިލުފުށީގެ އެންމެ ފަހުގެ ހާލަތަށް ބަލާއިރު އެރަށު ކައުންސިލުން މައުލޫމާތުދޭ ގޮތުގައި މިހާރު އެރަށުގައި އެކްޓިވް ކޭހުގެ ގޮތުގައި ގުނަމުން އަންނަނީ 10 ކޭހެެކެވެ. ޖުމްލަ 16 މީހަކު އެރަށުން ޕޮޒިޓިވްވެފައިވެއެވެ. އޭގެތެރެއިން 6 މީހަކު ވަނީ ބަލިން ރަނގަޅުވެފައެވެ.

ޖުމްލަ 547 ސާމްޕަލެއް އެރަށުން ނަގާފައިވާއިރު އަދިވެސް ނަތީޖާ ނުލިބޭ 91 ސާމްޕަލެއްވާ ކަމަށް އެރަށު ކައުންސިލުން ބުނެއެވެ. ބަލި މީހުންގެ ތެރެއިން އެކަކު ވަނީ ކޮވިޑް ފެސިލިޓީއަށް އިތުރު ފަރުވާ ދިނުމަށް ބަދަލުކޮށްފައެވެ.

ތ.އަތޮޅުގެ ވެރިކަން ކުރާ ރަށް ވޭމަންޑޫ މިމަހުގެ ނުވަވަނަ ދުވަހު މޮނިޓަރިންގެ ހާލަތަށް ލާފައިވާއިރު އެރަށުން އޭޕްރީލް މަހުގެ 23 ވަނަ ދުވަހުގެ ނިޔަލަށް 164 މީހަކު ވަނީ ކޮވިޑަށް ޕޮޒިޓިވްވެފައެވެ. އޭގެތެރެއިން 159 މީހުން ތިބީ އެރަށުގައެވެ. އެރަށުން ހުކުރު ދުވަހު 14 މީހަކު ވަނީ ބައްޔަށް ޕޮޒިޓިވްވެފައެވެ.

ޖުމްލަ 711 ސާމްޕަލެއް އެރަށުން މިހާތަނަށް އައިއިރު ނަގާފައިވާއިރު 420 ސާމްޕަލެއް ވަނީ ނެގެޓިވްވެފައެވެ. ނަތީޖާ ނުލިބޭ 130 ސާމްޕަލެއްވާ ކަމަށް ތ. އަތޮޅު ހޮސްޕިޓަލުން މައުލޫމާތުދެއެވެ. އެރަށުން ޕޮޒިޓިވްވެފައިވާ މީހުންގެ ތެރެއިން އެކަކަށް އަންނަނީ ކޮވިޑް ފެސިލިޓީގައި ފަރުވާ ދެމުންނެވެ. ވޭމަންޑޫއަކީ އެއަތޮޅުން އެންމެ ހާލަތު ގޯސް ރަށެވެ.

ކިނބިދޫއަށް ބަލާލާއިރު އެރަށް މޮނިޓަރިންގ ހާލަތަށް ގެނައީ މިމަހުގެ 11 ވަނަ ދުވަހުއެވެ. އެރަށުގައި 20 މީހަކު ވަނީ ބައްޔަށް ޕޮޒިޓިވްވެފައެވެ.

އޮމަދޫ މޮނިޓަރިންގ ހާލަތަށް ގެނެސްފައިވަނީ މިމަހުގެ 14 ވަނަ ދުވަހުއެވެ. އެރަށުން މިހާތަނަށް ޕޮޒިޓިވްވެފައިވަނީ 3 މީހުންނެވެ. ޖުމްލަ 239 ސާމްޕަލެއް އެރަށުން ނަގާފައިވާއިރު 222 ސާމްޕަލް ވަނީ ނެގެޓިވްވެފައެވެ. 14 ސާމްޕަލެއްގެ ނަތީޖާ އަދި ނުލިބިއެވެ.

ގާދިށްފުށިވެސް މިމަހުގެ 14 ވަނަ ދުވަހު ވަނީ މޮނިޓަރިންގ އަށް ލާފައެވެ.

މިމަހުގެ 16 ވަނަ ދުވަހު މޮނިޓަރިންގެ ހާލަތަށް ލާފައިވަނީ އެއަތޮޅު މަޑިފުއްޓެވެ. މަޑިފުށީގެ ހާލަތަށް ބަލާއިރު ހުކުރު ދުވަހު އެރަށުން 4 މީހަކު ޕޮޒިޓިވްވެ ޖުމްލަ އަދަދު ވަނީ 10ށް އަރާފައެވެ. ޖުމްލަ 190 ސާމްޕަލެއް އެރަށުން ނަގާފައިވާއިރު 179 ސާމްޕަލްގެ ނަތީޖާ ވަނީ ނެގެޓިވްވެފައެވެ. ނަތީޖާ ނުލިބި ވަނީ 1 ސާމްޕަލްގެ އެވެ.

ތ އަތޮޅުން އެންމެ ފަހުން މޮނިޓަރިންގ ގެ ހާލަތަށް ގެނައީ އެއަތޮޅު ތިމަރަފުއްޓެވެ. އެއީ މިމަހުގެ 19 ވަނަ ދުވަހުއެވެ. އެރަށުން ހުކުރު ދުވަހު ދެ މީހަކު ވަނީ ކޮވިޑަށް ޕޮޒިޓިވްވެފައެވެ. އެއާއެކު މުޅި ޖުމްލަ އެރަށުން 7 މީހަކު ވަނީ ކޮވިޑަށް ޕޮޒިޓިވްވެފައެވެ. ޖުމްލަ 309 ސާމްޕަލެއް ނަގާފައިވާއިރު 261 ސާމްޕަލެއް ވަނީ ނެގެޓިވްވެފައެވެ. ނަތީޖާ ނުލިބޭ 40 ސާމްޕަލެއްވާ ކަމަށް އެރަށު ހެލްތު ސެންޓަރުން މައުލޫމާތުދެއެވެ.

ރާއްޖޭގައި މިވަގުތުވެސް ހަލުވިކަމާއެކު ކޮވިޑް ފެތުރެމުންދާއިރު މިހާރު މާލެއަށްވުރެ ގިނައިން އަތޮޅުތެރެއިން އަންނަނީ ކޭސްތައް ފެންނަމުންނެވެ. އެގޮތުން ބ. އޭދަފުއްޓާއި ކ. މާފުށި އަދި އއ. މަތިވެރިން އަންނަނީ ގިނަ އަދަދަކަށް ކޭސްތައް ފެންނަމުންނެވެ. އެއް އަތޮޅެއްގައި އެންމެ ބޮޑަށް ކޮވިޑް ފެތުރެމުން އަންނަ އަތޮޅަކީ ތ. އަތޮޅެވެ. ކުރިން ޅ. އަތޮޅުގައި މީހުން ދިރިއުޅޭ ހުރިހާ ރަށަކުން ވަނީ ކޮވިޑްގެ ކޭސްތައް ފެނިފައެވެ.