އިސްރާފު ކުރުމަކީ ކޮންމެ ކަމެއްގައި ވެސް ހައްދު ފަހަނަ އަޅައި ދިޔުން، އެއީ ހަމައެކަނި ކެއިން ބުއިމާ ގުޅިފައިވާ ކަމެއް ނޫން
ދެވަނަ ފަހަރަށް ބޭނުން ކުރެވިދާނެ ކާއެއްޗެހި އުކާނުލައި އެތަކެތި ބޭނުން ކުރުމަށް އިސްލާމްދީން ބާރު އަޅާ
އިސްރާފު ކުރުމަކީ ޝައިޠާނާގެ އަމަލެއް ކަމަށް ޚުތުބާ ބުނި
އިސްރާފު ކުރުމަކީ ކޮންމެ ކަމެއްގައި ވެސް ހައްދު ފަހަނަ އަޅައި ދިޔުން ކަމަށާއި އެއީ ހަމައެކަނި ކެއިން ބުއިމާ ގުޅިފައިވާ ކަމެއް ނޫން ކަމަށް ހުކުރު ޚުތުބާގައި ބުނެފިއެވެ.
ކާބޯތަކެތީގެ ނިއުމަތަށް ޝުކުރު ކުރުމާއި އިސްރާފު ނުކުރުން މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އުރެދުންތަކަށް އަރައިގަތުން ގިނަކޮށް ކުފްރުވުމާ ހަމައަށް ހިނގައްޖެނަމަ އެއީ ވެސް އެކަމުގައި އިސްރާފު ކުރުމެއް ކަމަށެވެ. ދެވަނަ ފަހަރަށް ބޭނުން ކުރެވިދާނެ ކާއެއްޗެހި އުކާނުލައި އެތަކެތި ބޭނުން ކުރުމަށް އިސްލާމްދީން ބާރު އަޅާ ކަމަށް ވެސް ޚުތުބާގައި ބުންޏެވެ. ކާބޯތަކެއްޗަކީ މާތްﷲ ގެ ނިއުމަތެއް ކަމަށާއި އެތަކެތި އުކާލުމަކީ ނިއުމަތުގެ ވެރި ފަރާތަށް ޝުކުރު ނުކުރުމެވެ. އަދި މުދާ ހަލާކުވަންދެން ބަހައްޓާ، އެތަކެތި އުކާލުމަކީ އިސްރާފު ކުރުމަށް ވުރެން ވެސް ނުބައި ކަމެއް ކަމަށް ޚުތުބާގައި ބުންޏެވެ.
އިސްރާފު ކުރުމަކީ ޝައިޠާނާގެ އަމަލެއް ކަމަށާއި އެކަމުގެ ގެއްލުން ސިއްހީ ގޮތުންނާއި މާލީ ގޮތުން ފަރުދުންނާއި މުޖުތަމައުއަށް ފޯރާނެ ކަމަށް ވެސް ޚުތުބާގައިވެއެވެ. މިއަދު އިސްރާފު ކުރަނީ ހަމައެކަނި މުއްސަނދިން ނޫންކަން ފާހަގަކޮށް ޚުތުބާގައި ބުނީ އަތްމަތި ދަތި މީހުން ވެސް ކޮންމެހެން ކުރަން ނުޖެހޭ ޚަރަދުތައް ކުރަމަށްޓަކައި ދަރަނި ނަގަމުންދާ ތަން ފެންނަ ކަމަށެވެ. ޒަމާނާއެކު ތަނަވަސް މީހުންނާއި ފައި ހަމަކުރުމުގެ ބަހަނާގައި ކަމަށެވެ. އެހެންނަމަވެސް މުސްލިމުންނާއި ލިބޭ އެއްޗަކުން ފުއްދާލައިގެން ދިރިއުޅޭ ބައެއް ކަމަށް ޚުތުބާގައި ބުންޏެވެ.
މީގެ އިތުރުން ގަސް އިންދުމާއި ދަނޑު ގޮވާން ކުރުމާއި އަމިއްލަ އުފެއްދުންތެރިކަން އިތުރުކޮށް ކާބޯތަކެރި އުފެއްދުމަށް ގަދައަޅައި މަސައްކަތް ކުރުމަށް އިސްލާމް ދީން ވަރަށް ބާރު އަޅައެވެ. ޚުތުބާގައި ބުނީ އެއީ ތިމާ ކުރާ މަސައްކަތުން އަނެކުންނަށް ލިބޭ މަންފާ އަކީ ތިމާއަށް ލިބޭ ވަރަށް ބޮޑު ދަރުމައަކާއި ސަވާބެއް ކަމަށެވެ.
ކެއިން ބުއިމުގައި ހިފައްޓަން ޖެހޭ ދީނީ އަދި ސިއްހީ އަދަބުތަކެއްވާ ކަމަށާއި އޭގެ ތެރޭގައި ކެއުމުގެ ކުރިންނާއި ފަހުން އަތްދޮވުމާއި ބިސްމި ކިއުމާއި ކަނާއަތުން ކެއުމާ، ކައި ނިމިމުން މާތް ﷲ އަށް ހަމްދު ކުރުން ހިމެނޭ ކަމަށް ވެސް ޚުތުބާގައި ބުންޏެވެ.
މުސްލިމުން ކައިބޮއި އުޅެން ވާނީ ދިރިހުރުމަށްޓަކައި ކަމަށާއި ކެއުމަށާއި ބުއިމަށްޓަކައި ދިރި ތިބޭ ބަޔަކަށް މުސްލިމުން ވެގެން ނުވާނެ ކަމަށް ޚުތުބާގައި ބުންޏެވެ.
