ފުލުހުންގެ ޚިދުމަތުގެ މައުލޫމާތު މ. އަތޮޅު މަދަރުސާ ދަރިވަރުންނަށް ދީފި
23 އެޕްރީލު 2021 | ހުކުރު 16:14ސްކޫލުތަކުގެ ދަރިވަރުންނަށް މައުލޫމާތު ދިނުމުގެ ސިލްސިލާ ޕްރޮގްރާމްތައް ފުލުހުންދަނީ ހިންގަމުން
ފުލުހުންގެ މައުލޫމާތު ދިނުމުގެ ސިލްސިލާ ޕްރޮގްރާމްގެ ތެރެއިން
ސްކޫލުތަކުގެ ދަރިވަރުންނަށް މައުލޫމާތުދީ ހޭލުންތެރި ކުރުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން، މ. އަތޮޅު މަދަރުސާގެ ގްރޭޑް 6ން 10ގެ ދަރިވަރުންނަށް މައުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ.
ކޮޅުފުށި ޕޮލިސް ސްޓޭޝަނާއި، މ. އަތޮޅު މަދަރުސާ ގުޅިގެން މި މަހު 21 ވަނަ ދުވަހުގެ ރޭ ކުރިއަށް ގެންދިޔަ އެ ޕްރޮގްރާމްގައި މަގުމަތީގެ ސަލާމަތާއި ރައްކާތެރިކަމާ ގުޅޭގޮތުންނާއި ކުޑަކުދިންގެ އަދުލުގެ ގާނޫނާ ގުޅޭގޮތުން ދަރިވަރުންގެ އުމުރާ ގުޅޭގޮތަށް މައުލޫމާތު ދީފައިވެއެވެ. އެގޮތުން، މަގުމަތީގައި އުޅުމުގައި ދަރިވަރުން ސަމާލުކަންދޭންޖެހޭ ކަންކަމާއި، އެކްސިޑެންޓުތަކުން ރައްކާތެރިވުމަށް އަމަލުކުރާނެ ގޮތުގެ މައުލޫމާތު ހިއްސާކޮށްފައިވެއެވެ. އަދި ބައިސްކަލު ދުއްވާނަމަ ތިމާއާއި އަނެކުންގެ ސަލާމަތާއި ރައްކާތެރިކަމަށް ސަމާލުކަންދޭންޖެހޭ ކަންކަމުގެ މައުލޫމާތުވެސް ހިއްސާކޮށްފައިވެއެވެ. އަދި މަގުމަތީގައި އުޅޭއިރު އެހެން މީހުންނަށް އުނދަގޫ ނުވާނޭހެން ދަރިވަރުންގެ އަމަލުތައް ބެހެއްޓުމަށް ނަސޭހަތްތެރިވެފައިވެއެވެ.
މީގެ އިތުރުން، ކުޑަކުދިންގެ އަދުލުގެ ގާނޫނުގައި ހިމެނޭ، ދަރިވަރުންނާ ގުޅުންހުރި ކަންކަމުގެ މައުލޫމާތު ހިއްސާކޮށްފައިވެއެވެ. އަދި ކުޑަކުދިން ކުރާ ޖިނާއީ ކުށްތަކަކީ ކޮބައިކަމާއި އެފަދަ ކަންކަމުން ދުރުހެލިވެތިބުމަށް ނަސޭހަތްތެރިވެފައިވެއެވެ.
ސްކޫލުތަކުގެ ދަރިވަރުންނަށް މައުލޫމާތު ދިނުމުގެ ސިލްސިލާ ޕްރޮގްރާމްތައް ފުލުހުންދަނީ ހިންގަމުންނެވެ.
